IPL Girl : ಈ ಸೋಶಿಯಲ್ ಮೀಡಿಯಾ ಯುಗದಲ್ಲಿ ಕೆಲವರು ಕಣ್ಣು ಮಿಟುಕಿಸುವುದರಲ್ಲಿ ವೈರಲ್ ಆಗುತ್ತಿದ್ದಾರೆ. ತಮ್ಮ ಸೌಂದರ್ಯ, ವಿಶೇಷ ನೋಟ, ಹಾವಾಭಾವದಿಂದಲೇ ನೆಟ್ಟಿಗರ ಗಮನ ಸೆಳೆದು ರಾತ್ರೋರಾತ್ರಿ ಸೋಶಿಯಲ್ ಮೀಡಿಯಾ ಸ್ಟಾರ್ ಆಗಿ ಹೊರ ಹೊಮ್ಮುತ್ತಿದ್ದಾರೆ. ಹೇಳಬೇಕೆಂದರೆ, ಈ ಡಿಜಿಟಲ್ ಯುಗದ ಶಕ್ತಿಯೇ ಅಂಥದ್ದು. ಯಾರಾದರೂ ನೆಟ್ಟಿಗರಿಗೆ ಗಮನ ಸೆಳೆದರೇ ಸಾಕು ಅವರನ್ನು ವೈರಲ್ ಮಾಡಿಬಿಡುತ್ತಾರೆ. ಇದಕ್ಕೆ ತಾಜಾ ಉದಾಹರಣೆ ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ತಂಡದ ಅಭಿಮಾನಿಯಾಗಿರುವ ಆರ್ಯಪ್ರಿಯಾ ಭುಯಾನ್.
ಸಿಎಸ್ಕೆ ಹಾಗೂ ರಾಜಸ್ಥಾನ ರಾಯಲ್ಸ್ ವಿರುದ್ಧ ನಡೆದ ಐಪಿಎಲ್ ಪಂದ್ಯದ ಸಮಯದಲ್ಲಿ ಈ ಹುಡುಗಿಯ ಹಾವಭಾವ ಮತ್ತು ಪ್ರತಿಕ್ರಿಯೆಗಳು ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿವೆ. ವಿಶೇಷವಾಗಿ ಈ ಪಂದ್ಯದಲ್ಲಿ ನಿರ್ಣಾಯಕ ಹಂತದಲ್ಲಿ ಮಹೇಂದ್ರ ಸಿಂಗ್ ಧೋನಿ ಔಟಾದಾಗ ಆಕೆ ಕೊಟ್ಟ ಪ್ರತಿಕ್ರಿಯೆ ಎಲ್ಲರ ಗಮನ ಸೆಳೆದಿದೆ. ಈ ಕಾರಣದಿಂದಾಗಿ ಐಪಿಎಲ್ ಹುಡುಗಿ ಆರ್ಯಪ್ರಿಯಾ, ರಾತ್ರೋರಾತ್ರಿ ಲಕ್ಷಗಟ್ಟಲೆ ಫಾಲೋವರ್ಸ್ ಗಳಿಸಿ ಸಂಚಲನ ಮೂಡಿಸಿದ್ದಾಳೆ. ಈ ವೈರಲ್ ಪ್ರಸಂಗದ ಸಂಪೂರ್ಣ ವಿವರ ತಿಳಿಯಲು ಬಯಸಿದರೆ ನೀವು ಈ ಸ್ಟೋರಿಯನ್ನು ಓದಲೇಬೇಕಿದೆ.
ಆರ್ಯಪ್ರಿಯಾ ತಮ್ಮ ಹಾವಭಾವಗಳಿಂದ ಲಕ್ಷಾಂತರ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಕೆಲವೇ ಸೆಕೆಂಡುಗಳ ವಿಡಿಯೋ ತುಣುಕಿನೊಂದಿಗೆ ಸೂಪರ್ ವೈರಲ್ ಆದ ಐಪಿಎಲ್ ಹುಡುಗಿ ಆರ್ಯಪ್ರಿಯಾ ಭುಯಾನ್ ಗುವಾಹಟಿ ಮೂಲದವರು. 19 ವರ್ಷದ ಆರ್ಯಪ್ರಿಯಾ, ಕೂಲ್ ಕ್ಯಾಪ್ಟನ್ ಖ್ಯಾತಿಯ ಮಹೇಂದ್ರ ಸಿಂಗ್ ಧೋನಿ ಅವರ ದೊಡ್ಡ ಅಭಿಮಾನಿ. ಆರ್ಯಪ್ರಿಯಾ 9 ಅಥವಾ 10ನೇ ವಯಸ್ಸಿನಲ್ಲಿರುವಾಗ ಆಕೆಯ ಸಹೋದರಿ, ಸಿಎಸ್ಕೆ ಮತ್ತು ಧೋನಿಯನ್ನು ಆಕೆಗೆ ಪರಿಚಯಿಸಿದರು. ಅಂದಿನಿಂದ ಸಿಎಸ್ಕೆ ಮತ್ತು ಮಿಸ್ಟರ್ ಕೂಲ್ ಧೋನಿಯ ಹುಚ್ಚು ಅಭಿಮಾನಿಯಾಗಿದ್ದಾರೆ.
ಚೆನ್ನೈ ಹಾಗೂ ರಾಜಸ್ಥಾನ ಪಂದ್ಯದ ವೇಳೆ ಚೆನ್ನೈನ ಮಾಜಿ ನಾಯಕ ಧೋನಿ ಹೊಡೆದ ಶಾಟ್ ಅನ್ನು ಲಾಂಗ್ ಆನ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಶಿಮ್ರಾನ್ ಹೆಟ್ಮೆಯರ್ ಅದ್ಭುತ ಕ್ಯಾಚ್ ಹಿಡಿದರು. ಚೆನ್ನೈ ಗೆಲುವಿನ ನಿರ್ಣಾಯಕ ಸಮಯದಲ್ಲಿ ಧೋನಿ ಔಟಾಗಿದ್ದು ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿತು. ಈ ವೇಳೆ ಸ್ಟೇಡಿಯಂನಲ್ಲಿದ್ದ ಆರ್ಯ ಪ್ರಿಯಾ ಕೂಡ ಶಾಕ್ ಆದರು. ‘ಏಯ್, ಇದೇನಿದು’ ಎಂಬ ಮುಖಭಾವವನ್ನು ವ್ಯಕ್ತಪಡಿಸಿದರು. ಕ್ಯಾಚ್ ಹಿಡಿದ ಆಟಗಾರನನ್ನು ಕೊಂದು ಬಿಡುತ್ತೇನೆ ಎನ್ನುವಂತೆ ಎಕ್ಸ್ಪ್ರೆಶನ್ ನೀಡಿದಳು. ಯಾವಾಗ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಕಾಣಿಸಿಕೊಂಡಿತು ತಕ್ಷಣ ವೈರಲ್ ಆಯಿತು.
ಆರ್ಆರ್ ಮತ್ತು ಸಿಎಸ್ಕೆ ಪಂದ್ಯದ ವೇಳೆ ಕ್ಯಾಮೆರಾಮ್ಯಾನ್ ತನ್ನನ್ನು ಸೆರೆಹಿಡಿದಿದ್ದು, ಟಿವಿಯಲ್ಲಿ ಪ್ರದರ್ಶನಗೊಂಡಿದೆ ಅನ್ನೋದು ಆರ್ಯ ಪ್ರಿಯಾಗೆ ತಿಳಿದಿರಲಿಲ್ಲ, ಆದರೆ, ವೈರಲ್ ಐಪಿಎಲ್ ಹುಡುಗಿಯ ಫಾಲೋವರ್ಸ್ ಸಂಖ್ಯೆ ಮಾತ್ರ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದ್ದಾರೆ. ಆರಂಭದಲ್ಲಿ ಇನ್ಸ್ಟಾಗ್ರಾಂನಲ್ಲಿ 800 ಇದ್ದ ಫಾಲೋವರ್ಸ್ ಸಂಖ್ಯೆ ಇದೀಗ 2 ಲಕ್ಷವನ್ನು ದಾಟಿದೆ. ಕೆಲವರು ಈ ವಿಡಿಯೋವನ್ನು ವಾಟ್ಸ್ಆ್ಯಪ್ ಸ್ಟೇಟಸ್ನಲ್ಲಿ ಶೇರ್ ಮಾಡಿದ್ದಾರೆ. ಇನ್ನು ಕೆಲವರು ಕ್ರಷ್ ಎಂದು ಕಮೆಂಟ್ ಮಾಡಿದ್ದಾರೆ. ಏನೇ ಆಗಲಿ ವೈರಲ್ ವಿಡಿಯೋದೊಂದಿಗೆ ಆರ್ಯ ಪ್ರಿಯಾ ಸಾಮಾಜಿಕ ಜಾಲತಾಣದ ತಾರೆ ಮತ್ತು 'ಮೀಮ್ಸ್ ಗರ್ಲ್' ಆಗಿ ಹೊರಹೊಮ್ಮಿದ್ದಾರೆ.
ನಾನು ಸಾಮಾಜಿಕ ಜಾಲತಾಣದಲ್ಲಿ ಅಷ್ಟೊಂದು ಸಕ್ರಿಯಳಾಗಿಲ್ಲ. ನನಗೆ ಕೆಲವೇ ಫಾಲೋವರ್ಸ್ ಇದ್ದರು. ನಾನು ಕೆಲವೊಮ್ಮೆ ಪ್ರಯಾಣದ ಫೋಟೋಗಳನ್ನು ಮಾತ್ರ ಪೋಸ್ಟ್ ಮಾಡುತ್ತಿದ್ದೆ. ಎಂಎಸ್ ಧೋನಿಯ ವಿಕೆಟ್ಗೆ ತನ್ನ ಪ್ರತಿಕ್ರಿಯೆಯನ್ನು ತೋರಿಸುವ ವಿಡಿಯೋ ವೈರಲ್ ಆದ ನಂತರ, ರಾತ್ರೋರಾತ್ರಿ ಫಾಲೋವರ್ಸ್ ಸಂಖ್ಯೆ ಲಕ್ಷಕ್ಕೆ ಏರಿತು ಎಂದು ರಾಷ್ಟ್ರೀಯ ಮಾಧ್ಯಮಕ್ಕೆ ಆರ್ಯ ಪ್ರಿಯಾ ತಿಳಿಸಿದರು.
ಧೋನಿ ಔಟಾಗುತ್ತಾರೆ ಎಂದು ಆಕೆ ನಿರೀಕ್ಷಿಸಿರಲಿಲ್ಲ. ಧೋನಿ ಕ್ಯಾಚ್ ಔಟ್ ಆದಾಗ ಶಾಕ್ ಆದೆ. ಹೀಗಾಗಿ ಆ ರೀತಿ ಪ್ರತಿಕ್ರಿಯಿಸಿದೆ. ಇದು ಆಕಸ್ಮಿಕವಾಗಿ ನಡೆದಿದ್ದು, ಆದ್ರೆ ವೈರಲ್ ಆಗಿದೆ ಎಂದು ಆರ್ಯ ಪ್ರಿಯಾ ಹೇಳಿದರು. ಸದ್ಯಕ್ಕೆ ನಾನು ಮತ್ತು ತನ್ನ ಕುಟುಂಬದವರು ಇದರಿಂದ ಸಂತಸಗೊಂಡಿರುವುದಾಗಿ ತಿಳಿಸಿದರು. (ಏಜೆನ್ಸೀಸ್)