ನವದೆಹಲಿ: ಭಾರತ ಟೆಸ್ಟ್ ತಂಡದ ಅನುಭವಿ ಬ್ಯಾಟರ್ ಅಜಿಂಕ್ಯ ರಹಾನೆ ( Ajinkya Rahane ) ತಮ್ಮ ವೃತ್ತಿಜೀವನದಲ್ಲಿ ತಾವು ಆಡಿದ ಮತ್ತು ಜತೆಯಲ್ಲಿ ಡ್ರೆಸ್ಸಿಂಗ್ ರೂಮ್ ಹಂಚಿಕೊಂಡ ಆಟಗಾರರನ್ನು ಒಳಗೊಂಡ 'ಸಾರ್ವಕಾಲಿಕ ಅತ್ಯುತ್ತಮ ಭಾರತೀಯ ಟೆಸ್ಟ್ 11' (All-Time India Test XI) ತಂಡವನ್ನು ಆಯ್ಕೆ ಮಾಡಿದ್ದಾರೆ.
ಎರಡು ದಶಕಗಳ ಕಾಲ ಸಚಿನ್ ತೆಂಡೂಲ್ಕರ್ ಅವರಿಂದ ಹಿಡಿದು ಚೇತೇಶ್ವರ್ ಪೂಜಾರ ಅವರವರೆಗೆ ಹಲವು ದಿಗ್ಗಜರೊಂದಿಗೆ ಆಡಿದ ಅನುಭವ ಹೊಂದಿರುವ ರಹಾನೆ, ತಮ್ಮ ಸಾರ್ವಕಾಲಿಕ ಟೆಸ್ಟ್ ತಂಡವನ್ನು ಪ್ರಕಟಿಸುತ್ತಿದ್ದಂತೆಯೇ ಕ್ರಿಕೆಟ್ ಅಭಿಮಾನಿಗಳು ಭಾರೀ ಆಶ್ಚರ್ಯಚಕಿತರಾಗಿದ್ದಾರೆ. ಏಕೆಂದರೆ, ಆಧುನಿಕ ಕ್ರಿಕೆಟ್‌ನ ಇಬ್ಬರು ಸ್ಟಾರ್ ಆಟಗಾರರಾದ ವಿರಾಟ್ ಕೊಹ್ಲಿ ಹಾಗೂ ಮಾರಕ ವೇಗಿ ಜಸ್ಪ್ರೀತ್ ಬುಮ್ರಾ ಅವರಿಗೆ ರಹಾನೆ ತಂಡದಲ್ಲಿ ಜಾಗವೇ ಸಿಕ್ಕಿಲ್ಲ!
ಹೇಳಬೇಕೆಂದರೆ, ಆಧುನಿಕ ಭಾರತೀಯ ಟೆಸ್ಟ್ ತಂಡವನ್ನು ವಿರಾಟ್ ಕೊಹ್ಲಿಯ ಆಕ್ರಮಣಕಾರಿ ನಾಯಕತ್ವ ಹಾಗೂ ಜಸ್ಪ್ರೀತ್ ಬುಮ್ರಾ ಅವರ ಮಾರಕ ವೇಗವಿಲ್ಲದೆ ಕಲ್ಪಿಸಿಕೊಳ್ಳುವುದು ಅಸಾಧ್ಯ. ವಿದೇಶಿ ಮಣ್ಣಿನಲ್ಲಿ ಭಾರತ ತಂಡ ಜಯಭೇರಿ ಬಾರಿಸುವಂತೆ ಮಾಡಿದ ಶ್ರೇಯಸ್ಸು ಕೊಹ್ಲಿಗೆ ಸಲ್ಲುತ್ತದೆ. ಇತ್ತ ಬುಮ್ರಾ ಭಾರತ ಕಂಡ ಸಾರ್ವಕಾಲಿಕ ಅತ್ಯುತ್ತಮ ವೇಗಿಗಳಲ್ಲಿ ಒಬ್ಬರಾಗಿದ್ದಾರೆ. ಇಂತಹ ಘಟಾನುಘಟಿ ಆಟಗಾರರನ್ನು ರಹಾನೆ ತಮ್ಮ ತಂಡದಿಂದ ಹೊರಗಿಟ್ಟಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ತಂಡದ ಆಯ್ಕೆಯ ಕುರಿತು ವಿಶ್ಲೇಷಿಸಿದರೆ, ರಹಾನೆ ಅವರು ಸಂಪೂರ್ಣವಾಗಿ ಆಟಗಾರರ ಹುದ್ದೆ ಮತ್ತು ಕ್ರಮಾಂಕದ ಆಧಾರದ ಮೇಲೆ ತಂಡವನ್ನು ಕಟ್ಟಿದ್ದಾರೆ. ಕೊಹ್ಲಿ ಬ್ಯಾಟ್ ಮಾಡುವ 4ನೇ ಕ್ರಮಾಂಕದಲ್ಲಿ ರಹಾನೆ ಅವರು ಕ್ರಿಕೆಟ್ ದೇವರಾದ ಸಚಿನ್ ತೆಂಡೂಲ್ಕರ್ ಅವರನ್ನು ಆಯ್ಕೆ ಮಾಡಿದ್ದಾರೆ. ಸಚಿನ್ ಅವರ ಉಪಸ್ಥಿತಿಯಿಂದಾಗಿ ಕೊಹ್ಲಿಗೆ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಜಾಗವಿಲ್ಲದಂತಾಯಿತು. ಆದರೆ, ಕೊಹ್ಲಿ ಜತೆ ಅನೇಕ ಐತಿಹಾಸಿಕ ಜಂಟಿ ಪಾಲುದಾರಿಕೆಗಳನ್ನು ನೀಡಿದ್ದ ರಹಾನೆ, ಕೊಹ್ಲಿಯನ್ನು ಬಿಟ್ಟಿರುವುದು ಅಭಿಮಾನಿಗಳಿಗೆ ತುಸು ಬೇಸರ ತರಿಸಿದೆ.
ರಹಾನೆ ತಮ್ಮ ಆರಂಭಿಕ ಕ್ರಮಾಂಕದಲ್ಲಿ ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ಮಾರ್ಗದರ್ಶನ ನೀಡಿದ ಹಾಗೂ ವಿದೇಶಿ ನೆಲದಲ್ಲಿ ಹೊಸ ಚೆಂಡನ್ನು ಸಮರ್ಥವಾಗಿ ಎದುರಿಸಿದ್ದ ಮುರಳಿ ವಿಜಯ್ ಹಾಗೂ ಶಿಖರ್ ಧವನ್ ಜೋಡಿಗೆ ಮಣೆ ಹಾಕಿದ್ದಾರೆ. 2010ರ ದಶಕದ ಮಧ್ಯಭಾಗದಲ್ಲಿ ಈ ಜೋಡಿ ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತಕ್ಕೆ ಅತ್ಯುತ್ತಮ ಆರಂಭ ನೀಡುವ ಮೂಲಕ ಹೆಸರು ಮಾಡಿತ್ತು.
3ನೇ ಕ್ರಮಾಂಕದಲ್ಲಿ ರಾಹುಲ್ ದ್ರಾವಿಡ್ ಮತ್ತು ಸಚಿನ್ ತೆಂಡೂಲ್ಕರ್ 4ನೇ ಕ್ರಮಾಂಕದಲ್ಲಿ ಜಾಗ ಪಡೆದರೆ, ರಹಾನೆ ತಮ್ಮನ್ನು ತಾವು 5ನೇ ಕ್ರಮಾಂಕದ ಬ್ಯಾಟರ್ ಆಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ದ್ರಾವಿಡ್ ಮತ್ತು ಸಚಿನ್ ಅವರಂತಹ ಭದ್ರ ಬುನಾದಿಯ ಆಟಗಾರರು ಮಧ್ಯಮ ಕ್ರಮಾಂಕಕ್ಕೆ ಅತ್ಯಂತ ಬಲ ತುಂಬಲಿದ್ದಾರೆ ಎಂಬುದು ರಹಾನೆ ಅವರ ಯೋಚನೆಯಾಗಿದೆ.
ತಂಡದ ವಿಕೆಟ್ ಕೀಪರ್ ಹಾಗೂ ನಾಯಕತ್ವದ ಜವಾಬ್ದಾರಿಯನ್ನು ರಹಾನೆ ಅವರು ಮಹೇಂದ್ರ ಸಿಂಗ್ ಧೋನಿ ಅವರಿಗೆ ನೀಡಿದ್ದಾರೆ. ಧೋನಿ ಅವರ ಟೆಸ್ಟ್ ದಾಖಲೆಗಳು ಏಕದಿನ ಹಾಗೂ ಟಿ20 ಸಾಧನೆಗಳ ಮುಂದೆ ಕೊಂಚ ಮರೆಯಾಗಿದ್ದರೂ, ಧೋನಿ ಅವರ ಕೂಲ್ ನಾಯಕತ್ವ ಹಾಗೂ ಪಂದ್ಯವನ್ನು ಕಂಟ್ರೋಲ್ ಮಾಡುವ ಸಾಮರ್ಥ್ಯಕ್ಕೆ ರಹಾನೆ ನೀಡಿರುವ ಗೌರವ ಇದಾಗಿದೆ.
ಬೌಲಿಂಗ್ ವಿಭಾಗದಲ್ಲಿ ರವೀಂದ್ರ ಜಡೇಜಾ ಮತ್ತು ರವಿಚಂದ್ರನ್ ಅಶ್ವಿನ್ ಸ್ಪಿನ್ ವಿಭಾಗವನ್ನು ಸಂಭಾಳಿಸಲಿದ್ದಾರೆ. ಇನ್ನು ವೇಗದ ಬೌಲಿಂಗ್ ವಿಭಾಗದಲ್ಲಿ ಭುವನೇಶ್ವರ್ ಕುಮಾರ್, ಮೊಹಮ್ಮದ್ ಶಮಿ ಮತ್ತು ಇಶಾಂತ್ ಶರ್ಮಾ ಅವರಿಗೆ ಜಾಗ ಸಿಕ್ಕಿದೆ. ಆದರೆ, ಜಸ್ಪ್ರೀತ್ ಬುಮ್ರಾ ಅವರಂತಹ ವಿಶ್ವದ ನಂ.1 ವೇಗಿಯನ್ನು ಕೈಬಿಟ್ಟಿರುವುದು ಅಭಿಮಾನಿಗಳಿಗೆ ಯಕ್ಷಪ್ರಶ್ನೆಯಾಗಿಯೇ ಉಳಿದಿದೆ, (ಏಜೆನ್ಸೀಸ್).