ಲಖನೌ: ವೇಗಿ ವಾಸುಕಿ ಕೌಶಿಕ್ (20ಕ್ಕೆ 5) ಮಾರಕ ಬೌಲಿಂಗ್ ದಾಳಿಯ ನೆರವಿನಿಂದ ಆತಿಥೇಯ ಉತ್ತರ ಪ್ರದೇಶ ತಂಡವನ್ನು ಅಲ್ಪ ಮೊತ್ತಕ್ಕೆ ನಿಯಂತ್ರಿಸಿದ ಕರ್ನಾಟಕ ತಂಡ ರಣಜಿ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯ ತನ್ನ 5ನೇ ಲೀಗ್ ಪಂದ್ಯದಲ್ಲಿ ಮೊದಲ ದಿನವೇ ಇನಿಂಗ್ಸ್ ಮುನ್ನಡೆ ಸಾಧಿಸಿ ಬೀಗಿದೆ. ಈ ಮೂಲಕ ನಾಕೌಟ್ ಆಸೆ ಜೀವಂತವಿಡುವ ನಿಟ್ಟಿನಲ್ಲಿ ಕರ್ನಾಟಕ ದಿಟ್ಟ ಹೆಜ್ಜೆ ಇಟ್ಟಿದೆ.
ಏಕನಾ ಸ್ಟೇಡಿಯಂನಲ್ಲಿ ಬುಧವಾರ ಆರಂಭಗೊಂಡ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ಗೆ ಇಳಿದ ಉತ್ತರ ಪ್ರದೇಶದ ಲೆಕ್ಕಾಚಾರ ತಲೆಕೆಳಗಾಯಿತು. ಕೌಶಿಕ್ ಜತೆಗೆ ವಿದ್ಯಾಧರ್ ಪಾಟೀಲ್ (22ಕ್ಕೆ 3) ದಾಳಿಗೆ ಕುಸಿದ ಉತ್ತರ ಪ್ರದೇಶ 40.3 ಓವರ್ಗಳಲ್ಲಿ ಕೇವಲ 89 ರನ್ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ಕರ್ನಾಟಕ ತಂಡ ದಿನದಂತ್ಯಕ್ಕೆ 31 ಓವರ್ಗಳಲ್ಲಿ 5 ವಿಕೆಟ್ಗೆ 127 ರನ್ ಗಳಿಸಿದ್ದು, ಸದ್ಯ 38 ರನ್ ಮುನ್ನಡೆಯಲ್ಲಿದೆ. ಪದಾರ್ಪಣೆಯ ಪಂದ್ಯದಲ್ಲೇ ಬಿರುಸಿನ ಅರ್ಧಶತಕ ಬಾರಿಸಿ ಮಿಂಚಿರುವ ವಿಕೆಟ್ ಕೀಪರ್&ಬ್ಯಾಟರ್ ಕೆಎಲ್ ಶ್ರೀಜಿತ್ (68*ರನ್, 77 ಎಸೆತ, 9 ಬೌಂಡರಿ) ಜತೆಗೆ ಶ್ರೇಯಸ್ ಗೋಪಾಲ್ (14*) ಕ್ರೀಸ್ನಲ್ಲಿದ್ದಾರೆ.
ಕೌಶಿಕ್ ಕಡಿವಾಣ
ಕೌಶಿಕ್&ವಿದ್ಯಾಧರ್ ವೇಗದ ದಾಳಿಗೆ ತತ್ತರಿಸಿದ ಉತ್ತರ ಪ್ರದೇಶ 56 ರನ್ಗಳಿಗೆ 7 ವಿಕೆಟ್ ಕಳೆದುಕೊಂಡು ನಿರುತ್ತರವಾಗಿತ್ತು. ಆಗ ಸಮೀರ್ ರಿಜ್ವಿ (25) ಆಸರೆಯಾದರೂ, ಮೊತ್ತವನ್ನು 100ರ ಗಡಿ ದಾಟಿಸಲು ರಾಜ್ಯದ ಬೌಲರ್ಗಳು ಅವಕಾಶ ಬಿಟ್ಟುಕೊಡಲಿಲ್ಲ. ವೈಶಾಕ್ ವಿಜಯ್ಕುಮಾರ್&ವಿದ್ವತ್ ಕಾವೇರಪ್ಪ ಗೈರಿನಲ್ಲಿ ರಾಜ್ಯದ ವೇಗದ ಬೌಲಿಂಗ್ ಪಡೆಗೆ ಬಲ ತುಂಬಿದ 32 ವರ್ಷದ ಕೌಶಿಕ್ ಸತತ 2ನೇ ಪಂದ್ಯದಲ್ಲಿ 5 ವಿಕೆಟ್ ಗೊಂಚಲು ಪಡೆದರು. ಒಟ್ಟಾರೆ 4ನೇ ಬಾರಿ 5 ವಿಕೆಟ್ ಗೊಂಚಲು ಪಡೆದ ಸಾಧನೆ ಮಾಡಿದರು.
ಮಿಂಚಿದ ಶ್ರೀಜಿತ್
ರಾಜ್ಯ ತಂಡದ ಪರ ಈಗಾಗಲೆ ಏಕದಿನ, ಟಿ20 ಪಂದ್ಯ ಆಡಿರುವ 28 ವರ್ಷದ ಕೆಎಲ್ ಶ್ರೀಜಿತ್ ಈ ಬಾರಿ ಪ್ರಥಮ ದರ್ಜೆ ಕ್ರಿಕೆಟ್ಗೂ ಕಾಲಿಟ್ಟರು. ಆರಂಭಿಕ ನಿಕಿನ್ ಜೋಸ್ ಮತ್ತು ಆರ್. ಸ್ಮರಣ್ ಖಾತೆಯನ್ನೇ ತೆರೆಯದೆ ನಿರ್ಗಮಿಸಿದಾಗ ಕರ್ನಾಟಕ ಆರಂಭಿಕ ಆಘಾತ ಎದುರಿಸಿತು. ಆಗ ನಾಯಕ ಮಯಾಂಕ್ ಅಗರ್ವಾಲ್ (30) ಜತೆಗೂಡಿ ಶ್ರೀಜಿತ್ ಆಸರೆಯಾದರು. ಇವರಿಬ್ಬರು 48 ರನ್ ಸೇರಿಸಿದಾಗ ಮಯಾಂಕ್ ಔಟಾದರೆ, ನಂತರ ಬಂದ ಮನೀಷ್ ಪಾಂಡೆ (6) ಮತ್ತು ಅಭಿನವ್ ಮನೋಹರ್ (6) ಬೇಗನೆ ನಿರ್ಗಮಿಸಿದರು. ಮುನ್ನಡೆ ಪಡೆಯುವ ಮುನ್ನವೇ ಕರ್ನಾಟಕ 5 ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಆಗ ಶ್ರೀಜಿತ್ ಮತ್ತು ಶ್ರೇಯಸ್ ಗೋಪಾಲ್ ಮುರಿಯದ 6ನೇ ವಿಕೆಟ್ಗೆ 46 ಎಸೆತಗಳಲ್ಲೇ 43 ರನ್ ಸೇರಿಸಿ ಅಮೂಲ್ಯ ಮುನ್ನಡೆ ಒದಗಿಸಿದರು.
ಶ್ರೀಜಿತ್, ಪರಂತಾಪ್ ಪದಾರ್ಪಣೆ
ಕರ್ನಾಟಕ ತಂಡ 3 ಬದಲಾವಣೆಯೊಂದಿಗೆ ಕಣಕ್ಕಿಳಿಯಿತು. ವಿಕೆಟ್ ಕೀಪರ್&ಬ್ಯಾಟರ್ ಕೆಎಲ್ ಶ್ರೀಜಿತ್ ಮತ್ತು ಯುವ ವೇಗಿ ಯಶೋವರ್ಧನ್ ಪರಂತಾಪ್ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದರೆ, ಸುಜಯ್ ಸಾತೇರಿ ಮತ್ತು ಅಭಿಲಾಷ್ ಶೆಟ್ಟಿ ಸ್ಥಾನ ಬಿಟ್ಟುಕೊಟ್ಟರು. ಹಾರ್ದಿಕ್ ರಾಜ್ ಬದಲಿಗೆ ಮೊಹ್ಸಿನ್ ಖಾನ್ ಮರಳಿದರು.
ಉತ್ತರ ಪ್ರದೇಶ: 40.3 ಓವರ್ಗಳಲ್ಲಿ 89 (ರಿತುರಾಜ್ ಶರ್ಮ 12, ಸಮೀರ್ ರಿಜ್ವಿ 25, ವಿ. ಕೌಶಿಕ್ 20ಕ್ಕೆ 5, ವಿದ್ಯಾಧರ್ 22ಕ್ಕೆ 3, ಯಶೋವರ್ಧನ್ 19ಕ್ಕೆ 1, ಮೊಹ್ಸಿನ್ ಖಾನ್ 23ಕ್ಕೆ 1), ಕರ್ನಾಟಕ: 31 ಓವರ್ಗಳಲ್ಲಿ 5 ವಿಕೆಟ್ಗೆ 127 (ನಿಕಿನ್ 0, ಮಯಾಂಕ್ 30, ಸ್ಮರಣ್ 0, ಕೆಎಲ್ ಶ್ರೀಜಿತ್ 68*, ಮನೀಷ್ ಪಾಂಡೆ 6, ಅಭಿನವ್ 6, ಶ್ರೇಯಸ್ 14*, ಶಿವಂ ಮಾವಿ 52ಕ್ಕೆ 2, ಅಕಿಬ್ ಖಾನ್ 31ಕ್ಕೆ 2, ಸೌರಭ್ 38ಕ್ಕೆ 1).