ನ್ಯೂಯಾರ್ಕ್: ವೇಗಿ ಅನ್ರಿಚ್ ನೋಕಿಯಾ (7ಕ್ಕೆ 4) ಮಾರಕ ಬೌಲಿಂಗ್ ದಾಳಿ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡ ಟಿ20 ವಿಶ್ವಕಪ್ ಟೂರ್ನಿಯ ಡಿ ಗುಂಪಿನ ಮೊದಲ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು ಅಲ್ಪ ಮೊತ್ತಕ್ಕೆ ನಿಯಂತ್ರಿಸಿ 6 ವಿಕೆಟ್ಗಳಿಂದ ಗೆಲುವು ದಾಖಲಿಸಿದೆ.
ನಾಸೌ ಕೌಂಟಿ ಸ್ಟೇಡಿಯಂನಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದ ಲಂಕಾ ರನ್ ಗಳಿಸಲು ತಿಣುಕಾಡಿ 19.1 ಓವರ್ಗಳಲ್ಲಿ ಕೇವಲ 77 ರನ್ಗಳಿಗೆ ಆಲೌಟ್ ಆಯಿತು. ಇದು ಟಿ20 ಕ್ರಿಕೆಟ್ನಲ್ಲಿ ಲಂಕಾದ ಕನಿಷ್ಠ ಮೊತ್ತವಾಗಿದೆ. ಪ್ರತಿಯಾಗಿ ದ. ಆಫ್ರಿಕಾ 16.2 ಓವರ್ಗಳಲ್ಲಿ 4 ವಿಕೆಟ್ಗೆ 80 ರನ್ ಗಳಿಸಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿತು. ಕ್ವಿಂಟನ್ ಡಿಕಾಕ್ (20) ಮತ್ತು ಹೆನ್ರಿಕ್ ಕ್ಲಾಸೆನ್ (19*) ಬ್ಯಾಟಿಂಗ್ಗೆ ಕಠಿಣವೆನಿಸಿದ ಪಿಚ್ನಲ್ಲಿ ಹರಿಣಗಳ ಚೇಸಿಂಗ್ಗೆ ನೆರವಾದರು. ಲಂಕಾ ಮತ್ತು ಆಫ್ರಿಕಾ ಇನಿಂಗ್ಸ್ನಲ್ಲಿ ತಲಾ 3 ಬೌಂಡರಿ, ಸಿಕ್ಸರ್ಗಳಷ್ಟೇ ಸಿಡಿದವು.
ಲಂಕಾಗೆ ಲಗಾಮು: ಆಫ್ರಿಕಾ ಬಿಗಿ ದಾಳಿ ಎದುರು ಪವರ್ಪ್ಲೇನಲ್ಲಿ ಕೇವಲ 24 ರನ್ ಗಳಿಸಿದ ಲಂಕಾ, ನಂತರದಲ್ಲಿ ನಿರಂತರ ವಿಕೆಟ್ ಕಳೆದುಕೊಂಡಿತು. 10ನೇ ಓವರ್ನಲ್ಲಿ 40 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟ ಎದುರಿಸಿದ ಲಂಕಾಗೆ ಕಗಿಸೊ ರಬಾಡ (21ಕ್ಕೆ 2) ಮತ್ತು ಸ್ಪಿನ್ನರ್ ಕೇಶವ್ ಮಹಾರಾಜ್ (22ಕ್ಕೆ 2) ಕೂಡ ಕಡಿವಾಣ ಹೇರಿದರು.
ಪಂದ್ಯದಲ್ಲಿ ಒಟ್ಟಾರೆ 35.3 ಓವರ್ಗಳಲ್ಲಿ 157 ರನ್ಗಳಷ್ಟೇ ದಾಖಲಾದವು. ಇದರಲ್ಲಿ ತಲಾ 6 ಸಿಕ್ಸರ್, ಬೌಂಡರಿಗಳಿದ್ದವು. ಪ್ರತಿ ಓವರ್ಗೆ 4.42ರ ಸರಾಸರಿಯಲ್ಲಿ ರನ್ ಸಿಡಿಯಿತು. ಇದು ಟಿ20 ವಿಶ್ವಕಪ್ ಪಂದ್ಯದಲ್ಲಿ ಕನಿಷ್ಠ ರನ್ರೇಟ್ ಆಗಿದೆ.
ಶ್ರೀಲಂಕಾ: 19.1 ಓವರ್ಗಳಲ್ಲಿ 77 (ನಿಸ್ಸಂಕಾ 3, ಕುಸಲ್ ಮೆಂಡಿಸ್ 19, ಕಮಿಂಡು 11, ಹಸರಂಗ 0, ಸಮರವಿಕ್ರಮ 0, ಅಸಲಂಕಾ 6, ಮ್ಯಾಥ್ಯೂಸ್ 16, ಶನಕ 9, ನೋಕಿಯಾ 7ಕ್ಕೆ 4, ಮಹಾರಾಜ್ 22ಕ್ಕೆ 2, ರಬಾಡ 21ಕ್ಕೆ 2). ದಕ್ಷಿಣ ಆಫ್ರಿಕಾ: 16.2 ಓವರ್ಗಳಲ್ಲಿ 4 ವಿಕೆಟ್ಗೆ 80 (ಡಿಕಾಕ್ 20, ಮಾರ್ಕ್ರಮ್ 12, ಸ್ಟಬ್ಸ್ 13, ಕ್ಲಾಸೆನ್ 19*, ಮಿಲ್ಲರ್ 6, ಹಸರಂಗ 22ಕ್ಕೆ 2, ಶನಕ 6ಕ್ಕೆ 1, ತುಷಾರ 18ಕ್ಕೆ 1).