ಬೆಂಗಳೂರು: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಭಾರತ ತಂಡ ಪ್ರಕಟಗೊಂಡ ಬೆನ್ನಲ್ಲೇ, ದುಲೀಪ್ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯ 2ನೇ ಲೀಗ್ ಪಂದ್ಯಗಳಿಗೆ ತಂಡಗಳಲ್ಲಿ ಕೆಲ ಬದಲಾವಣೆ ಮಾಡಲಾಗಿದೆ. ಟೆಸ್ಟ್ ತಂಡದಲ್ಲಿ ಸ್ಥಾನ ಪಡೆದ ಹಿನ್ನೆಲೆಯಲ್ಲಿ ಶುಭಮಾನ್ ಗಿಲ್, ಕನ್ನಡಿಗ ಕೆಎಲ್ ರಾಹುಲ್, ಕುಲದೀಪ್ ಯಾದವ್, ಧ್ರುವ ಜುರೆಲ್ ಮತ್ತು ಆಕಾಶ್ದೀಪ್ ಭಾರತ ಎ ತಂಡದಿಂದ ಹೊರಬಿದ್ದಿದ್ದಾರೆ. ಗಿಲ್ ಗೈರಿನಲ್ಲಿ ಕನ್ನಡಿಗ ಮಯಾಂಕ್ ಅಗರ್ವಾಲ್ ಭಾರತ ಎ ತಂಡದ ನಾಯಕರಾಗಿ ಆಯ್ಕೆಯಾಗಿದ್ದಾರೆ. ಅಕ್ಷಯ್ ನಾರಂಗ್, ಸೈಕ್ ರಶೀದ್, ಶಮ್ಸ್ ಮುಲಾನಿ ಬದಲಿ ಆಟಗಾರರಾಗಿ ಭಾರತ ಎ ತಂಡಕ್ಕೆ ಸೇರ್ಪಡೆಯಾಗಿದ್ದಾರೆ. ಫಿಟ್ನೆಸ್ ಸಮಸ್ಯೆಯಿಂದ ಮೊದಲ ಪಂದ್ಯಕ್ಕೆ ಗೈರಾಗಿದ್ದ ಕನ್ನಡಿಗ ಪ್ರಸಿದ್ಧ ಕೃಷ್ಣ 2ನೇ ಪಂದ್ಯಕ್ಕೆ ಭಾರತ ಎ ತಂಡಕ್ಕೆ ಮರಳಿದ್ದಾರೆ.
ದುಲೀಪ್ ಟ್ರೋಫಿಯ 2ನೇ ಲೀಗ್ ಪಂದ್ಯಗಳು ಅನಂತಪುರದಲ್ಲಿ ನಡೆಯಲಿದ್ದು, ಭಾರತ ಎ ತಂಡ ಶ್ರೇಯಸ್ ಅಯ್ಯರ್ ಸಾರಥ್ಯದ ಭಾರತ ಡಿ ತಂಡವನ್ನು ಎದುರಿಸಲಿದೆ. ಮತ್ತೊಂದು ಪಂದ್ಯದಲ್ಲಿ ಭಾರತ ಬಿ-ಸಿ ತಂಡಗಳು ಮುಖಾಮುಖಿ ಆಗಲಿವೆ.
ಟೆಸ್ಟ್ ತಂಡಕ್ಕೆ ಮರಳಿದ ಹಿನ್ನೆಲೆಯಲ್ಲಿ ವಿಕೆಟ್ ಕೀಪರ್&ಬ್ಯಾಟರ್ ರಿಷಭ್ ಪಂತ್ ಜತೆಗೆ ಇತರ ಟೆಸ್ಟ್ ಆಟಗಾರರಾದ ಯಶಸ್ವಿ ಜೈಸ್ವಾಲ್, ಸ್ರಾರ್ಜ್ ಖಾನ್, ಯಶ್ ದಯಾಳ್ ಭಾರತ ಬಿ ತಂಡದಿಂದ ಹೊರಬಿದ್ದಿದ್ದು, ರಿಂಕು ಸಿಂಗ್, ಸುಯಶ್ ಪ್ರಭುದೇಸಾಯಿ, ಹಿಮಾಂಶು ಮಂತ್ರಿ ಬದಲಿಗರಾಗಿ ಸೇರ್ಪಡೆಯಾಗಿದ್ದಾರೆ. ಭಾರತ ಡಿ ತಂಡದಲ್ಲಿ ಅಕ್ಷರ್ ಪಟೇಲ್ ಬದಲಿಗೆ ನಿಶಾಂತ್ ಮತ್ತು ತುಷಾರ್ ದೇಶಪಾಂಡೆ ಬದಲಿಗೆ ಕನ್ನಡಿಗ ವಿದ್ವತ್ ಕಾವೇರಪ್ಪ ಸ್ಥಾನ ಪಡೆದಿದ್ದಾರೆ. ಭಾರತ ಸಿ ತಂಡದಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ.
ಭಾರತ ಟಿ20 ತಂಡದ ನಾಯಕ ಸೂರ್ಯಕುಮಾರ್ ಯಾದವ್ 2ನೇ ಪಂದ್ಯಗಳಿಗೆ ಫಿಟ್ ಆಗಿದ್ದಾರೆ ಎಂದು ವರದಿಯಾಗಿದ್ದರೂ, ದುಲೀಪ್ ಟ್ರೋಫಿಯಲ್ಲಿ ಯಾವ ತಂಡದ ಪರ ಆಡಲಿದ್ದಾರೆ ಎಂಬುದು ಸ್ಪಷ್ಟವಾಗಿಲ್ಲ.
ಪರಿಷ್ಕೃತ ತಂಡಗಳು:
ಭಾರತ ಎ: ಮಯಾಂಕ್ ಅಗರ್ವಾಲ್ (ನಾಯಕ), ರಿಯಾನ್ ಪರಾಗ್, ಅಕ್ಷಯ್ ನಾರಂಗ್, ಎಸ್ಕೆ ರಶೀದ್, ತಿಲಕ್ ವರ್ಮ, ಶಿವಂ ದುಬೆ, ತನುಷ್ ಕೋಟ್ಯಾನ್, ಶಮ್ಸ್ ಮುಲಾನಿ, ಪ್ರಸಿದ್ಧ ಕೃಷ್ಣ, ಖಲೀಲ್ ಅಹ್ಮದ್, ಆವೇಶ್ ಖಾನ್; ಕೋಚ್ ಸುನೀಲ್ ಜೋಷಿ;
ಭಾರತ ಬಿ: ಅಭಿಮನ್ಯು ಈಶ್ವರನ್ (ನಾಯಕ), ರಿಂಕು ಸಿಂಗ್, ನವದೀಪ್ ಸೈನಿ, ವಾಷಿಂಗ್ಟನ್ ಸುಂದರ್, ಮುಕೇಶ್ ಕುಮಾರ್, ಸಾಯಿ ಕಿಶೋರ್, ಮುಶೀರ್ ಖಾನ್, ನಿತೇಶ್ ಕುಮಾರ್ ರೆಡ್ಡಿ, ಸುಯಶ್ ಪ್ರಭುದೇಸಾಯಿ, ರಾಹುಲ್ ಚಹರ್, ಎನ್. ಜಗದೀಶನ್, ಹಿಮಾಂಶು ಮಂತ್ರಿ; ಕೋಚ್: ಸಿತಾಂಶು ಕೋಟಕ್.