ನಾರ್ತ್ಸೌಂಡ್: ಹಾಲಿ ಟಿ20 ವಿಶ್ವಕಪ್ನಲ್ಲಿ ಮಳೆ ದೊಡ್ಡಮಟ್ಟದ ಪರಿಣಾಮವನ್ನು ಬೀರಿದೆ. ಶ್ರೀಲಂಕಾ, ಪಾಕಿಸ್ತಾನ ತಂಡಗಳು ಲೀಗ್ ಹಂತದಲ್ಲೇ ಹೊರಬೀಳಲು ಮತ್ತು ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತಂಡ ಹೊರಬೀಳುವ ಭೀತಿ ಎದುರಿಸಲು ಮಳೆ ಪ್ರಮುಖ ಕಾರಣವೆನಿಸಿದೆ. ಇದರ ನಡುವೆ ಟೂರ್ನಿಯ ಮುಂದಿನ ಸೂಪರ್-8 ಹಂತದಲ್ಲೂ ಮಳೆ ಅಡಚಣೆ ತರುವ ಭೀತಿ ಇದೆ. ಮೊದಲ ಸುತ್ತಿನಲ್ಲಿ ಅಮೆರಿಕದಲ್ಲೇ ಹೆಚ್ಚಿನ ಪಂದ್ಯಗಳು ಮಳೆಯಿಂದ ರದ್ದಾಗಿದ್ದವು. ಸೂಪರ್-8 ಹಂತದಿಂದ ಎಲ್ಲ ಪಂದ್ಯಗಳಿಗೆ ವೆಸ್ಟ್ ಇಂಡೀಸ್ ಆತಿಥ್ಯ ವಹಿಸಲಿದೆ. ಆದರೆ ಇದೀಗ ವಿಂಡೀಸ್ನಲ್ಲೂ ಮಳೆ ಭೀತಿ ಹೆಚ್ಚಾಗಿದೆ.
ಕೆಲ ಪಂದ್ಯ ಸಂಪೂರ್ಣ ರದ್ದಾಗದಿದ್ದರೂ, ಮಳೆಯಿಂದಾಗಿ ಆಗಾಗ ಅಡಚಣೆ ಎದುರಿಸುವ, ಓವರ್ ಕಡಿತಗೊಳ್ಳುವ ಮತ್ತು ಡಕ್ವರ್ತ್-ಲೂಯಿಸ್ ನಿಯಮದನ್ವಯ ಲಿತಾಂಶ ನಿರ್ಧಾರವಾಗುವ ಭೀತಿ ಇದ್ದೇ ಇದೆ.
ಜೂನ್ 19ರಂದು ನಾರ್ತ್ಸೌಂಡ್ನಲ್ಲಿ ನಡೆಯಲಿರುವ ಅಮೆರಿಕ-ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯದೊಂದಿಗೆ ಸೂಪರ್-8 ಹಂತದ ಹಣಾಹಣಿ ಶುರುವಾಗಲಿವೆ. ಗ್ರಾಸ್ ಐಲೆಟ್, ಬ್ರಿಜ್ಟೌನ್, ಸೇಂಟ್ ವಿನ್ಸೆಂಟ್ನಲ್ಲಿ ಸೂಪರ್-8ನ ಇತರ ಪಂದ್ಯಗಳು ನಿಗದಿಯಾಗಿವೆ. ಈ ಪೈಕಿ ಬಹುತೇಕ ಎಲ್ಲ ಸ್ಥಳಗಳಲ್ಲಿ ಮಳೆ ಭೀತಿ ಇದೆ. ಜೂನ್ 24ರಂದು ಗ್ರಾಸ್ ಐಲೆಟ್ನಲ್ಲಿ ನಿಗದಿಯಾಗಿರುವ ಭಾರತ-ಆಸೀಸ್ ನಡುವಿನ ಪ್ರಮುಖ ಪಂದ್ಯವೂ ಮಳೆಯಿಂದ ರದ್ದಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ವರದಿ ತಿಳಿಸಿದೆ. ಹೀಗಾಗಿ ಸೆಮಿಫೈನಲ್ಗೇರುವ ತಂಡಗಳನ್ನು ನಿರ್ಧರಿಸುವಲ್ಲೂ ಮಳೆ ಪ್ರಮುಖ ಪಾತ್ರ ನಿರ್ವಹಿಸಿದರೆ ಅಚ್ಚರಿ ಇಲ್ಲವೆನಿಸಿದೆ. ಜೂನ್ 29ರಂದು ಬ್ರಿಜ್ಟೌನ್ನಲ್ಲಿ ನಿಗದಿಯಾಗಿರುವ ಫೈನಲ್ ಪಂದ್ಯವೂ ಮಳೆ ಭೀತಿಯಿಂದ ಮುಕ್ತವಾಗಿಲ್ಲ. ಆದರೆ ಈ ಪಂದ್ಯಕ್ಕೆ ಮೀಸಲು ದಿನವಿರುವುದು ಸಮಾಧಾನಕರ.