ಕೋಲ್ಕತ: ಆಡಿರುವ ಮೊದಲ 5 ಪಂದ್ಯಗಳಲ್ಲಿ ಒಂದರಲ್ಲಿ ಮಾತ್ರ ಗೆದ್ದು 4ರಲ್ಲಿ ಸೋತಿರುವ ತಂಡಗಳಾದ ಬಾಂಗ್ಲಾದೇಶ ಮತ್ತು ನೆದರ್ಲೆಂಡ್ ತಂಡಗಳು ಏಕದಿನ ವಿಶ್ವಕಪ್ನಲ್ಲಿ ಶನಿವಾರ 2ನೇ ಗೆಲುವು ಒಲಿಸಿಕೊಳ್ಳಲು ಪೈಪೋಟಿ ನಡೆಸಲಿವೆ. ಸೆಮಿಫೈನಲ್ ಸಹಿತ 5 ಪಂದ್ಯಗಳಿಗೆ ಆತಿಥ್ಯ ವಹಿಸಬೇಕಿರುವ ಈಡನ್ ಗಾರ್ಡನ್ಸ್ ಅಂಗಣದಲ್ಲಿ ಇದು ಹಾಲಿ ವಿಶ್ವಕಪ್ನ ಮೊದಲ ಪಂದ್ಯವಾಗಿದೆ.
ಶಕೀಬ್ ಅಲ್ ಹಸನ್ ಪಡೆ ಆರಂಭಿಕ ಪಂದ್ಯದ ಗೆಲುವಿನ ಬಳಿಕ ಸತತ 4 ಸೋಲಿನಿಂದ ಕಂಗೆಟ್ಟಿದ್ದರೆ, ನೆದರ್ಲೆಂಡ್ ತಂಡ ಕೂಡ 4 ಪಂದ್ಯ ಸೋತಿದ್ದರೂ, ದಣ ಆಫ್ರಿಕಾ ಎದುರು ಸಾಧಿಸಿದ ಅಚ್ಚರಿಯ ಗೆಲುವಿನ ಬಲ ಹೊಂದಿದೆ. ಉಭಯ ತಂಡಗಳು ಸೆಮೀಸ್ ರೇಸ್ನಲ್ಲಿ ಇರದಿದ್ದರೂ, ಈ ಪಂದ್ಯದ ಗೆಲುವು ಅಂಕಪಟ್ಟಿಯಲ್ಲಿ ಕೊನೇ ಸ್ಥಾನ ತಪ್ಪಿಸಿಕೊಳ್ಳುವ ಅವಕಾಶ ಸೃಷ್ಟಿಸಲಿದೆ. ದಕ್ಷಿಣ ಆಫ್ರಿಕಾ ವಿರುದ್ಧ 399 ರನ್ ಬಿಟ್ಟುಕೊಟ್ಟಿದ್ದರೂ, ಮಹಮದುಲ್ಲಾ ಶತಕದಿಂದಾಗಿ ಬಾಂಗ್ಲಾ ಸೋಲಿನಲ್ಲಿ ಮಾನ ಉಳಿಸಿಕೊಂಡಿತ್ತು. ಟೂರ್ನಿ ಆರಂಭಕ್ಕೆ ಮುನ್ನ ಒಳಜಗಳದಿಂದಾಗಿ ಸುದ್ದಿಯಾಗಿದ್ದ ಬಾಂಗ್ಲಾಗೆ ಬಳಿಕ ನಾಯಕ ಶಕೀಬ್ ಗಾಯದ ಸಮಸ್ಯೆ ಹಿನ್ನಡೆ ತಂದಿತ್ತು.
ಕಳೆದೆರಡು ಪಂದ್ಯಗಳಲ್ಲಿ ಶ್ರೀಲಂಕಾ, ಆಸ್ಟ್ರೆಲಿಯಾ ಎದುರು ಸೋತಿರುವ ನೆದರ್ಲೆಂಡ್, ಮತ್ತೆ ಚೇತೋಹಾರಿ ನಿರ್ವಹಣೆ ತೋರುವ ತವಕದಲ್ಲಿದೆ. ಹಾಲಿ ವಿಶ್ವಕಪ್ ಶುರುವಾಗಿ 23 ದಿನ ಮತ್ತು 27 ಪಂದ್ಯಗಳು ನಡೆದ ಬಳಿಕ ಈಡನ್ ಗಾರ್ಡನ್ಸ್ ಮೊದಲ ಪಂದ್ಯಕ್ಕೆ ಆತಿಥ್ಯ ವಹಿಸುತ್ತಿದೆ.
ಏಕದಿನ ಮುಖಾಮುಖಿ: 2
ನೆದರ್ಲೆಂಡ್: 1, ಬಾಂಗ್ಲಾದೇಶ: 1
ವಿಶ್ವಕಪ್ ಮುಖಾಮುಖಿ: 1
ಬಾಂಗ್ಲಾದೇಶ: 1, ನೆದರ್ಲೆಂಡ್: 0
ಆರಂಭ: ಮಧ್ಯಾಹ್ನ 2.00
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್