ಕರಾಚಿ: ಸೆಮಿಫೈನಲ್ ಪ್ರವೇಶಿಸುವ ಸನಿಹದಲ್ಲಿರುವ ದಕ್ಷಿಣ ಆಫ್ರಿಕಾ ಮತ್ತು ಈಗಾಗಲೆ ಸೆಮಿಫೈನಲ್ ರೇಸ್ನಿಂದ ಹೊರಬಿದ್ದಿರುವ ಇಂಗ್ಲೆಂಡ್ ತಂಡಗಳು ಐಸಿಸಿ ಚಾಂಪಿಯನ್ಸ್ ಟ್ರೋಫಿ 9ನೇ ಆವೃತ್ತಿಯಲ್ಲಿ ಶನಿವಾರ ಮುಖಾಮುಖಿ ಆಗಲಿವೆ. ಬಿ ಗುಂಪಿನ ಈ ಕೊನೇ ಲೀಗ್ ಪಂದ್ಯದಲ್ಲಿ ಗುಂಪಿನ ಅಗ್ರಸ್ಥಾನಿಯ ನಿರ್ಧಾರವೂ ಆಗಲಿದೆ.
ಎ ಗುಂಪಿನಲ್ಲಿ ಭಾರತ, ನ್ಯೂಜಿಲೆಂಡ್ ತಂಡಗಳು ಸತತ 2 ಜಯದೊಂದಿಗೆ ಸುಲಭವಾಗಿ ಸೆಮಿಫೈನಲ್ ಸ್ಥಾನವನ್ನು ಒಲಿಸಿಕೊಂಡರೆ, ಬಿ ಗುಂಪಿನಲ್ಲಿ ಕೊನೇ ಲೀಗ್ ಪಂದ್ಯದವರೆಗೂ ಸೆಮಿಫೈನಲಿಸ್ಟ್ ತಂಡಗಳ ಕುತೂಹಲ ಉಳಿದುಕೊಂಡಿದೆ. ಆದರೆ ದ. ಆಫ್ರಿಕಾಕ್ಕೆ ಸೋತರೂ ಸೆಮಿಫೈನಲ್ಗೇರುವ ಅವಕಾಶವಿರುವುದರಿಂದ ಒತ್ತಡ ರಹಿತವಾಗಿ ಆಡಬಹುದಾಗಿದೆ.
ಇಂಗ್ಲೆಂಡ್ 300 ರನ್ ಗಳಿಸಿದರೆ, ದ. ಆಫ್ರಿಕಾ ಕನಿಷ್ಠ 97 ರನ್ ಗಳಿಸಿದರೂ ಸೆಮೀಸ್ ಪ್ರವೇಶಿಸಲಿದೆ. ದಣ ಆಫ್ರಿಕಾ 207 ರನ್ಗಳಿಂದ ಸೋತರಷ್ಟೇ ಟೂರ್ನಿಯಿಂದ ಹೊರಬೀಳಲಿದೆ. ಒಂದು ವೇಳೆ ದ. ಆಫ್ರಿಕಾ ಮೊದಲು ಬ್ಯಾಟಿಂಗ್ಗೆ ಇಳಿದು 300 ರನ್ ಪೇರಿಸಿದರೆ, ಇಂಗ್ಲೆಂಡ್ 11.1 ಓವರ್ಗಳಲ್ಲೇ ಅದನ್ನು ಚೇಸಿಂಗ್ ಮಾಡಿ ಗೆದ್ದರಷ್ಟೇ ದ. ಆಫ್ರಿಕಾ ಹೊರಬೀಳಲಿದೆ. ಹೀಗಾಗಿ ಈ ಲೆಕ್ಕಾಚಾರದ ಅನ್ವಯ ದ. ಆಫ್ರಿಕಾ ಸೆಮೀಸ್ ಪ್ರವೇಶ ಅಧಿಕೃತ ಆಗುವುದಷ್ಟೇ ಬಾಕಿ ಇದೆ ಎನ್ನಬಹುದು. ದ. ಆಫ್ರಿಕಾ ಈ ಪಂದ್ಯ ಗೆದ್ದರೆ ಬಿ ಗುಂಪಿನ ಅಗ್ರಸ್ಥಾನಿಯಾಗಿ ಸೆಮೀಸ್ ಪ್ರವೇಶಿಸಲಿದೆ. ದ. ಆಫ್ರಿಕಾ ಸೋತರೆ ಆಸೀಸ್ ಬಿ ಗುಂಪಿನ ಅಗ್ರಸ್ಥಾನ ಉಳಿಸಿಕೊಳ್ಳಲಿದೆ.
ದ. ಆಫ್ರಿಕಾ ತಂಡ ಟೂರ್ನಿಯ ತನ್ನ ಮೊದಲ ಪಂದ್ಯದಲ್ಲಿ ಅಫ್ಘಾನಿಸ್ತಾನ ಎದುರು ಭರ್ಜರಿ ಗೆಲುವು ದಾಖಲಿಸಿತ್ತು. ಇದರಿಂದ ಉತ್ತಮ ರನ್ರೇಟ್ ಕೂಡ ಪಡೆದುಕೊಂಡಿತ್ತು. ಹೀಗಾಗಿ ಆಸ್ಟ್ರೆಲಿಯಾ ವಿರುದ್ಧದ ಪಂದ್ಯ ಮಳೆಯಿಂದಾಗಿ ಒಂದೂ ಎಸೆತವಿಲ್ಲದೆ ರದ್ದುಗೊಂಡಿರುವುದೂ, ಹರಿಣಗಳಿಗೆ ಇದು ಅನುಕೂಲಕರವೇ ಆಗಿದೆ.
ಮತ್ತೊಂದೆಡೆ ಟೂರ್ನಿಯ ಮೊದಲ ಪಂದ್ಯದಲ್ಲಿ ಆಸ್ಟ್ರೆಲಿಯಾ ಎದುರು 350ಕ್ಕೂ ಅಧಿಕ ಮೊತ್ತ ಪೇರಿಸಿ ಸೋತಿದ್ದ ಇಂಗ್ಲೆಂಡ್, ಅಫ್ಘಾನಿಸ್ತಾನ ವಿರುದ್ಧ 326 ರನ್ಗಳ ಬೃಹತ್ ಮೊತ್ತದ ಚೇಸಿಂಗ್ನಲ್ಲಿ ಎಡವಿತ್ತು. ಇದರಿಂದಾಗಿ ಉಪಖಂಡದ ಐಸಿಸಿ ಟೂರ್ನಿಯಲ್ಲಿ ಆಂಗ್ಲರ ನಿರಾಶಾದಾಯಕ ನಿರ್ವಹಣೆ ಮುಂದುವರಿದಿದೆ.
ದ. ಆಫ್ರಿಕಾ ತಂಡದ ಬ್ಯಾಟರ್ಗಳಾದ ರ್ಯಾನ್ ರಿಕೆಲ್ಟನ್, ನಾಯಕ ಟೆಂಬಾ ಬವುಮಾ, ವಾನ್ ಡರ್ ಡುಸೆನ್, ಏಡನ್ ಮಾರ್ಕ್ರಮ್ರಂಥ ಪ್ರಮುಖ ಬ್ಯಾಟರ್ಗಳು ಭರ್ಜರಿ ಫಾರ್ಮ್ನಲ್ಲಿದ್ದಾರೆ. ಫಿಟ್ನೆಸ್ ಸಮಸ್ಯೆಯಿಂದಾಗಿ ಮೊದಲ ಪಂದ್ಯ ತಪ್ಪಿಸಿಕೊಂಡಿದ್ದ ಸ್ಫೋಟಕ ಬ್ಯಾಟರ್ ಹೆನ್ರಿಕ್ ಕ್ಲಾಸೆನ್ ಈ ಬಾರಿ ಕಣಕ್ಕಿಳಿಯುವ ನಿರೀಕ್ಷೆ ಇದ್ದು, ಹರಿಣಗಳಿಗೆ ಇನ್ನಷ್ಟು ಹೆಚ್ಚಿನ ಬಲ ಸಿಗಲಿದೆ.
ಆಂಗ್ಲರಿಗೆ ಫಾರ್ಮ್ ಚಿಂತೆ
ಪ್ರಮುಖ ಬ್ಯಾಟರ್-ಬೌಲರ್ಗಳು ಲಯದಲ್ಲಿ ಇರದಿರುವುದು ಆಂಗ್ಲರ ಪಾಲಿ ಟೂರ್ನಿಯಲ್ಲಿ ಪ್ರಮುಖ ಹಿನ್ನಡೆ ಎನಿಸಿದೆ. ಕಳೆದ ಭಾರತ ಪ್ರವಾಸದಿಂದಲೇ ಇಂಗ್ಲೆಂಡ್ ಆಟಗಾರರು ಉತ್ತಮ ಫಾರ್ಮ್ನಲ್ಲಿ ಕಾಣಿಸಿಕೊಂಡಿಲ್ಲ. ಭಾರತದಲ್ಲಿ ನಡೆದ ಏಕದಿನ ಸರಣಿಯಲ್ಲಿ 0&3ರಿಂದ ವೈಟ್ವಾಷ್ ಎದುರಿಸಿದ್ದು, ಆಂಗ್ಲರಿಗೆ ಟೂರ್ನಿಗೆ ಮೊದಲೇ ಅಪಾಯದ ಎಚ್ಚರಿಕೆ ಗಂಟೆ ರವಾನಿಸಿತ್ತು. ಮೊದಲ ಪಂದ್ಯದಲ್ಲಿ ಬೆನ್ ಡಕೆಟ್, 2ನೇ ಪಂದ್ಯದಲ್ಲಿ ಜೋ ರೂಟ್ ಏಕಾಂಗಿ ಹೋರಾಟ ಗೆಲುವು ತಂದುಕೊಡಲಿಲ್ಲ.
ಇಂಗ್ಲೆಂಡ್ಗೆ ಉಪಖಂಡದ ಕಂಟಕ
ಇಂಗ್ಲೆಂಡ್ ತಂಡ ಉಪಖಂಡದ ಐಸಿಸಿ ಟೂರ್ನಿಗಳನ್ನು ಗಂಭೀರವಾಗಿ ತೆಗೆದುಕೊಳ್ಳದೆ ಇರುವುದು ಮತ್ತು ಉಪಖಂಡದ ವಾತಾವರಣಕ್ಕೆ ತಕ್ಕಂತೆ ಕಾರ್ಯತಂತ್ರಗಳನ್ನು ರೂಪಿಸದೆ ಇರುವುದು ದೊಡ್ಡ ಹಿನ್ನಡೆ ಎನಿಸಿದೆ. 2021ರಲ್ಲಿ ಯುಎಇಯಲ್ಲಿ ನಡೆದ ಟಿ20 ವಿಶ್ವಕಪ್ನಲ್ಲಿ ಸೆಮೀಸ್ನಲ್ಲಿ ಎಡವಿದ್ದ ಇಂಗ್ಲೆಂಡ್, ಭಾರತದಲ್ಲಿ ನಡೆದ 2023ರ ಏಕದಿನ ವಿಶ್ವಕಪ್ನಲ್ಲಿ ಲೀಗ್ ಹಂತದಲ್ಲೇ ನಿರ್ಗಮಿಸಿತ್ತು. ಇದೀಗ ಪಾಕಿಸ್ತಾನ ಆತಿಥ್ಯದಲ್ಲೂ ಇಂಗ್ಲೆಂಡ್ ಎರಡೇ ಪಂದ್ಯಗಳಲ್ಲಿ ಪ್ರಶಸ್ತಿ ರೇಸ್ನಿಂದ ಹೊರಬಿದ್ದಿದೆ.
ಮುಖಾಮುಖಿ: 70
ಇಂಗ್ಲೆಂಡ್: 30
ದ. ಆಫ್ರಿಕಾ: 34
ಟೈ: 1
ರದ್ದು: 5
*ಆರಂಭ: ಮಧ್ಯಾಹ್ನ 2.30
*ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಹಾಟ್ಸ್ಟಾರ್.