ಕುಸ್ತಿ ಪಂದ್ಯಾವಳಿಯಿಂದ ವಿನೇಶ್ ಪೊಗಾಟ್ ಬ್ಯಾನ್
- ಕುಸ್ತಿ ಪಂದ್ಯಾವಳಿಯಿಂದ ವಿನೇಶ್ ಪೊಗಾಟ್ ಬ್ಯಾನ್
- ಜೂನ್ 2026 ರ ವರೆಗೆ ದೇಶೀಯ ಟೂರ್ನಾಮೆಂಟ್ನಲ್ಲಿ ಭಾಗವಹಿಸುವಂತಿಲ್ಲ
- ನಿಯಮ ಬಾಹಿರ ಹಾಗೂ ಆಂಟಿ ಡೋಪಿಂಗ್ ಪರೀಕ್ಷೆಗೆ ಗೈರಾದ ಹಿನ್ನಲೆ ಈ ನಿರ್ಧಾರ
ಉತ್ತರ ಪ್ರದೇಶ: ಮೇ.10 ರಿಂದ 12 ರ ವರೆಗೆ ಉತ್ತರ ಪ್ರದೇಶದ ಗೊಂಡಾದಲ್ಲಿ ನಡೆಯಲಿರುವ ನ್ಯಾಷನಲ್ ಓಪನ್ ರ್ಯಾಕಿಂಗ್ ಟೂರ್ನಾಮೆಂಟ್ನಲ್ಲಿ ಭಾರತದ ಖ್ಯಾತ ಕುಸ್ತಿಪಟು ವಿನೇಶ್ ಪೊಗಾಟ್ (Vinesh Phogat Ban) ಭಾಗವಹಿಸಲು ಭಾರತೀಯ ಕುಸ್ತಿ ಒಕ್ಕೂಟ (WFI) ನಿಷೇಧಿಸಿದೆ.
ಕುಸ್ತಿ ಪಂದ್ಯಾವಳಿಯಲ್ಲಿ ಅಶಿಸ್ತು ಹಾಗೂ ಆಂಟಿ ಡೋಪಿಂಗ್ ಪರೀಕ್ಷೆಗೆ ಗೈರಾಗಿರುವ ಕಾರಣ ಜೂನ್ 26, 2026 ರ ವರೆಗೆ ವಿನೇಶ್ ಪೊಗಾಟ್ ದೇಶಿಯ ಪಂದ್ಯಾವಳಿಯಲ್ಲಿ ಭಾಗವಿಸುವಂತಿಲ್ಲ ಎಂದು ಕುಸ್ತಿ ಒಕ್ಕೂಟ ಶೋ-ಕಾಸ್ ನೋಟಿಸ್ ಜಾರಿ ಮಾಡಿದೆ.
2024 ರ ಪ್ಯಾರಿಸ್ ಒಲಂಪಿಕ್ಸ್ನಲ್ಲಿ ತನ್ನ ಹೆಚ್ಚಿನ ತೂಕದ ಕಾರಣ ಫೈನಲ್ ಪಂದ್ಯಾವಳಿಯಲ್ಲಿ ಹೊರಬಿದ್ದು, ದೇಶದ ಅವಮಾನಕ್ಕೆ ಕಾರಣವಾಗಿದ್ದಾರೆ. ನಂತರ ತಾನು ಕುಸ್ತಿಯಲ್ಲಿ ಮುಂದುವರಿಯುವುದಿಲ್ಲ ಎಂಬ ಹೇಳಿಕೆ ಸಹ ನೀಡಿದ್ದು, ಈಗ ಮತ್ತೆ ಕುಸ್ತಿಯಲ್ಲಿ ಸಕ್ರೀಯರಾಗಲು ಬಯಸುತ್ತಿದ್ದಾರೆ.
ಆದರೆ ಇವರು ಕುಸ್ತಿ ಒಕ್ಕೂಟದ ಯಾವುದೇ ನಿಯಮಗಳನ್ನು ಪಾಲಿಸದ ಹಿನ್ನಲೆಯಲ್ಲಿ ವಿನೇಶ್ ಅವರನ್ನು ಪಂದ್ಯಾವಳಿಗಳಿಂದ ನಿಷೇಧಿಸಲಾಗಿದೆ ಎಂದು ಭಾರತೀಯ ಕುಸ್ತಿ ಒಕ್ಕೂಟ ತಾನು ನೀಡಿರುವ ನೋಟಿಸ್ನಲ್ಲಿ ತಿಳಿಸಿದೆ. ಗೊಂಡಾದಲ್ಲಿ ನಡೆಯಲಿರುವ ಕುಸ್ತಿ ಪಂದ್ಯಾವಳಿ ಮೂಲಕ ಮತ್ತೆ ಮುನ್ನಲೆಗೆ ಬರುವ ತವಕದಲ್ಲಿದ್ದ ವಿನೇಶ್ಗೆ ಇದು ದೊಡ್ಡ ಪೆಟ್ಟಾಗಿದ್ದು, ಈ ನೋಟಿಸ್ಗೆ ಪೊಗಾಟ್ 14 ದಿನಗಳಲ್ಲಿ ಉತ್ತರಿಸಬೇಕಾಗಿದೆ.
ವಿನೇಶ್ ಮತ್ತು ಒಕ್ಕೂಟದ ನಡುವೆ ಹಗ್ಗ ಜಗ್ಗಾಟ!
2024 ರ ಪ್ಯಾರಿಸ್ ಒಲಂಪಿಕ್ನಲ್ಲಿ ನಡೆದ ಘಟನೆ ಬಳಿಕ ವಿನೇಶ್ ಪೊಗಾಟ್ ಹಾಗೂ ಕುಸ್ತಿ ಒಕ್ಕೂಟದ ನಡುವೆ ಹಗ್ಗ ಜಗ್ಗಾಟ ನಡೆಯುತ್ತಲೇ ಇದೆ. ನನಗೆ ಯಾವುದೇ ಒಂದು ಉತ್ತಮ ಪಂದ್ಯಾವಳಿ ಮೂಲಕ ಮರು ಪ್ರವೇಶ ಮಾಡಲು ಒಕ್ಕೂಟ ಬಿಡುತ್ತಿಲ್ಲ ಎನ್ನುವುದು ವಿನೇಶ್ ಅವರ ವಾದವಾಗಿದೆ.
ಆದರೆ ವಿನೇಶ್ ಯಾವುದೇ ನಿಯಮಗಳನ್ನು ಪಾಲಿಸುತ್ತಿಲ್ಲ. ಅವಳು ಅಭ್ಯಾಸ ಪಂದ್ಯಗಳಲ್ಲಿ ಭಾಗವಹಿಸದೆ, ನೇರವಾಗಿ ಪಂದ್ಯಾವಳಿಗೆ ಭಾಗವಹಿಸುವುದಾಗಿ ಹೇಳುತ್ತಾಳೆ. ಆಂಟಿ ಡೋಪಿಂಗ್ ಪರೀಕ್ಷೆಗೆ ಸಹ ಸರಿಯಾಗಿ ಹಾಜರಾಗುವುದಿಲ್ಲ. ಒಬ್ಬ ಆಟಗಾರ್ತಿ ಸಲುವಾಗಿ ಒಕ್ಕೂಟದ ನಿಯಮ ಬದಲಾಗುವುದಿಲ್ಲ ಎನ್ನುವುದು ಒಕ್ಕೂಟದ ವಾದವಾಗಿದೆ, (ಏಜನ್ಸೀಸ್).