ಮಿಯಾಮಿ: ಅಗ್ರ ಶ್ರೇಯಾಂಕಿತ ರೋಹನ್ ಬೋಪಣ್ಣ ಹಾಗೂ ಆಸ್ಟ್ರೆಲಿಯಾದ ಮ್ಯಾಥ್ಯೂ ಎಬ್ಡೆನ್ ಜೋಡಿ ಮಿಯಾಮಿ ಓಪನ್ ಎಟಿಪಿ ಮಾಸ್ಟರ್ಸ್-1000 ಟೆನಿಸ್ ಟೂರ್ನಿಯ ಪುರುಷರ ಡಬಲ್ಸ್ ವಿಭಾಗದಲ್ಲಿ ಫೈನಲ್ಗೇರಿದೆ. ಆಸ್ಟ್ರೆಲಿಯನ್ ಓಪನ್ ಚಾಂಪಿಯನ್ ಬೋಪಣ್ಣ-ಎಬ್ಡೆನ್ ಜೋಡಿ ಐದನೇ ಬಾರಿ ಮಾಸ್ಟರ್ಸ್-1000 ಪ್ರಶಸ್ತಿ ಸುತ್ತಿನಲ್ಲಿ ಆಡಲಿದೆ. ಶನಿವಾರ ನಡೆಯಲಿರುವ ಪ್ರಶಸ್ತಿ ಸುತ್ತಿನ ಕಾದಾಟದಲ್ಲಿ ಅವರು ಕ್ರೊವೇಷಿಯಾದ ಇವಾನ್ ಡೋಡಿಗ್ ಮತ್ತು ಅಮೆರಿಕದ ಆಸ್ಟಿನ್ ಕ್ರಾಜಿಸೆಕ್ ವಿರುದ್ಧ ಸೆಣಸಾಟ ನಡೆಸಲಿದ್ದಾರೆ.
ಗುರುವಾರ ರಾತ್ರಿ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ವಿಶ್ವ ನಂ.2 ಬೋಪಣ್ಣ ಮತ್ತು ಎಬ್ಡೆನ್ 6-1, 6-4 ನೇರ ಸೆಟ್ಗಳಿಂದ ಸ್ಪೇನ್ನ ಗ್ರಾನೊಲ್ಲರ್ಸ್ ಮತ್ತು ಅರ್ಜೆಂಟೀನಾದ ಝೆಬಾಲ್ಸ್ ವಿರುದ್ಧ ಗೆದ್ದು ಬೀಗಿದರು. ಇದರೊಂದಿಗೆ ಸೋಮವಾರ ಪ್ರಕಟವಾಗುವ ಎಟಿಪಿ ಡಬಲ್ಸ್ ರ್ಯಾಂಕಿಂಗ್ನಲ್ಲಿ 44 ವರ್ಷದ ಬೋಪಣ್ಣ ಮರಳಿ ಅಗ್ರಸ್ಥಾನಕ್ಕೇರುವ ಅವಕಾಶ ಪಡೆದಿದ್ದಾರೆ. ಕಳೆದ ದುಬೈ ಚಾಂಪಿಯನ್ಷಿಪ್ನಲ್ಲಿ ಕ್ವಾರ್ಟರ್ಫೈನಲ್ನಲ್ಲಿ ಮತ್ತು ಇಂಡಿಯನ್ ವೇಲ್ಸ್ ಮಾಸ್ಟರ್ಸ್ನಲ್ಲಿ 32ರ ಘಟ್ಟದಲ್ಲೇ ಸೋಲು ಕಂಡ ಬಳಿಕ ಬೋಪಣ್ಣ 2ನೇ ಸ್ಥಾನಕ್ಕೆ ಕುಸಿದಿದ್ದರು. ಡಬಲ್ಸ್ ರ್ಯಾಂಕಿಂಗ್ನಲ್ಲಿ ಅಗ್ರಸ್ಥಾನಕ್ಕೇರಿದ ಅತಿ ಹಿರಿಯ ಆಟಗಾರ ಎಂಬ ದಾಖಲೆ ಈಗಾಗಲೆ ಅವರ ಹೆಸರಿನಲ್ಲಿದೆ.
ಬೋಪಣ್ಣಗೆ ಇದು ವೃತ್ತೀಜಿವನದ 14ನೇ ಎಟಿಪಿ ಮಾಸ್ಟರ್ಸ್-1000 ಫೈನಲ್ ಮತ್ತು ಮಿಯಾಮಿಯಲ್ಲಿ ಮೊದಲನೆಯದ್ದಾಗಿದೆ. ಬೋಪಣ್ಣ&ಎಬ್ಡೆನ್ ಜೋಡಿಗೆ ಇದು ವರ್ಷದ 2ನೇ ಫೈನಲ್ ಆಗಿದೆ. ಈ ಮುನ್ನ ವರ್ಷಾರಂಭದ ಆಸ್ಟ್ರೆಲಿಯನ್ ಓಪನ್ ಪ್ರಶಸ್ತಿ ಜಯಿಸುವ ಮೂಲಕ ಬೋಪಣ್ಣ ವಿಶ್ವ ನಂ. 1 ಪಟ್ಟಕ್ಕೂ ಬಡ್ತಿ ಪಡೆದಿದ್ದರು.
ಪೇಸ್ ಸಾಧನೆ ಸಮ
ಎಲ್ಲ 9 ಎಟಿಪಿ ಮಾಸ್ಟರ್ಸ್ ಟೂರ್ನಿಗಳಲ್ಲಿ ಫೈನಲ್ ಆಡಿದ 2ನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಕನ್ನಡಿಗ ಬೋಪಣ್ಣ ಪಾತ್ರರಾಗಿದ್ದಾರೆ. ಲಿಯಾಂಡರ್ ಪೇಸ್ ಮೊದಲ ಸಾಧಕರಾಗಿದ್ದಾರೆ. ಬೋಪಣ್ಣಗೆ ಒಟ್ಟಾರೆ 63ನೇ ಎಟಿಪಿ ಫೈನಲ್ ಇದಾಗಿದ್ದು, ಇದುವರೆಗೆ 25 ಡಬಲ್ಸ್ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ.
ಮುಂಬೈ ಇಂಡಿಯನ್ಸ್ ತಂಡದೊಳಗೆ ಎರಡು ಬಣ! ಹಾರ್ದಿಕ್-ರೋಹಿತ್ ಪರ ಗುಂಪುಗಳಲ್ಲಿ ಆಟಗಾರರ ವಿಭಜನೆ!