Gukesh Dommaraju : ಇತ್ತೀಚೆಗೆ ಸಿಂಗಾಪುರದಲ್ಲಿ ನಡೆದ ವಿಶ್ವ ಚೆಸ್ ಚಾಂಪಿಯನ್ಷಿಪ್ನಲ್ಲಿ ಪ್ರಶಸ್ತಿ ಜಯಿಸಿದ ಭಾರತದ ಯುವ ಆಟಗಾರ ಡಿ. ಗುಕೇಶ್ಗೆ ಕಾಲಿವುಡ್ ಸೂಪರ್ಸ್ಟಾರ್ ಶಿವಕಾರ್ತಿಕೇಯನ್ ದುಬಾರಿ ಉಡುಗೊರೆಯನ್ನು ನೀಡಿ ಗೌರವಿಸಿದ್ದಾರೆ.
ವಿಶ್ವ ಚೆಸ್ ಚಾಂಪಿಯನ್ಶಿಪ್ನಲ್ಲಿ ಚೀನಾದ ಡಿಂಗ್ ಲಿರೆನ್ ವಿರುದ್ಧ ತಮಿಳುನಾಡಿನ ಗುಕೇಶ್ ಸ್ಫರ್ಧಿಸಿದರು. ಒಟ್ಟು 14 ಸುತ್ತುಗಳಲ್ಲಿ ಗುಕೇಶ್ ಮತ್ತು ಡಿಂಗ್ ಲಿರೆನ್ ತಲಾ 2 ಗೆಲುವು ಸಾಧಿಸಿದರೆ, ಇತರ ಪಂದ್ಯಗಳು ಡ್ರಾದಲ್ಲಿ ಅಂತ್ಯಗೊಂಡವು. ಇದರಿಂದಾಗಿ ಇಬ್ಬರೂ ತಲಾ 6.5 ಅಂಕ ಗಳಿಸಿದರು. 14ನೇ ಸುತ್ತಿನ ಕೊನೆಯ ಪಂದ್ಯದಲ್ಲಿ ಗುಕೇಶ್ ಅದ್ಭುತ ಗೆಲುವು ಸಾಧಿಸಿದರು.
ಈ ಗೆಲುವಿನ ನಂತರ ಗುಕೇಶ್ 11.45 ಕೋಟಿ ಬಹುಮಾನ ಪಡೆದಿದ್ದಾರೆ. ತಮಿಳುನಾಡು ಸರ್ಕಾರ ಕೂಡ ಗುಕೇಶ್ಗೆ 5 ಕೋಟಿ ರೂಪಾಯಿ ಬಹುಮಾನ ಘೋಷಿಸಿದೆ. ಇದೇ ಸಂದರ್ಭದಲ್ಲಿ ನಟ ಶಿವಕಾರ್ತಿಕೇಯನ್ ಅವರು ಗುಕೇಶ್ ಅವರನ್ನು ತಮ್ಮ ಕಚೇರಿಗೆ ಆಹ್ವಾನಿಸಿ ಕೇಕ್ ಕತ್ತರಿಸಿ ಅಭಿನಂದಿಸಿದ್ದಾರೆ. ದುಬಾರಿ ಬೆಲೆಯ ವಾಚ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಇದಕ್ಕೆ ಸಂಬಂಧಿಸಿದ ಫೋಟೋಗಳು ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿವೆ.
ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಗುಕೇಶ್ ಆರಂಭದಿಂದಲೇ ಗೆಲ್ಲುವ ನೆಚ್ಚಿನ ಆಟಗಾರ ಎನಿಸಿದ್ದರು. ಆದರೆ ಅವರ ಆಕ್ರಮಣಕಾರಿ ಆಟಗಳಿಗೆಲ್ಲ ಚೀನಾದ ಡಿಂಗ್ ಲಿರೆನ್ ದಿಟ್ಟ ತಿರುಗೇಟು ನೀಡುವ 14ನೇ ಹಾಗೂ ಕೊನೇ ಪಂದ್ಯದವರೆಗೂ ಸ್ಪರ್ಧೆಯನ್ನು ಎಳೆದರು. ಕೊನೆಗೂ ಲಿರೆನ್ ಕೊನೇ ಪಂದ್ಯದಲ್ಲಿ ಮಾಡಿದ ದೊಡ್ಡ ಎಡವಟ್ಟಿನ ನಡೆಯೊಂದು ಗುಕೇಶ್ ಅತಿಕಿರಿಯ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮುವಂತೆ ಮಾಡಿತು.
ಬಿಳಿ ಕಾಯಿಯೊಂದಿಗೆ ಕೊನೇ ಪಂದ್ಯ ಆಡಿದ ಲಿರೆನ್ ಗೆಲುವಿಗೆ ಹೆಚ್ಚಿನ ಅವಕಾಶ ಹೊಂದಿದ್ದರು. ಹಿಂದಿನ 2 ಪಂದ್ಯಗಳನ್ನು ಬಿಳಿ ಕಾಯಿಯಲ್ಲೇ ಗೆದ್ದಿದ್ದ ಗುಕೇಶ್ ಕೂಡ ಕಪ್ಪು ಕಾಯಿಯೊಂದಿಗೆ ಗೆಲ್ಲುವ ಅವಕಾಶ ವಿರಳವಿತ್ತು. ಹೀಗಾಗಿ ಗುಕೇಶ್ ಡ್ರಾದತ್ತಲೇ ಹೆಚ್ಚಿನ ಒಲವು ಹೊಂದಿದ್ದರು ಮತ್ತು ಮುಖಾಮುಖಿ ಟೈಬ್ರೇಕರ್ಗೆ ಸಾಗುವುದು ಬಹುತೇಕ ಖಚಿತವೆನಿಸಿತ್ತು. ಆದರೆ ಪಂದ್ಯ 50 ನಡೆಗಳನ್ನು ದಾಟಿದ ಬಳಿಕ 32 ವರ್ಷದ ಲಿರೆನ್ ಏಕಾಗ್ರತೆಯಲ್ಲಿ ಭಂಗ ಉಂಟಾಗಿ ಚೆಸ್ ಇತಿಹಾಸದಲ್ಲೇ ಅತಿದೊಡ್ಡ ಎಡವಟ್ಟಿನ ದಾಳ ಪ್ರಯೋಗ ಮಾಡಿ ಸೋಲು ಅನುಭವಿಸುವಂತಾಯಿತು.
ಲಿರೆನ್ 55ನೇ ನಡೆಯಲ್ಲಿ ತನ್ನ ರೂಕ್ (ಆನೆ) ದಾಳವನ್ನು ಎಫ್4ರಿಂದ ಎಫ್2ಕ್ಕೆ ಚಲಿಸಿದರು. ಇದು ಅತಿದೊಡ್ಡ ಎಡವಟ್ಟಿನ ಹೆಜ್ಜೆ ಆಗಿತ್ತು ಮತ್ತು ಗುಕೇಶ್ಗೆ ಪಂದ್ಯ ಗೆಲ್ಲಲು ವರದಾನವೆನಿಸಿತು. ಲಿರೆನ್ ಎಫ್2ಕ್ಕೆ ಇಟ್ಟ ರೂಕ್ ದಾಳವನ್ನು ಗುಕೇಶ್ ತನ್ನ ರೂಕ್ ದಾಳವನ್ನು ಬಲಿಕೊಟ್ಟು ಉರುಳಿಸಿದರು. ಬಳಿಕ ಇಬ್ಬರ ಬಿಷಪ್ (ರಥ) ದಾಳವೂ ಆಟದಿಂದ ಹೊರಬಿದ್ದಿತು. ಇದರಿಂದ ಬೋರ್ಡ್ ಮೇಲೆ ಲಿರೆನ್ರ ಕೇವಲ 2 ದಾಳ ಉಳಿದುಕೊಂಡರೆ, ಗುಕೇಶ್ 3 ದಾಳ ಹೊಂದಿದ್ದರು. ಅಂದರೆ ಲಿರೆನ್ ಕಿಂಗ್ ದಾಳದ ಜತೆಗೆ ಕೇವಲ ಒಂದು ದಾಳ (ಸೈನಿಕ) ಹೊಂದಿದ್ದರೆ, ಗುಕೇಶ್ ಕಿಂಗ್ ಜತೆಗೆ 2 ದಾಳ (2 ಸೈನಿಕ) ಹೊಂದಿದ್ದರು. ಇದರಿಂದಾಗಿ ಗುಕೇಶ್, ಲಿರೆನ್ಗೆ ಚೆಕ್ಮೇಟ್ ನೀಡಿದರು. ಅಲ್ಲದೆ ಓರ್ವ ಸೈನಿಕ ಕೊನೆಯ ಸಾಲಿಗೆ ತಲುಪಿದರೂ ಕ್ವೀನ್ ಆಗಿ (ರಾಣಿ) ಬಡ್ತಿ ಪಡೆದು ಗುಕೇಶ್ ಇನ್ನಷ್ಟು ಪ್ರಾಬಲ್ಯ ಸಾಧಿಸುವ ಅವಕಾಶವಿತ್ತು. ಹೀಗಾಗಿ ಲಿರೆನ್ಗೆ ಬಳಿಕ ಪಂದ್ಯದಲ್ಲಿ ಡ್ರಾ ಸಾಧಿಸುವ ಅಥವಾ ಗೆಲುವು ಸಾಧಿಸುವ ಯಾವ ಅವಕಾಶವೂ ಉಳಿದಿರದ ಕಾರಣ ಅವರು ಗುಕೇಶ್ ಗೆಲುವನ್ನು ಒಪ್ಪಿಕೊಂಡರು.
ಈ 55ನೇ ನಡೆಯ ಎಡವಟ್ಟು ಓರ್ವ ಸಾಮಾನ್ಯ ಚೆಸ್ ಆಟಗಾರನೂ ಮಾಡುವಂಥ ತಪ್ಪಲ್ಲ. ಆದರೆ ವಿಶ್ವ ಚಾಂಪಿಯನ್ಷಿನ್ನ ನಿರ್ಣಾಯಕ ಪಂದ್ಯದ ಒತ್ತಡದಲ್ಲಿ ಲಿರೆನ್ ಎಡವಿದರು. ಹೀಗಾಗಿ ಲಿರೆನ್ ತೀವ್ರ ಟೀಕೆಗಳನ್ನು ಎದುರಿಸುವಂತಾಗಿದೆ. (ಏಜೆನ್ಸೀಸ್)