ಗ್ರಹಗತಿಗನುಗುಣವಾಗಿ ಶಾಸ್ತ್ರಬದ್ಧವಾಗಿ ಪೂಜೆ, ಹೋಮ-ಹವನ ಮಾಡುವ ಈ ಕ್ಷೇತ್ರ ಸ್ಥಾಪನೆಯಾಗಿದ್ದು 5 ವರ್ಷಗಳ ಹಿಂದೆ. ದೇವಿ ಉಪಾಸಕರಾದ ಶ್ರೀ ಅರವಿಂದ ಭಟ್ಟರು, ತಾಯಿಯ ಪ್ರೇರಣೆಯಂತೆ ಬೆಂಗಳೂರಿನ ಅಗರದಲ್ಲಿ ಮೂಕಾಂಬಿಕೆಯ ಸನ್ನಿಧಾನವನ್ನು ಸ್ಥಾಪಿಸಿದ್ದಾರೆ. ಅಂದಿನಿಂದ ನಿರಂತರವಾಗಿ ಸಿಂಹಾರೂಢ ಜಗಜ್ಜನನಿ ಮೂಕಾಂಬಿಕೆಗೆ ನಿತ್ಯ ಅಭಿಷೇಕ, ಅಲಂಕಾರದೊಂದಿಗೆ ಮಹಾಪೂಜೆಯನ್ನು ನೆರವೇರಿಸಲಾಗುತ್ತಿದೆ. ಅರವಿಂದ ಭಟ್ಟರ ಸಂಕಲ್ಪದಂತೆ ಮಾಡಿದ ಎಲ್ಲ ಪೂಜಾ ಕಾರ್ಯಗಳು ಹೊಸ ದಾಖಲೆ ಬರೆದಿವೆ. ದೇವಾಲಯ ಪ್ರತಿಷ್ಠಾಪನೆಯಾದ ಕೂಡಲೇ 100 ದಿನಗಳ ಕಾಲ ಪ್ರತಿನಿತ್ಯ ಸಹಸ್ರ ಮೋದಕದಂತೆ, ಲಕ್ಷ ಮೋದಕವನ್ನು ಅರ್ಪಿಸಿ ಮಾಡಲಾದ ಮಹಾಗಣಪತಿ ಹವನವು ಮೊಟ್ಟಮೊದಲ ದಾಖಲೆ. ನಂತರ 2021ರಲ್ಲಿ ಆರಂಭವಾಗಿರುವ 19 ತಿಂಗಳ ಕಾಲ ಪ್ರತಿ ಎರಡನೇ ಶನಿವಾರ ಶನಿಶಾಂತಿ ಹೋಮವು 2023ಕ್ಕೆ ಮಂಗಲವಾಗಲಿದ್ದು, ಅದು ಮತ್ತೊಂದು ದಾಖಲೆ. ಈಗ ಶ್ರೀಕ್ಷೇತ್ರದಲ್ಲಿ ಮತ್ತೊಂದು ಮಹಾ ಸಂಕಲ್ಪ ಮಾಡಲಾಗಿದೆ. ಕಳೆದ ಜನವರಿ 16ರಿಂದ 1008 ದಿನಗಳ ಕಾಲ ನಿರಂತರ 1 ಲಕ್ಷ ಗಣಪತಿ ಅಥರ್ವಶೀರ್ಷ ಪಾರಾಯಣ ಸಹಿತ 10 ಲಕ್ಷ ಸಮಿತ್ತುಗಳ ಆಹುತಿಯೊಂದಿಗೆ ಮಹಾಗಣಪತಿ ಹೋಮ ಆರಂಭಿಸಲಾಗಿದೆ. 2024ರ ಅ. 18ಕ್ಕೆ ಈ ಮಹಾ ಹೋಮ ಪೂರ್ಣವಾಗಲಿದೆ. ಮಕ್ಕಳಿಗೆ ವಿದ್ಯಾ, ಬುದ್ಧಿ, ಸಿದ್ಧಿ ಪ್ರಾಪ್ತಿ ಹಾಗೂ ಸಂಪೂರ್ಣ ದೇವರ ಅನುಗ್ರಹಕ್ಕಾಗಿ ಲೋಕ ಕಲ್ಯಾಣಾರ್ಥ ಸಂಕಲ್ಪದೊಂದಿಗೆ ಆರಂಭಿಸಿರುವ ಈ ಮಹಾಪೂಜೆಯಲ್ಲಿ ಪಾಲ್ಗೊಳ್ಳಲು ಸಾರ್ವಜನಿಕರಿಗೆ ಅವಕಾಶ ನೀಡಲಾಗಿದ್ದು, ಪೂಜಾ ಸೇವಾರ್ಥಿಗಳ ಹೆಸರಿನಲ್ಲಿ 1008 ದಿನವೂ ನಿತ್ಯ ಸಂಕಲ್ಪ ನೆರವೇರುತ್ತದೆ.
