ಮೆಲ್ಬೋರ್ನ್: ಹೊಸ ವರ್ಷದ ಮೊದಲ ಗ್ರಾಂಡ್ ಸ್ಲಾಂ ಟೆನಿಸ್ ಟೂರ್ನಿಗೆ ವೇದಿಕೆ ಸಜ್ಜಾಗಿದ್ದು, ಭಾನುವಾರದಿಂದ ಮೆಲ್ಬೋರ್ನ್ ಪಾರ್ಕ್ನಲ್ಲಿ ಆಸ್ಟ್ರೆಲಿಯನ್ ಓಪನ್ ಕಿರೀಟಕ್ಕಾಗಿ ಹೋರಾಟ ನಡೆಯಲಿದೆ. ವಿಶ್ವ ನಂ. 1 ತಾರೆಯರಾದ ಇಟಲಿಯ ಜನ್ನಿಕ್ ಸಿನ್ನರ್ ಮತ್ತು ಬೆಲಾರಸ್ನ ಅರಿನಾ ಸಬಲೆಂಕಾ ಈ ಬಾರಿ ಹಾಲಿ ಚಾಂಪಿಯನ್ಗಳಾಗಿ ಕಣಕ್ಕಿಳಿಯಲಿದ್ದಾರೆ. 10 ಬಾರಿಯ ಚಾಂಪಿಯನ್ ನೊವಾಕ್ ಜೋಕೊವಿಕ್ 25ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಗೆಲುವಿನ ಹಂಬಲದಲ್ಲಿದ್ದಾರೆ. ಸ್ಪೇನ್ ದಿಗ್ಗಜ ರಾಫೆಲ್ ನಡಾಲ್ ನಿವೃತ್ತಿಯ ನಂತರ ನಡೆಯುತ್ತಿರುವ ಮೊದಲ ಗ್ರಾಂಡ್ ಸ್ಲಾಂ ಇದಾಗಿದೆ.
ಡೋಪ್ ಪ್ರಕರಣ ಮರೆಯಲು ಸಿನ್ನರ್, ಸ್ವಿಯಾಟೆಕ್ ಪ್ರಯತ್ನ: ಕಳೆದ ವರ್ಷ ವಿಚಿತ್ರವಾದ ಡೋಪಿಂಗ್ ಪ್ರಕರಣಗಳಲ್ಲಿ ಸಿಕ್ಕಿಬಿದ್ದರೂ, ದೊಡ್ಡ ಶಿಕ್ಷೆ ಅಥವಾ ಹೆಚ್ಚಿನ ಅವಧಿಯ ನಿಷೇಧದಿಂದ ಪಾರಾಗಿದ್ದ ವಿಶ್ವ ನಂ. 1 ತಾರೆಯರಾದ ಜನ್ನಿಕ್ ಸಿನ್ನರ್ ಮತ್ತು ಇಗಾ ಸ್ವಿಯಾಟೆಕ್ ಇದೀಗ ಅದನ್ನು ಬದಿಗೊತ್ತಿ ಹೊಸ ಆರಂಭವನ್ನು ಬಯಸಿದ್ದಾರೆ. ಜತೆಗೆ ಡೋಪಿಂಗ್ ಬಗ್ಗೆ ಹಿಂದಿಗಿಂತ ಹೆಚ್ಚು ಜಾಗೃತರಾಗಿದ್ದಾರೆ.
ಜೋಕೋಗೆ ಮಾಜಿ ಎದುರಾಳಿ ಕೋಚ್!
ಮಾಜಿ ಎದುರಾಳಿ ಹಾಗೂ ಹೊಸ ಕೋಚ್ ಆಂಡಿ ಮರ್ರೆ ಜತೆಗೆ ಜೋಕೋಗೆ ಇದು ಮೊದಲ ಟೂರ್ನಿ ಎನಿಸಿದೆ. ಹೀಗಾಗಿ ಈ ಜೋಡಿಯ ಯಶಸ್ಸಿನ ಬಗ್ಗೆಯೂ ಟೆನಿಸ್ ಪ್ರೇಮಿಗಳಲ್ಲಿ ತೀವ್ರ ಕುತೂಹಲ ಮೂಡಿದೆ. ಸೆರ್ಬಿಯಾ ತಾರೆ ಜೋಕೋ ಮೊದಲ ಸುತ್ತಿನಲ್ಲಿ, ಟೂರ್ನಿಗೆ ವೈಲ್ಡ್ಕಾರ್ಡ್ ಪ್ರವೇಶ ಪಡೆದಿರುವ ಭಾರತದ ಆಂಧ್ರ ಮೂಲದ ಅಮೆರಿಕ ಯುವ ಆಟಗಾರ ನಿಶೇಶ್ ಬಸವರೆಡ್ಡಿ ಅವರ ಸುಲಭ ಸವಾಲು ಎದುರಿಸಲಿದ್ದಾರೆ. 2024ರಲ್ಲಿ ಒಲಿಂಪಿಕ್ಸ್ ಸ್ವರ್ಣ ಪದಕದ ಕನಸು ನನಸಾಗಿಸಿಕೊಂಡಿದ್ದರೂ, ಒಂದೂ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಒಲಿಸಿಕೊಳ್ಳುವಲ್ಲಿ ವಿಲರಾಗಿದ್ದ 37 ವರ್ಷದ ಜೋಕೋ, 2023ರ ಬಳಿಕ ಮತ್ತೊಮ್ಮೆ ಮೆಲ್ಬೋರ್ನ್ನಲ್ಲಿ ಚಾಂಪಿಯನ್ ಪಟ್ಟವೇರುವ ತವಕದಲ್ಲಿದ್ದಾರೆ.
ಅಲ್ಕರಾಜ್ಗೆ ಕ್ಯಾರಿಯರ್ ಸ್ಲಾಂ ಅವಕಾಶ
ಈಗಾಗಲೆ ಇತರ 3 ಗ್ರಾಂಡ್ ಸ್ಲಾಂಗಳನ್ನು ಗೆದ್ದುಕೊಂಡಿರುವ ಸ್ಪೇನ್ ಯುವತಾರೆ ಮತ್ತು ವಿಶ್ವ ನಂ. 3 ಕಾಲೋರ್ಸ್ ಅಲ್ಕರಾಜ್, ಆಸ್ಟ್ರೆಲಿಯನ್ ಓಪನ್ನಲ್ಲಿ ಗೆದ್ದರೆ ಕ್ಯಾರಿಯರ್ ಸ್ಲಾಂ ಸಾಧಿಸಲಿದ್ದಾರೆ. 4 ಗ್ರಾಂಡ್ ಸ್ಲಾಂ ಪ್ರಶಸ್ತಿಗಳ ಒಡೆಯ 21 ವರ್ಷದ ಅಲ್ಕರಾಜ್, ಕಳೆದ ವರ್ಷ ಕ್ವಾರ್ಟರ್ಫೈನಲ್ಗೇರಿದ್ದೇ ಮೆಲ್ಬೋರ್ನ್ನಲ್ಲಿ ಅವರ ಅತ್ಯುತ್ತಮ ನಿರ್ವಹಣೆ ಎನಿಸಿದೆ.
ಹ್ಯಾಟ್ರಿಕ್ ತವಕದಲ್ಲಿ ಸಬಲೆಂಕಾ
ಕಳೆದ 2 ಆವೃತ್ತಿಯ ಚಾಂಪಿಯನ್ ಆಗಿರುವ ಬೆಲಾರಸ್ ತಾರೆ ಅರಿನಾ ಸಬಲೆಂಕಾ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ಈ ಬಾರಿ ಹ್ಯಾಟ್ರಿಕ್ ಸಾಧಿಸುವ ತವಕದಲ್ಲಿದ್ದಾರೆ. ಮಾರ್ಟಿನಾ ಹಿಂಗಿಸ್ (1997&99) ಬಳಿಕ ಯಾರೂ ಈ ಸಾಧನೆ ಮಾಡಿಲ್ಲ. ಆದರೆ ಅಗ್ರ ಶ್ರೇಯಾಂಕಿತೆ ಸಬಲೆಂಕಾ ಈ ಬಾರಿ ಸ್ವಲ್ಪ ಕಠಿಣ ಡ್ರಾ ಪಡೆದಿದ್ದು, ಮೊದಲ ಸುತ್ತಿನಲ್ಲೇ 2017ರ ಯುಎಸ್ ಓಪನ್ ಚಾಂಪಿಯನ್ ಅಮೆರಿಕದ ಸ್ಲೋವನ್ ಸ್ಟೀಪಲ್ಸ್ ವಿರುದ್ಧ ಆಡಲಿದ್ದಾರೆ. 3ನೇ ಶ್ರೇಯಾಂಕಿತೆ ಕೋಕೋ ಗೌಫ್ , ಸಬಲೆಂಕಾಗೆ ಸೆಮೀಸ್ನಲ್ಲಿ ಮುಖಾಮುಖಿಯಾಗುವ ಸಾಧ್ಯತೆ ಇದೆ. ವಿಶ್ವ ನಂ. 2 ಇಗಾ ಸ್ವಿಯಾಟೆಕ್, 4ನೇ ಶ್ರೇಯಾಂಕಿತೆ ಇಟಲಿಯ ಜಾಸ್ಮಿನ್ ಪಾವೊಲಿನಿ ಮತ್ತು 6ನೇ ಶ್ರೇಯಾಂಕಿತೆ ಎಲೆನಾ ರೈಬಕಿನಾ ಡ್ರಾದ ಇನ್ನೊಂದು ಭಾಗದಲ್ಲಿದ್ದಾರೆ.
ನಗಾಲ್ಗೆ ಮಚಾಕ್ ಎದುರಾಳಿ
ಭಾರತದ ಅಗ್ರ ಸಿಂಗಲ್ಸ್ ಆಟಗಾರ ಸುಮಿತ್ ನಗಾಲ್ ಈ ಬಾರಿ ಪ್ರಧಾನ ಸುತ್ತಿಗೆ ನೇರಅರ್ಹತೆ ಗಳಿಸಿದ್ದು, ಜೆಕ್ ಗಣರಾಜ್ಯದ ಥಾಮಸ್ ಮಚಾಕ್ ವಿರುದ್ಧ ಮೊದಲ ಸುತ್ತಿನ ಪಂದ್ಯ ಆಡಲಿದ್ದಾರೆ. 27 ವರ್ಷದ ನಗಾಲ್ ಎಟಪಿ ವಿಶ್ವ ರ್ಯಾಂಕಿಂಗ್ನಲ್ಲಿ ಪ್ರಸಕ್ತ 96ನೇ ಸ್ಥಾನದಲ್ಲಿದ್ದಾರೆ. ವಿಶ್ವದ ಅಗ್ರ 104 ರ್ಯಾಂಕ್ನ ಆಟಗಾರರಿಗೆ ವರ್ಷದ ಮೊದಲ ಗ್ರಾಂಡ್ ಸ್ಲಾಂಗೆ ನೇರಪ್ರವೇಶ ನೀಡಲಾಗಿದೆ. ನಗಾಲ್ ಕಳೆದ ವರ್ಷ ಟೂರ್ನಿಯ 2ನೇ ಸುತ್ತಿಗೇರಿದ್ದರು. ನಗಾಲ್ ಈ ಬಾರಿ 3ನೇ ಸುತ್ತಿಗೇರಿದರೆ ಜೋಕೊವಿಕ್ ಎದುರಾಗಲಿದ್ದಾರೆ.
*100: ನೊವಾಕ್ ಜೋಕೊವಿಕ್ ಗೆದ್ದರೆ 25ನೇ ಗ್ರಾಂಡ್ ಸ್ಲಾಂನೊಂದಿಗೆ 100ನೇ ಎಟಿಪಿ ಟೂರ್ ಪ್ರಶಸ್ತಿ ಗೆದ್ದ ಸಾಧನೆಯನ್ನೂ ಮಾಡಲಿದ್ದಾರೆ. ಜಿಮ್ಮಿ ಕಾನರ್ಸ್ (109) ಮತ್ತು ರೋಜರ್ ಫೆಡರರ್ (103) ಈ ಸಾಧನೆ ಮಾಡಿರುವ ಮೊದಲಿಬ್ಬರಾಗಿದ್ದಾರೆ.
*511: ಟೂರ್ನಿಯ ಒಟ್ಟು ಬಹುಮಾನ 511 ಕೋಟಿ ರೂ. ಆಗಿದೆ. ಇದು ಕಳೆದ ಆವೃತ್ತಿಗಿಂತ ಶೇ. 12 ಅಧಿಕವಾಗಿದೆ. ಪುರುಷ&ಮಹಿಳಾ ಸಿಂಗಲ್ಸ್ ವಿಭಾಗದ ವಿಜೇತರು ತಲಾ 18.52 ಕೋಟಿ ರೂ. ಗಳಿಸಲಿದ್ದಾರೆ.
*25: ಜೋಕೊವಿಕ್ ಪ್ರಶಸ್ತಿ ಗೆದ್ದರೆ 25 ಗ್ರಾಂಡ್ ಸ್ಲಾಂ ಗೆದ್ದ ವಿಶ್ವದ ಮೊದಲ ಸಾಧಕ ಎನಿಸಲಿದ್ದಾರೆ. ಪ್ರಸಕ್ತ ಅವರು ಮಾರ್ಗರೇಟ್ ಕೋರ್ಟ್ ಜತೆಗೆ 24 ಗ್ರಾಂಡ್ ಸ್ಲಾಂ ಗೆಲುವಿನ ಸಮಬಲದಲ್ಲಿದ್ದಾರೆ.
*ಆರಂಭ: ಬೆಳಗ್ಗೆ 5.30
*ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್, ಸೋನಿ ಲೈವ್ (ಒಟಿಟಿ).