ರೂಪಚಿತ್ರದಲ್ಲಾದರೆ ದೇವಾಲಯಗಳ ಹೊರಗೋಡೆಯ ಮೇಲೆ ಬರೆದ ಆನೆ, ಕುದುರೆ, ಪದ್ಮ, ಹಂಸ, ಚಕ್ರ, ಸ್ವಸ್ತಿಕ, ದೇವರ ವಿಗ್ರಹ, ನಾಟ್ಯಶಿಲ್ಪಗಳು ಯಾವುದೂ ಆಗಬಹುದು. ಸಂಗೀತದಲ್ಲಾದರೆ ಗುರುವಂದನೆಯ ಪದ್ಯ, ಸುಂದರ ಭಜನಾವಳಿ, ನಾಮಸಂಕೀರ್ತನೆ, ಯಾವುದೂ ಆದೀತು! ಕಾವ್ಯ, ನರ್ತನ, ಅಭಿನಯ ಮೊದಲಾದ ಕಲಾಕೃತಿಗಳಲ್ಲಾದರೆ ದೇಶವರ್ಣನೆ, ನಾಂದೀಪದ್ಯ, ಗಿರಿ-ವನ-ನದಿಗಳ ವರ್ಣನೆ, ಯಾವುದೂ ಆಗಬಹುದು! ಇವೆಲ್ಲವೂ ಮನಸ್ಸಿನ ಬೇಸರ ಮರೆತು, ದುಗುಡ ಕಳೆದು ಸ್ವಲ್ಪ ಹೊಸತನ ಬರುವುದಕ್ಕೆ ಕಾರಣವಾಗುತ್ತವೆ. ಸಂಗೀತದ ನಾದಧಾರೆಯಂತೂ ವ್ಯಂಜನಾಂಶಗಳ ಸ್ಪೋಟದಿಂದ ಅಲ್ಲಲ್ಲಿ ದ್ವೀಪಗಳಂತೆ ಬಂಡೆಗಳಂತೆ, ಜಲಪಾತಗಳಂತೆ ಅನುಭವವನ್ನುಂಟುಮಾಡುತ್ತಾ ನಮ್ಮನ್ನು ಹೊಸದೊಂದು ಲೋಕಕ್ಕೇ ಕರೆದೊಯ್ದು ರುಚಿವೈವಿಧ್ಯಗಳನ್ನು ಕೊಡುತ್ತವೆ.
