ರಾಂಚಿ: ಇಂದು (ಫೆ.23) ರಾಂಚಿಯಲ್ಲಿ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ನಾಲ್ಕನೇ ಟೆಸ್ಟ್ ಪಂದ್ಯದ ಮೊದಲನೇ ದಿನದಂದು ಬೌಂಡರಿ ಲೈನ್ನಲ್ಲಿದ್ದ ಬಾಲ್ ಬಾಯ್, ಸೋಮಾರಿತನದಿಂದ ಮಲಗಿ ಆಕಳಿಸಿದ್ದಲ್ಲದೇ, ತನ್ನ ತೊಡೆಯನ್ನು ಕೆರೆದುಕೊಂಡ ದೃಶ್ಯ ಕ್ಯಾಮೆರಾ ಕಣ್ಣಿನಲ್ಲಿ ಸೆರೆಯಾಗಿದ್ದು, ಕೆಲವೇ ಗಂಟೆಗಳಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ವ್ಯಾಪಕವಾಗಿ ವೈರಲ್ ಆಗಿದೆ.
72ನೇ ಓವರ್ನಲ್ಲಿ ಬೌಂಡರಿ ಹಗ್ಗದ ಹೊರಗೆ ಕುಳಿತ್ತಿದ್ದ ಬಾಲ್ಬಾಯ್ ತನ್ನ ಕಡೆಗೆ ಯಾವುದೇ ಬಾಲ್ ಬರುವುದಿಲ್ಲ ಎಂದು ಸುಮ್ಮನೆ ಮೈದಾನದಲ್ಲಿ ಮಲಗಿದ್ದಾಗ ಕ್ಯಾಮರಾ ಕಣ್ಣಿಗೆ ಸಿಕ್ಕಿಬಿದ್ದಿದ್ದಾನೆ. ಕ್ಯಾಮೆರಾಮನ್ ಸ್ಟೇಡಿಯಂನಲ್ಲಿ ಕುಳಿತಿದ್ದ ಇಂಗ್ಲಿಷ್ ಕ್ರಿಕೆಟ್ ಅಭಿಮಾನಿಯತ್ತ ಗಮನ ಹರಿಸುವ ಬದಲಿಗೆ ಈ ಹುಡುಗ ಆಕಳಿಸಿ, ತೊಡೆಯನ್ನು ಕೆರೆದುಕೊಳ್ಳುತ್ತಿದ್ದಾಗ ಪ್ಯಾನ್ ಮಾಡಿ ದೃಶ್ಯ ಸೆರೆಹಿಡಿದಿದ್ದಾರೆ.
ಆ ಸಮಯದಲ್ಲಿ ಕಾಮೆಂಟ್ರಿ ಮಾಡುತ್ತಿದ್ದ ರವಿಶಾಸ್ತ್ರಿ, ಆಕಳಿಸುತ್ತಿದ್ದ ಬಾಲ್ ಬಾಯ್ ನೋಡಿ, "ಎದ್ದೇಳಪ್ಪ... ಒಂದು ಲೋಟ ನೀರು ಕುಡಿ. ಕ್ರಿಕೆಟ್ ಮತ್ತಷ್ಟು ಆಸಕ್ತಿದಾಯಕವಾಗುತ್ತಿದೆ" ಎಂದು ಹೇಳಿದ್ದಾರೆ. ಪ್ರತ್ಯೇಕವಾಗಿ ಈ ವಿಡಿಯೋ ತುಣುಕು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ನೆಟ್ಟಿಗರು ಕೂಡ ಹಾಸ್ಯಸ್ಪದವಾಗಿ ಕಮೆಂಟ್ ಮಾಡಿದ್ದಾರೆ,(ಏಜೆನ್ಸೀಸ್).