ಅಹಮದಾಬಾದ್: ಸತತ ಎರಡು ಜಯದೊಂದಿಗೆ ಸರಣಿ ವಶಪಡಿಸಿಕೊಂಡಿರುವ ಟೀಮ್ ಇಂಡಿಯಾ, ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಬುಧವಾರ ನಡೆಯಲಿರುವ ಪ್ರವಾಸಿ ಇಂಗ್ಲೆಂಡ್ ವಿರುದ್ಧದ 3ನೇ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲೂ ಗೆದ್ದು ಕ್ಲೀನ್ಸ್ವೀಪ್ ಸಾಧಿಸುವ ತವಕದಲ್ಲಿದೆ. ಐಸಿಸಿ ಚಾಂಪಿಯನ್ಸ್ ಟ್ರೋಫಿಗೆ ಮುನ್ನ ಆಡಲಿರುವ ಕೊನೇ ಪಂದ್ಯವನ್ನು ರೋಹಿತ್ ಶರ್ಮ ಬಳಗ ಅಭ್ಯಾಸ ಮತ್ತು ತಂಡ ಸಂಯೋಜನೆ ಅಂತಿಮಗೊಳಿಸಲು ಬಳಸಿಕೊಳ್ಳುವ ನಿರೀಕ್ಷೆ ಇದೆ.
2023ರ ತವರಿ ಏಕದಿನ ವಿಶ್ವಕಪ್ನಲ್ಲಿ ಫೈನಲ್ ಪಂದ್ಯದ ಸೋಲಿನ ಬಳಿಕ ಭಾರತ ತಂಡ ವಿಶ್ವದ ಅತಿದೊಡ್ಡ ಕ್ರಿಕೆಟ್ ಕ್ರೀಡಾಂಗಣವೆನಿಸಿದ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಮೊದಲ ಪಂದ್ಯ ಆಡಲಿದ್ದು, ಆಗಿನ ಕಹಿ ಅನುಭವವನ್ನು ಮರೆಸುವ ಹಂಬಲದಲ್ಲಿದೆ. ನಾಯಕ ರೋಹಿತ್ ಶರ್ಮ ಬ್ಯಾಟಿಂಗ್ನಲ್ಲಿ ಲಯಕ್ಕೆ ಮರಳಿರುವುದು ಭಾರತ ತಂಡವನ್ನು ತುಸು ನಿರಾಳಗೊಳಿಸಿದೆ. ಜತೆಗೆ 37 ವರ್ಷದ ರೋಹಿತ್ ಈ ಬಾರಿ ಇನ್ನಷ್ಟು ಆತ್ಮವಿಶ್ವಾಸದೊಂದಿಗೆ ಕಣಕ್ಕಿಳಿಯುವ ನಿರೀಕ್ಷೆ ಇದೆ.
ಜೋಸ್ ಬಟ್ಲರ್ ಬಳಗ ಏಕದಿನ ಸರಣಿಯಲ್ಲಿ ಭಾರತಕ್ಕೆ ನಿರೀತ ಪ್ರತಿಸ್ಪರ್ಧೆ ನೀಡಲು ಶಕ್ತವಾಗಿಲ್ಲ. ಬ್ಯಾಟರ್ಗಳು ಉತ್ತಮ ಆರಂಭ ಕಂಡರೂ ಅದನ್ನು ದೊಡ್ಡ ಮೊತ್ತವನ್ನಾಗಿ ಪರಿವರ್ತಿಸುವಲ್ಲಿ ವಿಲರಾಗುತ್ತಿರುವುದು ಹಿನ್ನಡೆ ತಂದಿದೆ. ಫಿಲ್ ಸಾಲ್ಟ್, ಬೆನ್ ಡಕೆಟ್, ಹ್ಯಾರಿ ಬ್ರೂಕ್, ಜೋ ರೂಟ್ ಲಯದಲ್ಲಿದ್ದರೂ, ದೊಡ್ಡ ಮೊತ್ತ ಪೇರಿಸಿಲ್ಲ. ಬೌಲಿಂಗ್ನಲ್ಲಿ ಸ್ಪಿನ್ನರ್ ಆದಿಲ್ ರಶೀದ್ ಹೊರತುಪಡಿಸಿ ಇತರ ಬೌಲರ್ಗಳು ಪರಿಣಾಮಕಾರಿ ಎನಿಸಿಲ್ಲ.
ಟೀಮ್ ನ್ಯೂಸ್:
ಭಾರತ: ಚಾಂಪಿಯನ್ಸ್ ಟ್ರೋಫಿಗೆ ಮುನ್ನ ಭಾರತಕ್ಕೆ ಯಾವುದೇ ಅಭ್ಯಾಸ ಪಂದ್ಯ ನಿಗದಿಯಾಗಿಲ್ಲ. ಹೀಗಾಗಿ ಭಾರತ ಇದನ್ನೇ ಅಭ್ಯಾಸ ಪಂದ್ಯವನ್ನಾಗಿ ಬಳಸಿಕೊಳ್ಳಲು ಮುಂದಾದರೆ, ರಿಷಭ್ ಪಂತ್ ಮತ್ತು ಅರ್ಷದೀಪ್ ಸಿಂಗ್ಗೆ ಚಾಂಪಿಯನ್ಸ್ ಟ್ರೋಫಿಗೆ ಮುನ್ನ ಒಂದು ಪಂದ್ಯ ಆಡುವ ಅವಕಾಶ ಕಲ್ಪಿಸಬಹುದು. ಜತೆಗೆ ಸರಣಿಯ ಮೊದಲ ಪಂದ್ಯದ ಬಳಿಕ ಕುಲದೀಪ್ ಯಾದವ್ ಕೂಡ ಮತ್ತೊಮ್ಮೆ ಮರಳಿ ಕಣಕ್ಕಿಳಿಯಬಹುದು. ಆಗ ಕೆಎಲ್ ರಾಹುಲ್, ಹರ್ಷಿತ್ ರಾಣಾ ಮತ್ತು ವರುಣ್ ಚಕ್ರವರ್ತಿ ಹೊರಗುಳಿಯಬೇಕಾಗುತ್ತದೆ.
ಇಂಗ್ಲೆಂಡ್: ಕಳೆದ ಪಂದ್ಯದಲ್ಲಿ ವಿಶ್ರಾಂತಿ ಪಡೆದಿದ್ದ ಆಲ್ರೌಂಡರ್ ಬೆಡನ್ ಕರ್ಸ್ ಮತ್ತು ವೇಗಿ ಜೋ್ರಾ ಆರ್ಚರ್ ಈ ಬಾರಿ ಮರಳಿ ಕಣಕ್ಕಿಳಿಯುವ ನಿರೀಕ್ಷೆ ಇದೆ. ಗಾಯದಿಂದಾಗಿ ಹೊರಬಿದ್ದಿರುವ ಜೇಕಬ್ ಬೆಥೆಲ್ ಬದಲಿಗೆ ಬುಲಾವ್ ಪಡೆದಿರುವ ಬ್ಯಾಟರ್ ಟಾಮ್ ಬ್ಯಾಂಟನ್ ಬರೋಬ್ಬರಿ 4 ವರ್ಷಗಳ ಬಳಿಕ ಏಕದಿನ ಕ್ರಿಕೆಟ್ನಲ್ಲಿ ಆಗಿ ಮರಳಿ ಕಣಕ್ಕಿಯಲಿದ್ದಾರೆ. ಇದರಿಂದ ತಂಡದ ಬ್ಯಾಟಿಂಗ್ ಕ್ರಮಾಂಕದಲ್ಲೂ ಸ್ವಲ್ಪ ಬದಲಾವಣೆಯಾಗುವ ಸಾಧ್ಯತೆ ಇದೆ.
*ಆರಂಭ: ಮಧ್ಯಾಹ್ನ 1.30
*ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಡಿಸ್ನಿ+ಹಾಟ್ಸ್ಟಾರ್.
ರೋಹಿತ್ ನಂತರ ಕೊಹ್ಲಿ ಸರದಿ?
ಕಟಕ್ನಲ್ಲಿ ಬಿರುಸಿನ ಶತಕ ಸಿಡಿಸುವ ಮೂಲಕ ನಾಯಕ ರೋಹಿತ್ ಶರ್ಮ ಭರ್ಜರಿ ಲಯಕ್ಕೆ ಮರಳಿದ್ದಾರೆ ಮತ್ತು ತಮ್ಮ ಟೀಕಾಕಾರರ ಬಾಯಿಯನ್ನೂ ಮುಚ್ಚಿಸಿದ್ದಾರೆ. ಇದೀಗ ಮತ್ತೋರ್ವ ಅನುಭವಿ ಮತ್ತು ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಕೂಡ ಫಾರ್ಮ್ಗೆ ಮರಳಬೇಕಾದ ಸವಾಲು ಎದುರಿಸುತ್ತಿದ್ದಾರೆ. ಚಾಂಪಿಯನ್ಸ್ ಟ್ರೋಫಿಗೆ ಮುನ್ನ ಭಾರತ ತಂಡ ಆಡಲಿರುವ ಕೊನೇ ಪಂದ್ಯದಲ್ಲಿ ಕೊಹ್ಲಿ ಲಯ ಕಂಡುಕೊಂಡರೆ, ಐಸಿಸಿ ಟೂರ್ನಿಯಲ್ಲಿ ಒತ್ತಡ ರಹಿತವಾಗಿ ಕಣಕ್ಕಿಳಿಯುವ ಅವಕಾಶ ಪಡೆಯಲಿದ್ದಾರೆ. ಮೊಣಕಾಲು ನೋವಿನಿಂದಾಗಿ ಸರಣಿಯ ಮೊದಲ ಪಂದ್ಯ ತಪ್ಪಿಸಿಕೊಂಡಿದ್ದ ಕೊಹ್ಲಿ ಕಟಕ್ನಲ್ಲಿ ನಡೆದ 2ನೇ ಪಂದ್ಯದಲ್ಲಿ ಕೇವಲ 5 ರನ್ಗಳಿಗೆ ಔಟಾಗಿ ನಿರಾಸೆ ಮೂಡಿಸಿದ್ದರು. ಇದಕ್ಕೆ ಮುನ್ನ ರಣಜಿಯಲ್ಲಿ ಆಡಿದ ಏಕೈಕ ಇನಿಂಗ್ಸ್ನಲ್ಲೂ 6 ರನ್ಗಳಿಗೆ ಔಟಾಗಿದ್ದರು. ಇದೀಗ ರೋಹಿತ್ ಲಯಕ್ಕೆ ಮರಳಿದ ಸ್ಫೂರ್ತಿಯಲ್ಲಿ ಕೊಹ್ಲಿ ಕೂಡ ಬ್ಯಾಟಿಂಗ್ ಫಾರ್ಮ್ಗೆ ಮರಳಬೇಕಿದೆ.
*13: ರೋಹಿತ್ ಶರ್ಮ ಇನ್ನು 13 ರನ್ ಗಳಿಸಿದರೆ ಏಕದಿನ ಕ್ರಿಕೆಟ್ನಲ್ಲಿ 11 ಸಾವಿರ ರನ್ ಪೂರೈಸಿದ ವಿಶ್ವದ 10ನೇ ಬ್ಯಾಟರ್ ಮತ್ತು 4ನೇ ಭಾರತೀಯ ಎನಿಸಲಿದ್ದಾರೆ. ತೆಂಡುಲ್ಕರ್, ಕೊಹ್ಲಿ, ಗಂಗೂಲಿ ಹಿಂದಿನ ಸಾಧಕರು.
*89: ವಿರಾಟ್ ಕೊಹ್ಲಿ ಇನ್ನು 89 ರನ್ ಗಳಿಸಿದರೆ ಏಕದಿನ ಕ್ರಿಕೆಟ್ನಲ್ಲಿ 14 ಸಾವಿರ ರನ್ ಪೂರೈಸಿದ ವಿಶ್ವದ 3ನೇ ಬ್ಯಾಟರ್ ಮತ್ತು 2ನೇ ಭಾರತೀಯ ಎನಿಸಲಿದ್ದಾರೆ. ಸಚಿನ್ ತೆಂಡುಲ್ಕರ್ ಮತ್ತು ಕುಮಾರ ಸಂಗಕ್ಕರ ಮೊದಲಿಬ್ಬರು ಸಾಧಕರು.