ಪುಣೆ: ಹ್ಯಾಟ್ರಿಕ್ ಗೆಲುವಿನೊಂದಿಗೆ ಬೀಗುತ್ತಿರುವ ಆತಿಥೇಯ ಭಾರತ ತಂಡ ಏಕದಿನ ವಿಶ್ವಕಪ್ನಲ್ಲಿ ತನ್ನ ಗೆಲುವಿನ ಓಟವನ್ನು ಸತತ 4ನೇ ಪಂದ್ಯಕ್ಕೂ ವಿಸ್ತರಿಸಲು ಸಜ್ಜಾಗಿದೆ. ಎಂಸಿಎ ಕ್ರೀಡಾಂಗಣದಲ್ಲಿ ಗುರುವಾರ ನಡೆಯಲಿರುವ ಪಂದ್ಯದಲ್ಲಿ ರೋಹಿತ್ ಶರ್ಮ ಬಳಗ, ಬಾಂಗ್ಲಾದೇಶದ ಸವಾಲು ಎದುರಿಸಲಿದ್ದು, ಬಲಿಷ್ಠ ನಿರ್ವಹಣೆಯನ್ನು ಮುಂದುವರಿಸುವ ಹಂಬಲದಲ್ಲಿದೆ. ಆದರೆ ಭಾರತ ಇದೇ ವೇಳೆ 2007ರಲ್ಲಿ ಬಾಂಗ್ಲಾ ಎದುರು ಅನುಭವಿಸಿದ ಸೋಲಿನಿಂದಾಗಿ ಎಚ್ಚರಿಕೆಯಿಂದ ಕಣಕ್ಕಿಳಿಯಬೇಕಾಗಿದೆ.
ವಿಶ್ವಕಪ್ನಲ್ಲಿ ಈಗಾಗಲೆ 2 ಅಚ್ಚರಿಯ ಫಲಿತಾಂಶಗಳು ಹೊರಹೊಮ್ಮಿವೆ. ಇಂಗ್ಲೆಂಡ್ಗೆ ಆಫ್ಘನ್ ಮತ್ತು ದಕ್ಷಿಣ ಆಫ್ರಿಕಾಕ್ಕೆ ನೆದರ್ಲೆಂಡ್ ಆಘಾತ ನೀಡಿವೆ. ಹೀಗಾಗಿ ಭಾರತ ತಂಡ ಈ ಬಾರಿ ಬಾಂಗ್ಲಾದೇಶ ವಿರುದ್ಧ ಎಚ್ಚರಿಕೆಯಿಂದ ಕಣಕ್ಕಿಳಿಯುವುದು ಅಗತ್ಯವಾಗಿದೆ. 2007ರಲ್ಲಿ ಉಭಯ ತಂಡಗಳ ನಡುವೆ ನಡೆದ ಮೊದಲ ವಿಶ್ವಕಪ್ ಮುಖಾಮುಖಿಯಲ್ಲಿ ಭಾರತ ಆಘಾತ ಎದುರಿಸಿದ್ದು ಮಾತ್ರವಲ್ಲದೆ, ಆ ಸೋಲಿನ ಏಟಿನಿಂದಾಗಿ ಮೊದಲ ಸುತ್ತಿನಲ್ಲೇ ಹೊರಬಿದ್ದಿತ್ತು. ಹೀಗಾಗಿ ಯಾವುದೇ ಕಾರಣಕ್ಕೂ ಭಾರತ, ಬಾಂಗ್ಲಾವನ್ನು ಲುವಾಗಿ ಪರಿಗಣಿಸುವಂತಿಲ್ಲ. 2011, 2015, 2019ರ ಆವೃತ್ತಿಯಲ್ಲಿ ಭಾರತ ಇದೇ ಎಚ್ಚರಿಕೆಯಲ್ಲಿ ಬಾಂಗ್ಲಾವನ್ನು ಸುಲಭವಾಗಿಯೇ ಮಣಿಸಿತ್ತು ಎಂಬುದು ಗಮನಾರ್ಹ.
ಭಾರತ ತಂಡ ಇತ್ತೀಚೆಗೆ ಏಷ್ಯಾಕಪ್ನಲ್ಲಿ ಬಾಂಗ್ಲಾದೇಶ ವಿರುದ್ಧದ ಔಪಚಾರಿಕ ಪಂದ್ಯದಲ್ಲಿ ಪ್ರಮುಖ ಆಟಗಾರರಿಗೆ ವಿಶ್ರಾಂತಿ ನೀಡಿ ಮೀಸಲು ಆಟಗಾರರನ್ನು ಕಣಕ್ಕಿಳಿಸಿದಾಗ ಸೋಲು ಅನುಭವಿಸಿತ್ತು. ಹೀಗಾಗಿ ಭಾರತ ಈ ಬಾರಿ ಬಾಂಗ್ಲಾದೇಶವನ್ನು ಲಘುವಾಗಿ ಪರಿಗಣಿಸದೆ ಗೆಲುವಿನ ಲಯ ಮುಂದುವರಿಸುವತ್ತ ಗಮನಹರಿಸಲಿದೆ. 2022ರ ಡಿಸೆಂಬರ್ನಲ್ಲಿ ಆಡಿದ ದ್ವಿಪಕ್ಷೀಯ ಏಕದಿನ ಸರಣಿಯಲ್ಲೂ ಭಾರತ 2 ಪಂದ್ಯಗಳಲ್ಲಿ ಬಾಂಗ್ಲಾಗೆ ಮಣಿದಿತ್ತು. ಇದರಿಂದ ಬಾಂಗ್ಲಾ ವಿರುದ್ಧದ ಕೊನೇ 4 ಪಂದ್ಯಗಳಲ್ಲಿ 3ರಲ್ಲಿ ಸೋತಿರುವ ಹಿನ್ನಡೆ ಭಾರತ ತಂಡದ್ದಾಗಿದೆ. ಇದಕ್ಕೀಗ ದಿಟ್ಟ ತಿರುಗೇಟು ನೀಡುವ ಸಮಯ ಭಾರತ ತಂಡದ್ದಾಗಿದೆ.