ಕೊಲಂಬೊ: ಶ್ರೀಲಂಕಾದಲ್ಲಿ ಕ್ರಿಕೆಟಿಗರ ಹಾಗೂ ಕ್ರಿಕೆಟ್ ಮಂಡಳಿ ವಿರುದ್ಧದ ಕದನ ಮತ್ತೊಮ್ಮೆ ಶುರುವಾಗಿದೆ. ಟೆಸ್ಟ್ ತಂಡದ ನಾಯಕ ದಿಮುತ್ ಕರುಣರತ್ನೆ, ದಿನೇಶ್ ಚಾಂಡಿಮಾಲ್, ಏಂಜಲೊ ಮ್ಯಾಥ್ಯೂಸ್ ಸೇರಿದಂತೆ ಹಿರಿಯ ಕ್ರಿಕೆಟಿಗರು ನೂತನ ಗುತ್ತಿಗೆ ಸಹಿ ಹಾಕಲು ಹಿಂದೇಟು ಹಾಕಿದ್ದಾರೆ. ಇತರ ದೇಶಗಳಿಗೆ ಹೋಲಿಸಿದರೆ, ಗುತ್ತಿಗೆ ಒಪ್ಪಂದ ಮೊತ್ತ ತುಂಬಾ ಕಡಿಮೆಯಾಗಿದ್ದ ಹಿನ್ನೆಲೆಯಲ್ಲಿ ಕ್ರಿಕೆಟಿಗರು ಈ ನಿರ್ಧಾರ ಕೈಗೊಂಡಿದ್ದಾರೆ. ಆಟಗಾರರು ಹಾಗೂ ಎಸ್ಎಲ್ಸಿ ನಡುವಿನ ತಿಕ್ಕಾಟದಿಂದಾಗಿ ಜುಲೈನಲ್ಲಿ ನಿಗದಿಯಾಗಿರುವ ಭಾರತ ವಿರುದ್ಧದ ದ್ವಿಪಕ್ಷೀಯ ಸರಣಿ ತೂಗುಯ್ಯಾಲೆಯಲ್ಲಿ ಸಿಲುಕಿದೆ.
ನೂತನ ಗುತ್ತಿಗೆ ಕುರಿತು ಮಾತನಾಡಿದ, ದಿಮುತ್ ಕರುಣರತ್ನೆ, ದಿನೇಶ್ ಚಾಂಡಿಮಾಲ್, ಏಂಜಲೊ ಮ್ಯಾಥ್ಯೂಸ್ ಇತರ ದೇಶಗಳಿಗೆ ಗುತ್ತಿಗೆ ಮೊತ್ತಕ್ಕೆ ನೋಡಿದರೆ ಮೂರನೇ ಒಂದು ಭಾಗದಷ್ಟು ಇಲ್ಲ ಎಂದು ಕಿಡಿಕಾರಿದ್ದಾರೆ. 24 ಕ್ರಿಕೆಟಿಗರನ್ನು 4 ಗ್ರೇಡ್ನಲ್ಲಿ ಗುತ್ತಿಗೆ ಒಪ್ಪಂದ ಮಾಡಿಕೊಳ್ಳಲು ಶ್ರೀಲಂಕಾ ಕ್ರಿಕೆಟ್ ಮಂಡಳಿ ಮುಂದಾಗಿದೆ. ಗುತ್ತಿಗೆ ಒಪ್ಪಂದಕ್ಕೆ ಸಹಿಹಾಕಲು ಜೂನ್ 3ರವರೆಗೆ ಗಡುವು ನೀಡಲಾಗಿದೆ. ಎ ಗ್ರೇಡ್ನ 6 ಆಟಗಾರರಿಗೆ ವಾರ್ಷಿಕ 70 ಸಾವಿರ ಯುಎಸ್ ಡಾಲರ್ನಿಂದ ಒಂದು ಲ ಯುಎಸ್ ಡಾಲರ್ವರೆಗೆ (51 ಲಕ್ಷ ರೂ ಯಿಂದ 72 ಲಕ್ಷ ರೂ) ಮೊತ್ತ ನಿಗದಿಪಡಿಸಲಾಗಿದೆ. ಇದು ಆಟಗಾರರ ಕೆಂಗಣ್ಣಿಗೆ ಗುರಿಯಾಗಿದೆ. ಭಾರತದ ಆಟಗಾರರಿಗೆ ಸಿ ಗ್ರೇಡ್ನಲ್ಲಿ (ವಾರ್ಷಿಕ 1 ಕೋಟಿ) ದಕ್ಕುವ ಮೊತ್ತಕ್ಕಿಂತ ಕಡಿಮೆಯಾಗಿದೆ.
ಶ್ರೀಲಂಕಾ ಕ್ರಿಕೆಟ್ ಮಂಡಳಿ ವಿರುದ್ಧ ಆಟಗಾರರು ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದು, ಯಾವುದೇ ಕಾರಣಕ್ಕೂ ಸಹಿಹಾಕುವುದಿಲ್ಲ ಎಂದು ಸವಾಲು ಹಾಕಿದ್ದಾರೆ. ಇದೀಗ ಎಸ್ಎಲ್ಸಿ ಹಾಗೂ ಆಟಗಾರರ ನಡುವೆ ಹೊಸ ಬಿಕ್ಕಟ್ಟಿಗೆ ಕಾರಣವಾಗಿದೆ.