ಬ್ರಿಸ್ಬೇನ್: ರವಿಚಂದ್ರನ್-ಚಿತ್ರಾ ದಂಪತಿಗೆ 1986ರ ಸೆಪ್ಟೆಂಬರ್ 17ರಂದು ಮದ್ರಾಸ್ನಲ್ಲಿ (ಈಗಿನ ಚೆನ್ನೈ) ಜನಿಸಿದ ಆರ್. ಅಶ್ವಿನ್ ತಂದೆ ಕ್ಲಬ್ ಮಟ್ಟದ ಕ್ರಿಕೆಟಿಗರಾಗಿದ್ದರು. ತಂದೆಯಂತೆಯೇ ವೇಗದ ಬೌಲರ್ ಆಗುವುದು ಅಶ್ವಿನ್ ಕನಸಾಗಿತ್ತು. ಬಾಲ್ಯದಲ್ಲಿ ತಂದೆಯೊಂದಿಗೆ ಚೆಪಾಕ್ ಮೈದಾನಕ್ಕೆ ಭಾರತ ತಂಡದ ಪಂದ್ಯಗಳನ್ನೂ ನೋಡಲು ಹೋಗುತ್ತಿದ್ದರು. ಆದರೆ ವೇಗದ ಎಸೆತಗಳನ್ನು ಎಸೆದ ಬಳಿಕ ಸುಸ್ತಾಗುತ್ತಿದ್ದ ಅವರು, ಕೋಚ್ ಸಲಹೆಯ ಮೇರೆಗೆ ಆಫ್ ಸ್ಪಿನ್ನರ್ ಆಗಿ ಬದಲಾಗಿದ್ದರು. ಅಲ್ಲಿಂದ ಅಶ್ವಿನ್ ಕ್ರಿಕೆಟರ್ ಆಗಿ ಹೊಸ ಏಳ್ಗೆಯನ್ನು ಕಾಣಲಾರಂಭಿಸಿದರು.
ಬ್ಯಾಟಿಂಗ್ನಲ್ಲೂ ಆಸಕ್ತಿ ಹೊಂದಿದ್ದ ಅವರು 17 ವಯೋಮಿತಿ ಭಾರತ ತಂಡದಲ್ಲಿ ಆರಂಭಿಕ ಬ್ಯಾಟರ್ ಆಗಿ ಆಡಿದ್ದರು. ಆಫ್ ಸ್ಪಿನ್ ಬೌಲಿಂಗ್ನಲ್ಲಿ ಕೇವಲ ದೂಸ್ರಾಗೆ ಒಗ್ಗಿಕೊಳ್ಳದೆ ಕೇರಂ ಬಾಲ್ನಂಥ ಬೌಲಿಂಗ್ ವೈವಿಧ್ಯತೆಯನ್ನೂ ಸಾಧಿಸಿದರು. 2009ರಲ್ಲಿ ಚೆನ್ನೈ ಸೂಪರ್ಕಿಂಗ್ಸ್ ಪರ ಐಪಿಎಲ್ಗೆ ಪದಾರ್ಪಣೆ ಮಾಡಿದರೂ ಎರಡೇ ಪಂದ್ಯ ಆಡಿದ್ದ ಅಶ್ವಿನ್, 2010ರಲ್ಲಿ 13 ವಿಕೆಟ್ ಕಬಳಿಸಿ ಮಿಂಚಿದರು. ಅದೇ ವರ್ಷ ಸಿಎಸ್ಕೆ ಚೊಚ್ಚಲ ಐಪಿಎಲ್ ಪ್ರಶಸ್ತಿಯನ್ನೂ ಗೆಲ್ಲುವುದರೊಂದಿಗೆ ಅಶ್ವಿನ್ಗೆ ಟೀಮ್ ಇಂಡಿಯಾದ ಬಾಗಿಲು ತೆರೆದಿತ್ತು.
ನಂತರ 2011ರ ಏಕದಿನ ವಿಶ್ವಕಪ್ ವಿಜೇತ ತಂಡದಲ್ಲಿದ್ದ ಅವರು ಅದೇ ವರ್ಷ ಟೆಸ್ಟ್ ಕ್ರಿಕೆಟ್ಗೂ ಪದಾರ್ಪಣೆ ಮಾಡಿದ್ದರು. ನಂತರದಲ್ಲಿ ಭಾರತದ "ಮ್ಯಾಚ್ ವಿನ್ನರ್' ಮಾತ್ರವಲ್ಲದೆ "ಸಿರೀಸ್ ವಿನ್ನರ್' ಬೌಲರ್ ಆಗಿಯೂ ಬೆಳೆದರು. ಏಕದಿನ, ಟಿ20 ಪಂದ್ಯಗಳನ್ನು ಮೊದಲಿಗೆ ಆಡಿದರೂ, ನಂತರದಲ್ಲಿ ಆಡಿದ ಟೆಸ್ಟ್ ಪಂದ್ಯವೇ ಅವರು ವೃತ್ತಿಜೀವನದಲ್ಲಿ ದಿಗ್ಗಜ ಸ್ಪಿನ್ನರ್ ಆಗಿ ಬೆಳೆಯುವಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿತು.