ವಿಜಯವಾಣಿ ಸುದ್ದಿಜಾಲ ಮಂಗಳೂರು
ಆತಿಥೇಯ ಕರ್ನಾಟಕದ ಈಜುಪಟುಗಳು 77ನೇ ರಾಷ್ಟ್ರೀಯ ಹಿರಿಯರ ಈಜು ಚಾಂಪಿಯನ್ಷಿಪ್ನ ಎರಡನೇ ದಿನ ಮತ್ತೆ 3 ಚಿನ್ನ, 4 ಬೆಳ್ಳಿ, 1 ಕಂಚಿನ ಸಹಿತ 8 ಪದಕಗಳನ್ನು ಗೆದ್ದು ಪ್ರಾಬಲ್ಯ ಮುಂದುವರಿಸಿದ್ದಾರೆ. ಒಲಿಂಪಿಯನ್ ಶ್ರೀಹರಿ ನಟರಾಜ್, ಅನೀಶ್ ಎಸ್. ಗೌಡ ಮತ್ತು ವಿದಿತ್ ಎಸ್. ಶಂಕರ್ ಬುಧವಾರ ಕರ್ನಾಟಕಕ್ಕೆ ಸ್ವರ್ಣ ಪದಕ ಗೆದ್ದುಕೊಟ್ಟರು. ಇದರೊಂದಿಗೆ ರಾಜ್ಯ ತಂಡ ಕೂಟದ ಮೊದಲೆರಡು ದಿನಗಳಲ್ಲಿ 9 ಚಿನ್ನ, 7 ಬೆಳ್ಳಿ, 1 ಕಂಚಿನ ಸಹಿತ ಒಟ್ಟು 17 ಪದಕಗಳನ್ನು ಗೆದ್ದುಕೊಂಡಂತಾಗಿದೆ. ಕರ್ನಾಟಕ ಕೂಟದ ಮೊದಲ ದಿನವೇ 6 ಸ್ವರ್ಣ ಪದಕ ಜಯಿಸಿ ಬೀಗಿತ್ತು.
ಮಂಗಳೂರಿನ ಎಮ್ಮೆಕೆರೆಯ ಅಂತಾರಾಷ್ಟ್ರೀಯ ಈಜುಕೊಳದಲ್ಲಿ ನಡೆಯುತ್ತಿರುವ ಕೂಟದಲ್ಲಿ ಶ್ರೀಹರಿ ನಟರಾಜ್ ಪುರುಷರ 100 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ 50.59 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿ ಚಿನ್ನ ಒಲಿಸಿಕೊಂಡರು. ಅನೀಶ್ ಎಸ್. ಗೌಡ ಪುರುಷರ 800 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ 8 ನಿಮಿಷ, 20.01 ಸೆಕೆಂಡ್ಗಳಲ್ಲಿ ಈಜಿ ಚಿನ್ನಕ್ಕೆ ಮುತ್ತಿಟ್ಟರೆ, ರಾಜ್ಯದ ಮತ್ತೋರ್ವ ಸ್ಪರ್ಧಿ ದರ್ಶನ್ ಎಸ್. (8ನಿ, 27.69 ಸೆ) ಬೆಳ್ಳಿ ಪದಕ ಜಯಿಸಿದರು. ವಿದಿತ್ ಎಸ್. ಶಂಕರ್ ಪುರುಷರ 50 ಮೀ. ಬ್ರೆಸ್ಟ್ಸ್ಟ್ರೊಕ್ ವಿಭಾಗದಲ್ಲಿ 28.62 ಸೆಕೆಂಡ್ಗಳಲ್ಲಿ ಈಜಿ ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು. ರಾಜ್ಯದ ಶಿವ ಸುಂದರ್ ಪುರುಷರ 200 ಮೀ. ಮೆಡ್ಲೆಯಲ್ಲಿ 2 ನಿಮಿಷ, 7.73 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿ ರಜತ ಪದಕ ಗೆದ್ದುಕೊಂಡರು.
ಮಹಿಳಾ ವಿಭಾಗದಲ್ಲಿ ರಾಜ್ಯಕ್ಕೆ 2ನೇ ದಿನ 2 ಬೆಳ್ಳಿ, 1 ಕಂಚು ಒಲಿಯಿತು. 1,500 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ ಶಿರಿನ್ 17 ನಿಮಿಷ, 50.61 ಸೆಕೆಂಡ್ಗಳಲ್ಲಿ ಈಜಿ ಬೆಳ್ಳಿ ಒಲಿಸಿಕೊಂಡರು. ಮೊದಲ ದಿನ ರಾಷ್ಟ್ರೀಯ ದಾಖಲೆ ನಿರ್ಮಿಸಿ ಗಮನಸೆಳೆದಿದ್ದ ರಾಜ್ಯದ ಹಷಿಕಾ ರಾಮಚಂದ್ರ 2ನೇ ದಿನ 200 ಮೀ. ಮೆಡ್ಲೆ ವಿಭಾಗದಲ್ಲಿ 2 ನಿಮಿಷ, 25. 84 ಸೆಕೆಂಡ್ಗಳಲ್ಲಿ ಈಜಿ ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟರು. ಈ ಸ್ಪರ್ಧೆಯಲ್ಲಿ ರಾಜ್ಯದ ಮತ್ತೋರ್ವ ಈಜುಪಟು ಮಾನವಿ ವರ್ಮ (2ನಿ, 26.81 ಸೆ) ಕಂಚಿನ ಪದಕ ಜಯಿಸಿದರು.
ಶ್ರೀಹರಿ ನಟರಾಜ್ ಜತೆಗೆ ಕಾರ್ತಿಕೇಯನ್ ನಾಯರ್, ಶಿರಿನ್, ಶಾಲಿನಿ ಆರ್. ದೀತ್ ಒಳಗೊಂಡ ರಾಜ್ಯ ತಂಡ ಮಿಶ್ರ 4/400 ಮೀ. ಫ್ರೀಸ್ಟೆ$ಲ್ ರಿಲೇ ಸ್ಪರ್ಧೆಯಲ್ಲಿ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟು ಪದಕ ವಂಚಿತವಾಯಿತು. ಈ ಸ್ಪರ್ಧೆಯಲ್ಲಿ ಮಹಾರಾಷ್ಟ್ರ, ತಮಿಳುನಾಡು, ರೈಲ್ವೇಸ್ಗೆ ಕ್ರಮವಾಗಿ ಚಿನ್ನ, ಬೆಳ್ಳಿ, ಕಂಚು ಲಭಿಸಿತು.
ತಮಿಳುನಾಡು ತಂಡ ದಾಖಲೆ
ತಮಿಳುನಾಡು ತಂಡ ಮಿಶ್ರ 4/100 ಮೀ. ಮೆಡ್ಲೆ ರಿಲೇ ಸ್ಪರ್ಧೆಯಲ್ಲಿ ನೂತನ ಕೂಟ ದಾಖಲೆ ಬರೆಯಿತು. ಪ್ರಮಿತಿ ಜ್ಞಾನಶೇಖರನ್, ಧನುಷ್ ಸುರೇಶ್, ಬಿ. ರೋಹಿತ್, ದೀಾ ಶಿವಕುಮಾರ್ ಒಳಗೊಂಡ ತಮಿಳುನಾಡು ತಂಡ 4 ನಿಮಿಷ, 5.30 ಸೆಕೆಂಡ್ಗಳಲ್ಲಿ ಈಜಿ ಚಿನ್ನ ಗೆದ್ದುಕೊಂಡಿತು. ಈ ಮೂಲಕ ಮಹಾರಾಷ್ಟ್ರ ತಂಡ ಕಳೆದ ವರ್ಷ ನಿರ್ಮಿಸಿದ್ದ ದಾಖಲೆಯನ್ನು (4 ನಿ,6.84 ಸೆ) ಮುರಿಯಿತು. ಈ ಬಾರಿ ಮಹಾರಾಷ್ಟ್ರ ತಂಡ ರಜತಕ್ಕೆ ತೃಪ್ತಿಪಟ್ಟಿತು.
ವೃತ್ತಿ, ಶ್ರೀನಿಧಿಗೆ ಬಂಗಾರ
ತೆಲಂಗಾಣದ ವೃತ್ತಿ ಅಗರ್ವಾಲ್ ಮಹಿಳೆಯರ 1,500 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ 17 ನಿಮಿಷ, 45.63 ಸೆಕೆಂಡ್ಗಳಲ್ಲಿ ಈಜಿ ಸ್ವರ್ಣ ಪದಕಕ್ಕೆ ಕೊರಳೊಡ್ಡಿದರು. ತಮಿಳುನಾಡಿನ ಶ್ರೀನಿಧಿ ನಟೇಶನ್ ಮಹಿಳೆಯರ 209 ಮೀ. ಮೆಡ್ಲೆ ವಿಭಾಗದಲ್ಲಿ ಕರ್ನಾಟಕದ ಹಷಿಕಾ ರಾಮಚಂದ್ರಗೆ ಆಘಾತ ನೀಡಿ ಚಿನ್ನಕ್ಕೆ ಮುತ್ತಿಟ್ಟರು. ಶ್ರೀನಿಧಿ 2 ನಿಮಿಷ, 25.52 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸುವ ಮೂಲಕ ಹಷಿಕಾಗಿಂತ ಕೇವಲ 0.32 ಸೆಕೆಂಡ್ಗಳಿಂದ ಮೇಲುಗೈ ಸಾಧಿಸಿದರು.