ನವದೆಹಲಿ: ಉದ್ಘಾಟನಾ ಆವೃತ್ತಿಯ ದೆಹಲಿ ಪ್ರೀಮಿಯರ್ ಲೀಗ್ ದಾಖಲೆಗಳ ವಿಚಾರವಾಗಿ ಕ್ರೀಡಾಭಿಮಾನಿಗಳ ಗಮನ ಸೆಳೆಯುತ್ತಿದ್ದು, ಈ ಪೈಕಿ ಟೀಮ್ ಇಂಡಿಯಾ ಮಾಜಿ ಆಟಗಾರ ಶಿಖರ್ ಧವನ್ ಸಹ ಮಾಲೀಕತ್ವದ ಸೌತ್ ಡೆಲ್ಲಿ ಸೂಪರ್ಸ್ಟಾರ್ಸ್ ತಂಡ ಟಿ20 ಕ್ರಿಕೆಟ್ನಲ್ಲಿ ಹೊಸ ದಾಖಲೆ ಬರೆದಿದೆ, ಶನಿವಾರ (ಆಗಸ್ಟ್ 31) ನಡೆದ ಪಂದ್ಯದಲ್ಲಿ 308 ರನ್ ಕಲೆಹಾಕುವ ಮೂಲಕ ಹೊಸ ದಾಖಲೆ ಬರೆದಿರುವ ಧವನ್ ಸಹ ಮಾಲೀಕತ್ವದ ತಂಡವು 300ಕ್ಕೂ ಅಧಿಕ ರನ್ಗಳಿಸಿದ ಭಾರತದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಶನಿವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ಗೆ ಇಳಿದ ಸೌಥ್ ಡೆಲ್ಲಿ ತಂಡ ಐಪಿಎಲ್ ತಾರೆ 24 ವರ್ಷದ ಆಯುಷ್ ಬಡೋನಿ (165 ರನ್, 55 ಎಸೆತ, 8 ಬೌಂಡರಿ, 19 ಸಿಕ್ಸರ್) ಹಾಗೂ ಪ್ರಿಯಾಂಶ್ ಆರ್ಯ (120 ರನ್, 50 ಎಸೆತ, 10 ಬೌಂಡರಿ, 10 ಸಿಕ್ಸರ್) ಜೋಡಿ 99 ಎಸೆತದಲ್ಲಿ 286 ರನ್ಗಳ ಭರ್ಜರಿ ಜತೆಯಾಟವಾಡಿದ ಬಲದಿಂದ 5 ವಿಕೆಟ್ಗೆ 308 ರನ್ ದಾಖಲಿಸಿತು. ಬಡೋನಿ-ಪ್ರಿಯಾಂಶ್ ನಡುವಿನ ಜತೆಯಾಟ ಟಿ20 ಕ್ರಿಕೆಟ್ನಲ್ಲಿ ಯಾವುದೇ ವಿಕೆಟ್ಗೆ ದಾಖಲಾದ ಗರಿಷ್ಠ ರನ್ ಜತೆಯಾಟ ಎನಿಸಿದರೆ, ಬಡೋನಿ ಟಿ20 ಕ್ರಿಕೆಟ್ನಲ್ಲಿ ವೈಯಕ್ತಿಕ ಗರಿಷ್ಠ ರನ್ಗಳಿಸಿದ ಭಾರತೀಯ ಬ್ಯಾಟರ್ ಎನಿಸಿದರು. ಜತೆಗೆ ಇನಿಂಗ್ಸ್ನಲ್ಲಿ ಗರಿಷ್ಠ 19 ಸಿಕ್ಸರ್ ಬಾರಿಸಿ ಕ್ರಿಸ್ಗೇಲ್ (18) ದಾಖಲೆ ಮುರಿದರು. ಸೈಯದ್ ಮುಷ್ತಾಕ್ ಅಲಿ ಟೂರ್ನಿಯಲ್ಲಿ ಶ್ರೇಯಸ್ ಅಯ್ಯರ್ 147 ರನ್ ಗಳಿಸಿದ್ದು ಹಿಂದಿನ ಭಾರತೀಯ ದಾಖಲೆ ಆಗಿತ್ತು.
ಇದನ್ನೂ ಓದಿ: ಚಲಿಸುತ್ತಿದ್ದ ಲಾರಿಯಿಂದ 15 ಕೋಟಿ ರೂ. ಮೌಲ್ಯದ ಐಫೋನ್ಗಳನ್ನು ಕದ್ದ ಖದೀಮರು; ಪೊಲೀಸರು ಹೇಳಿದ್ದಿಷ್ಟು
ಈ ಪೈಕಿ ದೆಹಲಿ ಮೂಲದ ಯುವ ಬ್ಯಾಟರ್ ಪ್ರಿಯಾಂಶ್ ಆರ್ಯ ಒಂದೇ ಓವರ್ನಲ್ಲಿ ಆರು ಸಿಕ್ಸರ್ಗಳನ್ನು ಸಿಡಿಸುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಎಡಗೈ ಬ್ಯಾಟರ್ ಆಗಿರುವ 23 ವರ್ಷದ ಪ್ರಿಯಾಂಶ್ ಡೆಲ್ಲಿ ಪ್ರೀಮಿಯರ್ ಲೀಗ್ನಲ್ಲಿ ಕಾಣಿಸಿಕೊಂಡಿರುವ ಅತ್ಯಂತ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 2021ರಲ್ಲಿ ದೇಶೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ ಪ್ರಿಯಾಂಶ್ ಸೈಯದ್ ಮುಷ್ತಾಕ್ ಅಲಿ ಸೇರಿದಂತೆ ಅನೇಕ ಟೂರ್ನಿಗಳಲ್ಲಿ ಸ್ಫೋಟಕ ಆಟವಾಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
2019ರಲ್ಲಿ ನಡೆದ U19 ಚತುರ್ಭುಜ ಸರಣಿಯಲ್ಲೂ ಕಮಾಲ್ ಮಾಡಿದ್ದ ಪ್ರಿಯಾಂಶ್ ಅಫ್ಘಾನಿಸ್ತಾನ ವಿರುದ್ಧ ಉತ್ತಮ ಪ್ರದರ್ಶನ ನೀಡಿದ್ದರು. 2025ರಲ್ಲಿ ನಡೆಯಲಿರುವ 18ನೇ ಆವೃತ್ತಿಯ ಐಪಿಎಲ್ನಲ್ಲಿ ಪ್ರಿತಾಂಶ್ರನ್ನು ಖರೀದಿಸಲು ತಂಡಗಳು ಸಿದ್ಧತೆ ನಡೆಸುತ್ತಿದ್ದು, ದುಬಾರಿ ಬೆಲೆಗೆ ಬಿಕರಿಯಾಗುವ ಸಾಧ್ಯತೆ ಇದೆ. ಐಪಿಎಲ್ನಲ್ಲೂ ಉತ್ತಮ ಪ್ರದರ್ಶನ ನೀಡಿ ಗಮನ ಸೆಳೆದರೆ ರಾಷ್ಟ್ರೀಯ ತಂಡದಲ್ಲೂ ಆಡುವ ಅವಕಾಶ ಪಡೆಯಲಿದ್ದಾರೆ.