ಸೂರತ್: ಬಾಲಂಗೋಚಿಗಳ ಹೋರಾಟದಿಂದ ಕರ್ನಾಟಕ ತಂಡ ರಣಜಿ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯಲ್ಲಿ ಆತಿಥೇಯ ರೈಲ್ವೇಸ್ ಎದುರು ಮೊದಲ ಇನಿಂಗ್ಸ್ನಲ್ಲಿ ಮುನ್ನಡೆ ಸಾಧಿಸಿದರೂ, ಮೊಹಮದ್ ಸೈಫ್ (51*) ಪ್ರತಿಹೋರಾಟದಿಂದ ಸವಾಲಿನ ಗುರಿ ಎದುರಾಗುವ ಭೀತಿಯಲ್ಲಿದೆ. ಹೀಗಾಗಿ ರಾಜ್ಯದ ಪಾಲಿಗೆ 2ನೇ ಇನಿಂಗ್ಸ್ನಲ್ಲಿ ತೋರುವ ಬ್ಯಾಟಿಂಗ್ ನಿರ್ವಹಣೆಯೇ ನಿರ್ಣಾಯಕ ಎನಿಸಿದೆ.
ಲಾಲ್ಬಾಯಿ ಕಂಟ್ರಾಕ್ಟರ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಶನಿವಾರ 6 ವಿಕೆಟ್ಗೆ 90 ರನ್ಗಳಿಂದ 2ನೇ ದಿನದಾಟ ಮುಂದುವರಿಸಿದ ಕರ್ನಾಟಕ ತಂಡ ವಿಕೆಟ್ ಕೀಪರ್-ಬ್ಯಾಟರ್ ಶರತ್ ಶ್ರೀನಿವಾಸ್ (24) ಮತ್ತು ವೈಶಾಕ್ ವಿಜಯ್ಕುಮಾರ್ (24) ಉಪಯುಕ್ತ ಕೊಡುಗೆಯಿಂದ 174 ರನ್ ಪೇರಿಸಿತು. ಈ ಮೂಲಕ ಮೊದಲ ಇನಿಂಗ್ಸ್ನಲ್ಲಿ 19 ರನ್ಗಳ ಮುನ್ನಡೆ ಸಾಧಿಸುವಲ್ಲಿ ಕರ್ನಾಟಕ ಯಶಸ್ವಿಯಾಯಿತು. ಆದರೆ ರೈಲ್ವೇಸ್ ತಂಡದ 2ನೇ ಇನಿಂಗ್ಸ್ನಲ್ಲಿ ಫೀಲ್ಡಿಂಗ್ ವಿಭಾಗದಲ್ಲಿ ತೋರಿದ ಕೆಟ್ಟ ನಿರ್ವಹಣೆಯಿಂದ ರಾಜ್ಯ ತಂಡ ಸುಮಾರು 4 ಕ್ಯಾಚ್ಗಳನ್ನು ಕೈಚೆಲ್ಲಿತು. ಇದರಿಂದಾಗಿ ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿಯಿಂದ ಪಾರಾದ ರೈಲ್ವೇಸ್ ತಂಡ ದಿನದಂತ್ಯಕ್ಕೆ 8 ವಿಕೆಟ್ಗೆ 209 ರನ್ ಪೇರಿಸಿದೆ. ಅರ್ಧಶತಕ ಬಾರಿಸಿರುವ ಸೈಫ್ ಜತೆಗೆ ಅಯನ್ ಚೌಧರಿ (1*) ಕ್ರೀಸ್ನಲ್ಲಿದ್ದಾರೆ. ರೈಲ್ವೇಸ್ ಸದ್ಯ 190 ರನ್ ಮುನ್ನಡೆಯಲ್ಲಿದೆ. 3ನೇ ದಿನ ರೈಲ್ವೇಸ್ ಮುನ್ನಡೆ 200ರ ಗಡಿ ದಾಟದಂತೆ ತಡೆದರೂ, ಈ ಲೋ-ಸ್ಕೋರಿಂಗ್ ಪಂದ್ಯದಲ್ಲಿ ರಾಜ್ಯ ತಂಡ ಈ ಸವಾಲನ್ನು ಬೆನ್ನಟ್ಟುವುದು ಕಠಿಣವಾಗಿಯೇ ಕಾಣಿಸುತ್ತಿದೆ.
ಬೌಲರ್ಸ್ಗೆ ಸಾಥ್ ನೀಡದ ಫೀಲ್ಡರ್ಸ್
ರಾಜ್ಯ ತಂಡದ ಬೌಲರ್ಗಳು ರೈಲ್ವೇಸ್ 2ನೇ ಇನಿಂಗ್ಸ್ಗೂ ಬೇಗನೆ ಕಡಿವಾಣ ಹಾಕಲು ಯತ್ನಿಸಿದರು. ವೇಗಿಗಳಾದ ವೈಶಾಕ್ ವಿಜಯ್ಕುಮಾರ್ 3 ಮತ್ತು ವಿದ್ವತ್ ಕಾವೇರಪ್ಪ 2 ವಿಕೆಟ್ ಕಬಳಿಸಿದರು. ಆದರೆ ಫೀಲ್ಡರ್ಗಳು ಬೌಲರ್ಗಳಿಗೆ ಸಮರ್ಥ ಸಾಥ್ ನೀಡದೆ ಕ್ಯಾಚ್ ಕೈಚೆಲ್ಲಿ ರಾಜ್ಯ ತಂಡಕ್ಕೆ ಹಿನ್ನಡೆ ತಂದರು. ಜೀವದಾನಗಳ ಲಾಭ ಪಡೆದ ಸೈಫ್ ಅರ್ಧಶತಕ ಬಾರಿಸಿದರೆ, ವಿಕೆಟ್ ಕೀಪರ್-ಬ್ಯಾಟರ್ ಸೂರಜ್ ಅಹುಜಾ ಕೂಡ ರೈಲ್ವೇಸ್ ಮೊತ್ತ ಏರಿಸಿದರು.
ರೈಲ್ವೇಸ್: 155 ಮತ್ತು 62 ಓವರ್ಗಳಲ್ಲಿ 8 ವಿಕೆಟ್ಗೆ 209 (ವಿವೇಕ್ ಸಿಂಗ್ 13, ಪ್ರಥಮ್ 33, ಸೈಫ್ 51*, ಅಹುಜಾ 48, ಯುವರಾಜ್ 13, ವೈಶಾಕ್ 45ಕ್ಕೆ 3, ವಿದ್ವತ್ 35ಕ್ಕೆ 2, ಕೌಶಿಕ್ 31ಕ್ಕೆ 1, ಸಮರ್ಥ್ 32ಕ್ಕೆ 1, ಹಾರ್ದಿಕ್ 53ಕ್ಕೆ 1), ಕರ್ನಾಟಕ: 50.5 ಓವರ್ಗಳಲ್ಲಿ 174 (ಕಿಶನ್ 17, ಶರತ್ 24, ವೈಶಾಕ್ 24, ಆಕಾಶ್ ಪಾಂಡೆ 63ಕ್ಕೆ 5, ಅಯನ್ 39ಕ್ಕೆ 4).