ಮುಂಬೈ: ದಿಗ್ಗಜ ಬ್ಯಾಟ್ಸ್ಮನ್ ಸಚಿನ್ ತೆಂಡುಲ್ಕರ್ 24 ವರ್ಷಗಳ ಅಂತಾರಾಷ್ಟ್ರೀಯ ಕ್ರಿಕೆಟ್ ಜೀವನದಲ್ಲಿ ಹಲವಾರು ದಾಖಲೆಗಳ ಒಡೆಯರಾದವರು. ಇದರ ಜತೆಜತೆಯಲ್ಲೇ ಕೋಟ್ಯಂತರ ರೂಪಾಯಿ ಸಂಪಾದಿಸಿರುವ ಅವರು, ಹಲವಾರು ಐಷಾರಾಮಿ ಕಾರುಗಳ ಒಡೆಯರೂ ಆಗಿದ್ದಾರೆ. ಆದರೆ ಅವರಿಗೆ ಈಗಲೂ ಅವರ ಮೊದಲ ಕಾರು 'ಮಾರುತಿ 800' ಮೇಲೆ ಪ್ರೀತಿ ಇದೆ. ದುರದೃಷ್ಟವಶಾತ್ ಆ ಕಾರು ಈಗ ಅವರ ಬಳಿ ಇಲ್ಲ. ಅದನ್ನು ಮರಳಿ ಪಡೆಯಲು ಈಗ ಅವರು ಅಭಿಮಾನಿಗಳ ಮೊರೆ ಹೋಗಿದ್ದು, ನನ್ನ ಮೊದಲ ಕಾರು ಹುಡುಕಲು ನೆರವಾಗಿ ಎಂದು ಕೇಳಿಕೊಂಡಿದ್ದಾರೆ.
'ನನ್ನ ಮೊದಲ ಕಾರು ಮಾರುತಿ 800. ಆದರೆ ದುರದೃಷ್ಟವಶಾತ್ ಅದು ಈಗ ನನ್ನ ಬಳಿ ಇಲ್ಲ. ನಾನು ಅದನ್ನು ಈಗ ಮರಳಿ ಪಡೆದುಕೊಳ್ಳಲು ಇಷ್ಟಪಟ್ಟಿದ್ದೇನೆ. ಈಗ ನನ್ನ ಮಾತನ್ನು ಕೇಳಿಸಿಕೊಳ್ಳುತ್ತಿರುವ ಜನರಲ್ಲಿ ಯಾರಿಗಾದರೂ ಆ ಕಾರಿನ ಬಗ್ಗೆ ತಿಳಿದಿದ್ದರೆ ದಯವಿಟ್ಟು ನೇರವಾಗಿ ನನ್ನನ್ನು ಸಂಪರ್ಕಿಸಲು ಹಿಂಜರಿಯಬೇಡಿ' ಎಂದು ಸಚಿನ್ ತೆಂಡುಲ್ಕರ್ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.
'ಬಾಲ್ಯದಲ್ಲಿ ನಮ್ಮ ಮನೆಯ ಪಕ್ಕದ ಸಿನಿಮಾ ಮಂದಿರದಲ್ಲಿ ಸಾಕಷ್ಟು ಜಾಗವಿತ್ತು. ಜನರು ಸಿನಿಮಾ ನೋಡಲು ಹೋಗುವಅಘ ಅಲ್ಲಿ ತಮ್ಮ ಕಾರುಗಳನ್ನು ಪಾರ್ಕ್ ಮಾಡುತ್ತಿದ್ದರು. ನಾನು ಮತ್ತು ನನ್ನ ಅಣ್ಣ ಆಗ ಬಾಲ್ಕನಿ ಮೇಲೆ ನಿಂತು ಗಂಟೆಗಳ ಕಾಲ ಆ ಕಾರುಗಳನ್ನು ವೀಕ್ಷಿಸುತ್ತಿದ್ದೆವು' ಎಂದು ಸಚಿನ್ ಕಾರುಗಳ ಮೇಲಿನ ತಮ್ಮ ಪ್ರೀತಿಯನ್ನು ಹಂಚಿಕೊಂಡಿದ್ದಾರೆ.
ಭಾರತ ತಂಡದ ಪರ 200 ಟೆಸ್ಟ್, 463 ಏಕದಿನ ಮತ್ತು ಏಕೈಕ ಟಿ20 ಪಂದ್ಯಗಳನ್ನು ಆಡಿರುವ ಸಚಿನ್ ತೆಂಡುಲ್ಕರ್, ಮೊದಲ ಬಾರಿ ಮುಂಬೈ ತಂಡ ಡ್ರೆಸ್ಸಿಂಗ್ ರೂಂ ಪ್ರವೇಶಿಸಿ ಅನುಭವ ಅವಿಸ್ಮರಣೀಯ ಎಂದಿದ್ದಾರೆ. 'ನಾನು ಬಾಲ್ ಬಾಯ್ ಆಗಿದ್ದಾಗ ಡ್ರೆಸ್ಸಿಂಗ್ ರೂಂನ ಬಲಭಾಗದಲ್ಲಿ ನಿಂತುಕೊಂಡಿದ್ದೆ. ಈ ಮೂಲಕ ನಾನು ಡ್ರೆಸ್ಸಿಂಗ್ ರೂಂನಲ್ಲಿ ಆಟಗಾರರು ಏನು ಮಾಡುತ್ತಿದ್ದಾರೆ ಎಂಬುದನ್ನು ಗಮನಿಸುತ್ತಿದ್ದೆ. ಆ ವೇಳೆ ನನ್ನ ಹೀರೋ ಸುನೀಲ್ ಗಾವಸ್ಕರ್ ಅವರು ನನಗೆ ಒಳಗೆ ಬರುವಂತೆ ಆಹ್ವಾನಿಸಿದರು. ಅವರು ಬಲಭಾಗದ ಕಾರ್ನರ್ನ ಕೊನೆಯ ಸೀಟಿನಲ್ಲಿ ಕುಳಿತಿದ್ದರು. ಕಾಕತಾಳೀಯವೆಂದರೆ ನಾನು ಕೂಡ ನನ್ನ ಮೊದಲ ರಣಜಿ ಪಂದ್ಯ ಆಡುವ ವೇಳೆ ಅದೇ ಸೀಟಿನಲ್ಲಿ ಹೋಗಿ ಕುಳಿತುಕೊಂಡಿದ್ದೆ. ಇದೊಂದು ಅಮೋಘವಾದ ಕಾಕತಾಳೀಯವೆನಿಸಿದೆ' ಎಂದು ಸಚಿನ್ ನೆನಪಿಸಿಕೊಂಡಿದ್ದಾರೆ.