ಚೆನ್ನೈ: ಟೀಮ್ ಇಂಡಿಯಾ ಸುದೀರ್ಘ ವಿರಾಮದ ಬಳಿಕ ಬಾಂಗ್ಲಾ ವಿರುದ್ಧದ ಟೆಸ್ಟ್ ಸರಣಿಯೊಂದಿಗೆ ಮರಳಿ ಕಣಕ್ಕಿಳಿಯಲಿದೆ. ಬಾಂಗ್ಲಾ ವಿರುದ್ಧ ಗುರುವಾರದಿಂದ ಚೆನ್ನೈನಲ್ಲಿ ನಡೆಯಲಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ರೋಹಿತ್ ಶರ್ಮ ಪಡೆ ಗೆದ್ದರೆ ವಿಶೇಷ ದಾಖಲೆಯೊಂದನ್ನು ಬರೆಯುವ ಅವಕಾಶವಿದೆ.
ಭಾರತ ತಂಡ ಗೆದ್ದರೆ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಮೊದಲ ಬಾರಿಗೆ ಸೋಲಿಗಿಂತ ಅಧಿಕ ಗೆಲುವು ಕಂಡಂತಾಗುತ್ತದೆ. ಭಾರತ ಇದುವರೆಗೆ ಆಡಿರುವ 579 ಟೆಸ್ಟ್ಗಳಲ್ಲಿ 178 ಜಯ, 178 ಸೋಲಿನ ಸಮಬಲ ಹೊಂದಿದೆ. ಜತೆಗೆ 222 ಟೆಸ್ಟ್ ಡ್ರಾಗೊಂಡಿದ್ದು, 1 ಟೆಸ್ಟ್ ಟೈ ಆಗಿದೆ. ಸದ್ಯ ಆಸ್ಟ್ರೆಲಿಯಾ (414-232), ಇಂಗ್ಲೆಂಡ್ (397-325), ಪಾಕಿಸ್ತಾನ (148-144) ಮತ್ತು ದಣ ಆಫ್ರಿಕಾ (179-161) ಸೋಲಿಗಿಂತ ಅಧಿಕ ಗೆಲುವು ಕಂಡಿರುವ ತಂಡಗಳಾಗಿವೆ.
ಐಪಿಎಲ್ ಶುರುವಾದ ನಂತರದಲ್ಲಿ ಟೀಮ್ ಇಂಡಿಯಾ ಪಡೆದ 2ನೇ ಸುದೀರ್ಘ (43 ದಿನ) ಬಿಡುವು (ಐಪಿಎಲ್ ಸಮಯ ಹೊರತಾಗಿ) ಇದಾಗಿದೆ. 2012ರಲ್ಲಿ 44 ದಿನ ವಿಶ್ರಾಂತಿ ಪಡೆದಿದ್ದು ಅಗ್ರಸ್ಥಾನದಲ್ಲಿದೆ. ಭಾರತ ತಂಡ ಕಳೆದ ಆಗಸ್ಟ್ 7ರಂದು ಶ್ರೀಲಂಕಾ ವಿರುದ್ಧ ಕೊನೆಯದಾಗಿ ಏಕದಿನ ಪಂದ್ಯ ಆಡಿತ್ತು.