ನಾಗ್ಪುರ: ದೇಶೀಯ ಕ್ರಿಕೆಟ್ ಋತುವಿನಲ್ಲಿ ಕನಸಿನ ಓಟವನ್ನು ವಿಸ್ತರಿಸಿರುವ ಆತಿಥೇಯ ವಿದರ್ಭ ತಂಡ ಪ್ರತಿಷ್ಠಿತ ರಣಜಿ ಟ್ರೋಫಿ 90ನೇ ಆವೃತ್ತಿಯಲ್ಲಿ ಅಜೇಯವಾಗಿ ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಇದರೊಂದಿಗೆ ದೇಶೀಯ ಕ್ರಿಕೆಟ್ನಲ್ಲಿ ಮೂರನೇ ಬಾರಿ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿದೆ. ಜಾಮ್ತಾದ ವಿಸಿಎ ಕ್ರೀಡಾಂಗಣದಲ್ಲಿ ಭಾನುವಾರ ಮುಕ್ತಾಯಗೊಂಡ ಫೈನಲ್ನಲ್ಲಿ ವಿದರ್ಭ ಹಾಗೂ ಕೇರಳ ತಂಡಗಳು ಡ್ರಾಗೆ ಸಮಾಧಾನ ಕಂಡವು. ಮೊದಲ ಇನಿಂಗ್ಸ್ನಲ್ಲಿ ಸಾಧಿಸಿದ 37 ರನ್ಗಳ ಅಮೂಲ್ಯ ಮುನ್ನಡೆ ಆಧಾರದಲ್ಲಿ ಅಕ್ಷಯ್ ವಾಡ್ಕರ್ ಸಾರಥ್ಯದ ವಿದರ್ಭ ತಂಡ 2018-19ರ ಬಳಿಕ ಮತ್ತೊಮ್ಮೆ ಪ್ರಶಸ್ತಿ ಎತ್ತಿ ಹಿಡಿಯಿತು. ಜತೆಗೆ ಕಳೆದ ಬಾರಿ ಕೈತಪ್ಪಿದ ಕಿರೀಟವನ್ನು ಈ ಬಾರಿ ತವರಿನ ಅಂಗಣದಲ್ಲಿ ಒಲಿಸಿಕೊಳ್ಳುವಲ್ಲಿ ಸಫಲವಾಯಿತು. ಈ ಮೂಲಕ 2024-25ರ ದೇಶೀಯ ಕ್ರಿಕೆಟ್ ಋತುವಿಗೆ ತೆರೆ ಬಿದ್ದಿದೆ. ಇನ್ನು ಎಲ್ಲ ದೇಶೀಯ ಆಟಗಾರರು ಐಪಿಎಲ್ 18ನೇ ಆವೃತ್ತಿಯ ಸಿದ್ಧತೆಯಲ್ಲಿ ತೊಡಗಿಕೊಳ್ಳಲಿದ್ದಾರೆ.
ಪಂದ್ಯದ ಐದನೇ ಹಾಗೂ ಅಂತಿಮ ದಿನ 4 ವಿಕೆಟ್ಗೆ 249 ರನ್ಗಳಿಂದ ಎರಡನೇ ಇನಿಂಗ್ಸ್ ಮುಂದುವರಿಸಿದ ವಿದರ್ಭ, ಶತಕ ಸಾಧಕ ಕನ್ನಡಿಗ ಕರುಣ್ ನಾಯರ್ (135) ವಿಕೆಟ್ ಬೇಗನೆ ಕಳೆದುಕೊಂಡಿತು. ನಂತರ ಕೆಳ ಕ್ರಮಾಂಕದಲ್ಲಿ ದರ್ಶನ್ ನಲ್ಕಂಡೆ (51* ರನ್, 98 ಎಸೆತ, 3 ಬೌಂಡರಿ, 1 ಸಿಕ್ಸರ್) ಅರ್ಧಶತಕದ ನೆರವಿನಿಂದ ಚಹಾ ವಿರಾಮಕ್ಕೆ 143.5 ಓವರ್ಗಳಲ್ಲಿ 9 ವಿಕೆಟ್ಗೆ 375 ರನ್ಗಳಿಸಿತು. ಒಟ್ಟಾರೆ 412 ರನ್ಗಳ ಮುನ್ನಡೆಯೊಂದಿಗೆ ವಿದರ್ಭ ಡಿಕ್ಲೇರ್ ಮಾಡಿಕೊಂಡಿತು. ಆಗ ಉಭಯ ತಂಡಗಳ ಆಟಗಾರರ ಹಸ್ತಲಾವದೊಂದಿಗೆ ಪಂದ್ಯ ಡ್ರಾನಲ್ಲಿ ಕೊನೆಗೊಂಡಿತು. ಇದರೊಂದಿಗೆ ಕೇರಳ ತಂಡದ ಚೊಚ್ಚಲ ಟ್ರೋಫಿ ಕನಸು ಅಧಿಕೃತವಾಗಿ ಭಗ್ನಗೊಂಡಿತು.
ವಿದರ್ಭ ಪಾಲಿಗೆ ಮೂರನೇ ರಣಜಿ ಟ್ರೋಫಿ ಕಿರೀಟ ಇದಾಗಿದೆ. ಇದಕ್ಕೂ ಮುನ್ನ 2017-18 ಹಾಗೂ 2018-19ರ ಆವೃತ್ತಿಯಲ್ಲಿ ಚಾಂಪಿಯನ್ ಎನಿಸಿದರೆ, 2023-24ರಲ್ಲಿ ರನ್ನರ್ ಅಪ್ಗೆ ತೃಪ್ತಿಪಟ್ಟಿತು. ವಿದರ್ಭ ತಂಡ ಹಾಲಿ ಟೂರ್ನಿಯಲ್ಲಿ ಆಡಿದ 10 ಪಂದ್ಯಗಳ ಪೈಕಿ 8ರಲ್ಲಿ ಗೆಲುವು ದಾಖಲಿಸಿದ್ದು, 2ರಲ್ಲಿ ಮೊದಲ ಇನಿಂಗ್ಸ್ ಮುನ್ನಡೆಯೊಂದಿಗೆ ಡ್ರಾ ಸಾಧಿಸಿದೆ.
ವಿದರ್ಭ: 379 ಹಾಗೂ 143.5 ಓವರ್ಗಳಲ್ಲಿ 9 ವಿಕೆಟ್ಗೆ 375 (ಕರುಣ್ 132, ಅಕ್ಷಯ್ 25, ಹರ್ಷ್ 4, ಅಕ್ಷಯ್ ಕೆ.30, ದರ್ಶನ್ 51, ಆದಿತ್ಯ ಸರ್ವಟೆ 96ಕ್ಕೆ 4). ಕೇರಳ: 125 ಓವರ್ಗಳಲ್ಲಿ 342.
ಪಂದ್ಯಶ್ರೇಷ್ಠ: ದಾನಿಶ್ ಮಾಲೇವಾರ್, ಸರಣಿಶ್ರೇಷ್ಠ: ಹರ್ಷ್ ದುಬೆ (472 ರನ್, 69 ವಿಕೆಟ್).
ಟೂರ್ನಿಯ ಗರಿಷ್ಠ ರನ್ ಸ್ಕೋರರ್: ಯಶ್ ರಾಥೋಡ್ (960 ರನ್). ಗರಿಷ್ಠ ವಿಕೆಟ್: ಹರ್ಷ್ ದುಬೆ (69 ವಿಕೆಟ್).