WCL : 2007ರ ಟಿ20 ವಿಶ್ವಕಪ್ನಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಬೌಲ್-ಔಟ್ ಅನ್ನು ಯಾವುದೇ ಸಾಮಾನ್ಯ ಕ್ರಿಕೆಟ್ ಅಭಿಮಾನಿ ಎಂದಿಗೂ ಮರೆಯಲು ಸಾಧ್ಯವಿಲ್ಲ. ಟೈ ಆದ ಪಂದ್ಯವನ್ನು ಟೀಮ್ ಇಂಡಿಯಾ ಬೌಲ್-ಔಟ್ ನಿಯಮದ ಮೂಲಕ ಗೆದ್ದಿತು. ಇದೀಗ ವರ್ಲ್ಡ್ ಚಾಂಪಿಯನ್ಶಿಪ್ ಆಫ್ ಲೆಜೆಂಡ್ಸ್-2025 ರಲ್ಲಿ ಇದೇ ರೀತಿಯ ದೃಶ್ಯ ಪುನರಾವರ್ತನೆಯಾಗಿದೆ.
ಈ ಪಂದ್ಯಾವಳಿಯ ಭಾಗವಾಗಿ, ಶನಿವಾರ ನಡೆದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ಚಾಂಪಿಯನ್ಸ್ ವಿರುದ್ಧದ ಪಂದ್ಯವನ್ನು ದಕ್ಷಿಣ ಆಫ್ರಿಕಾ ಬೌಲ್ ಔಟ್ ಮೂಲಕ ಗೆದ್ದುಕೊಂಡಿತು. ಮಳೆಯಿಂದಾಗಿ ಪಂದ್ಯವನ್ನು 11 ಓವರ್ಗಳಿಗೆ ಮೊಟಕುಗೊಳಿಸಲಾಯಿತು. ಮೊದಲು ಬ್ಯಾಟಿಂಗ್ ಮಾಡಿದ ವೆಸ್ಟ್ ಇಂಡೀಸ್ ನಿಗದಿತ ಓವರ್ಗಳಲ್ಲಿ 5 ವಿಕೆಟ್ಗಳ ನಷ್ಟಕ್ಕೆ 79 ರನ್ ಗಳಿಸಿತು.
ನಾಯಕ ಕ್ರಿಸ್ ಗೇಲ್ (2) ಮತ್ತು ಕೈರನ್ ಪೊಲಾರ್ಡ್ (0) ಅವರಂತಹ ಸ್ಟಾರ್ ಆಟಗಾರರು ವೆಸ್ಟ್ ಇಂಡೀಸ್ ಇನ್ನಿಂಗ್ಸ್ನಲ್ಲಿ ನಿರಾಶೆ ಮೂಡಿಸಿದರು. ಲೆಂಡ್ಲ್ ಸಿಮನ್ಸ್ (28) ಟಾಪ್ ಸ್ಕೋರರ್ ಎನಿಸಿಕೊಂಡರು. ದಕ್ಷಿಣ ಆಫ್ರಿಕಾ ಪರ ಆ್ಯರನ್ ಫಾಂಗಿಸೊ ಎರಡು ವಿಕೆಟ್ ಪಡೆದರೆ, ಹಾರ್ಡಸ್ ವಿಲ್ಜೋಯೆನ್, ಜೆಜೆ ಸ್ಮಟ್ಸ್ ಮತ್ತು ಡುವಾನೆ ಆಲಿವರ್ ತಲಾ ಒಂದು ವಿಕೆಟ್ ಪಡೆದರು.
80 ರನ್ಗಳ ಗುರಿಯನ್ನು ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ಲೆಜೆಂಡ್ಸ್ ನಿಗದಿತ ಓವರ್ಗಳಲ್ಲಿ 80 ರನ್ಗಳನ್ನು ಮಾತ್ರ ಗಳಿಸಲು ಸಾಧ್ಯವಾಯಿತು. ಇದರಿಂದ ಪಂದ್ಯವು ಟೈ ಆಯಿತು. ತಂಡದ ಪರ ಸರೆಲ್ ಎರ್ವಿ (27) ಹಾಗೂ ಜೆಪಿ ಡುಮಿನಿ (25) ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ವಿಂಡೀಸ್ ಪರ ಶೆಲ್ಡನ್ ಕಾಟ್ರೆಲ್ ಹಾಗೂ ಫಿಡೆಲ್ ಎಡ್ವರ್ಡ್ಸ್ ತಲಾ ಎರಡು ವಿಕೆಟ್ ಪಡೆದರೆ, ಸುಲೆಮಾನ್ ಬೆನ್ ಒಂದು ವಿಕೆಟ್ ಪಡೆದರು.
ಟೈ ಆದ ಪಂದ್ಯದ ಫಲಿತಾಂಶವನ್ನು ನಿರ್ಧರಿಸಲು ಅಂಪೈರ್ಗಳು ಬೌಲ್-ಔಟ್ ವಿಧಾನವನ್ನು ಆರಿಸಿಕೊಂಡರು. ದಕ್ಷಿಣ ಆಫ್ರಿಕಾ ಆರು ಎಸೆತಗಳಲ್ಲಿ ಎರಡು ಬಾರಿ ಬೋಲ್ಡ್ ಮಾಡಿದರು. ಆದರೆ, ವೆಸ್ಟ್ ಇಂಡೀಸ್ ತಂಡ ಒಂದೇ ಒಂದು ಬೋಲ್ಡ್ ಮಾಡಲು ಕೂಡ ಸಾಧ್ಯವಾಗಲಿಲ್ಲ. ಇದರಿಂದ ದಕ್ಷಿಣ ಆಫ್ರಿಕಾ ಜಯಭೇರಿ ಬಾರಿಸಿತು.
ಇದೇ ಸಂದರ್ಭದಲ್ಲಿ ಹಲವು ವರ್ಷಗಳ ನಂತರ ವೃತ್ತಿಪರ ಕ್ರಿಕೆಟ್ ಆಡಿದ ದಕ್ಷಿಣ ಆಫ್ರಿಕಾ ದಂತಕಥೆ ಎಬಿ ಡಿವಿಲಿಯರ್ಸ್ ಕೇವಲ 3 ರನ್ ಗಳಿಸುವ ಮೂಲಕ ನಿರಾಸೆ ಮೂಡಿಸಿದರು. (ಏಜೆನ್ಸೀಸ್)