ಮ್ಯಾಡ್ರಿಡ್: ಭಾರತದ ಸುಮೀತ್ ರೆಡ್ಡಿ ಮತ್ತು ಸಿಕ್ಕಿ ರೆಡ್ಡಿ ದಂಪತಿ ಮ್ಯಾಡ್ರಿಡ್ ಸ್ಪೇನ್ ಮಾಸ್ಟರ್ಸ್ ಸೂಪರ್-300 ಬ್ಯಾಡ್ಮಿಂಟನ್ ಟೂರ್ನಿಯ ಮಿಶ್ರ ಡಬಲ್ಸ್ ವಿಭಾಗದಲ್ಲಿ ಸೆಮಿಫೈನಲ್ ಪ್ರವೇಶಿಸಿದೆ. ಸಿಂಗಲ್ಸ್ನಲ್ಲಿ ಪಿವಿ ಸಿಂಧು ಎಂಟರ ಘಟ್ಟದಲ್ಲೇ ಸವಾಲು ಅಂತ್ಯಗೊಳಿಸಿದರು. ಮಹಿಳಾ ಡಬಲ್ಸ್ನಲ್ಲಿ ಕನ್ನಡತಿ ಅಶ್ವಿನಿ ಪೊನ್ನಪ್ಪ ಮತ್ತು ತನಿಷಾ ಕ್ರಾಸ್ಟೋ ಜೋಡಿಯೂ ನಿರಾಸೆ ಅನುಭವಿಸಿತು.
ಶುಕ್ರವಾರ ನಡೆದ ಕ್ವಾರ್ಟರ್ಫೈನಲ್ನಲ್ಲಿ ಸುಮೀತ್-ಸಿಕ್ಕಿ ಜೋಡಿ 4ನೇ ಶ್ರೇಯಾಂಕಿತ ಇಂಡೋನೇಷ್ಯಾದ ರೆಹನ್ ನೌಲ್ ಕುಶರ್ಜಾಂಟೊ&ಲಿಸಾ ಆಯು ಕುಸುಮಾವತಿ ಜೋಡಿಗೆ 14-21, 21-11, 21-17 ಗೇಮ್ಗಳಿಂದ ಆಘಾತಕಾರಿ ಸೋಲುಣಿಸಿತು.
2ನೇ ಶ್ರೇಯಾಂಕಿತೆ ಪಿವಿ ಸಿಂಧು ಥಾಯ್ಲೆಂಡ್ನ ಸುಪನಿದ ಕೇಟ್ಥೋಂಗ್ ವಿರುದ್ಧ ಒಂದು ಗಂಟೆ 17 ನಿಮಿಷಗಳ ರೋಚಕ ಹೋರಾಟದಲ್ಲಿ 26-24, 17-21, 20-22ರಿಂದ ಸೋಲು ಅನುಭವಿಸಿದರು. ಇದರೊಂದಿಗೆ ಸಿಂಧು ಪ್ರಶಸ್ತಿ ಗೆಲುವಿನ ಬರ ಮುಂದುವರಿದಂತಾಗಿದೆ.
3ನೇ ಶ್ರೇಯಾಂಕಿತ ಅಶ್ವಿನಿ-ತನಿಷಾ ಜೋಡಿ ಚೀನಾ ತೈಪೆಯ ಲೀ ಚಿಯಾ ಸಿನ್-ಟೆಂಗ್ ಚುನ್ ಸುನ್ ಜೋಡಿಯ ಎದುರು 13-21, 19-21 ನೇರಗೇಮ್ಗಳಿಂದ ಪರಾಭವಗೊಂಡಿತು.