ಲಾಡೆರ್ಹಿಲ್: ಮುಂದಿನ ವರ್ಷ ವೆಸ್ಟ್ ಇಂಡೀಸ್&ಅಮೆರಿಕದ ಆತಿಥ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್ಗೆ ಸಿದ್ಧತೆ ದೃಷ್ಟಿಯಿಂದ ಮಹತ್ವದ್ದೆನಿಸಿದ ಸರಣಿಯಲ್ಲಿ ಭಾರತ ತಂಡ ಸೋಲು ಅನುಭವಿಸಿತು. ಆದರೆ ಕ್ರಿಕೆಟ್ ಪ್ರೇಮಿಗಳಿಗೆ, ಭಾರತ ಟಿ20 ತಂಡದ ನಾಯಕ ಹಾರ್ದಿಕ್ ಪಾಂಡ್ಯ ಈ ಸೋಲಿನ ಬಳಿಕ ಹೇಳಿರುವ ಮಾತು ಇದಕ್ಕಿಂತ ಬೇಸರ ತಂದಿದೆ.
"ಕೆಲವೊಮ್ಮೆ ಸೋಲು ಒಳ್ಳೆಯದೇ ಆಗಿರುತ್ತದೆ. ಇದರಿಂದ ಸಾಕಷ್ಟು ಕಲಿಯಲು ಸಿಗುತ್ತದೆ. ಒಂದು ಸರಣಿ ಸೋಲಿನಿಂದ ಏನೂ ಆಗುವುದಿಲ್ಲ. ಗುರಿಯತ್ತ ನಮ್ಮ ಬದ್ಧತೆ ಮುಖ್ಯ. ಸೋಲು&ಗೆಲುವು ಇದರ ಭಾಗವಾಗಿರುತ್ತದೆ. ಇದರಿಂದ ನಾವು ಕಲಿತುಕೊಳ್ಳುವುದೇ ಮುಖ್ಯವಾದುದು' ಎಂದು ಹಾರ್ದಿಕ್ ಪಾಂಡ್ಯ ಸರಣಿ ಸೋಲಿನ ಬಳಿಕ ಹೇಳಿದರು. ಆದರೆ ಹಾರ್ದಿಕ್ ಪಾಂಡ್ಯ ಸೋಲನ್ನು ಈ ರೀತಿಯಾಗಿ ಒಪ್ಪಿಕೊಂಡಿರುವುದು ಅಭಿಮಾನಿಗಳ ಸಿಟ್ಟಿಗೆ ಕಾರಣವಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕ ಟೀಕೆಗಳು ವ್ಯಕ್ತವಾಗಿವೆ.
"ಭಾರತ ತಂಡ ಮೊದಲ 10 ಓವರ್ಗಳ ಬಳಿಕ ಲಯ ಕಳೆದುಕೊಂಡಿತು. ನಾನು ಕ್ರೀಸ್ಗೆ ಇಳಿದಾಗ ಸರಾಗವಾಗಿ ರನ್ ಗಳಿಸಲು ಸಾಧ್ಯವಾಗಲಿಲ್ಲ. ನಾನು ಸಮಯ ತೆಗೆದುಕೊಂಡೆ ಮತ್ತು ಸರಿಯಾಗಿ ಫಿನಿಶ್ ಕೂಡ ಮಾಡಲಾಗಲಿಲ್ಲ' ಎಂದು ಹಾರ್ದಿಕ್ ಪಾಂಡ್ಯ ಸೋಲಿಗೆ ತನ್ನನ್ನೂ ದೂರಿಕೊಂಡರು. ಒಂದೆಡೆ ಸೂರ್ಯಕುಮಾರ್ ಬಿರುಸಿನ ಆಟವಾಡುತ್ತಿದ್ದ ನಡುವೆ ಹಾರ್ದಿಕ್ 18 ಎಸೆತಗಳಲ್ಲಿ 14 ರನ್ ಗಳಿಸಿ ನಿರಾಸೆ ಮೂಡಿಸಿದರು.