ಹಾಂಗ್ರೆೌ: ಆಧುನಿಕ ಕ್ರೀಡಾಸ್ಪರ್ಧೆಗಳಾಗಿ ಇ-ಸ್ಪೋರ್ಟ್ಸ್ (ವಿಡಿಯೋಗೇಮ್) ಮತ್ತು ಬ್ರೇಕ್ ಡ್ಯಾನ್ಸಿಂಗ್ ಈ ಬಾರಿ ಏಷ್ಯಾಡ್ಗೆ ಹೊಸದಾಗಿ ಸೇರ್ಪಡೆಗೊಂಡಿವೆ. ಪಬ್ಜಿ, ಸ್ಟ್ರೀಟ್ ಫೈಟರ್-5 ಸಹಿತ ಒಟ್ಟು 7 ವಿಡಿಯೋ ಗೇಮ್ ಸ್ಪರ್ಧೆಗಳು ಇ-ಸ್ಪೋರ್ಟ್ಸ್ನಲ್ಲಿರಲಿವೆ. ಭಾರತವೂ ಇದಕ್ಕೆ 15 ಸ್ಪರ್ಧಿಗಳನ್ನು ಕಳುಹಿಸಿದ್ದು, ಫಿಫಾ ಆನ್ಲೈನ್ ಗೇಮ್ನಲ್ಲಿ ಪದಕ ಗೆಲ್ಲುವ ನಿರೀಕ್ಷೆಯೂ ಇದೆ.
ನೃತ್ಯ ಕೌಶಲ ಪ್ರಾಮುಖ್ಯತೆಯ ಬ್ರೇಕ್ ಡ್ಯಾನ್ಸಿಂಗ್ ಮುಂದಿನ ವರ್ಷದ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲೂ ಇರಲಿದ್ದು, ಅದಕ್ಕೆ ಪೂರ್ವಭಾವಿಯಾಗಿ ಏಷ್ಯಾಡ್ನಲ್ಲಿ ಈ ಸ್ಪರ್ಧೆಯನ್ನು ಪರಿಚಯಿಸಲಾಗುತ್ತಿದೆ. ಕಳೆದ ಆವೃತ್ತಿಯಲ್ಲಿ ಹೊಸದಾಗಿ ಸೇರ್ಪಡೆಯಾಗಿದ್ದ ಕಾರ್ಡ್ಗೇಮ್ "ಬ್ರಿಡ್ಜ್' ಈ ಸಲವೂ ಮುಂದುವರಿದಿದೆ.
ಏಷ್ಯಾಡ್ನಲ್ಲಿ 13 ವರ್ಷಗಳ ಬಳಿಕ ಚೆಸ್, 9 ವರ್ಷಗಳ ಬಳಿಕ ಕ್ರಿಕೆಟ್ನಲ್ಲಿ ಚಿನ್ನ ಗೆಲ್ಲುವ ಅವಕಾಶ
ಏಷ್ಯನ್ ಗೇಮ್ಸ್ನಲ್ಲಿ ಈ ಬಾರಿ ಚೆಸ್ ಮತ್ತು ಕ್ರಿಕೆಟ್ ಸ್ಪರ್ಧೆಗಳು ಮರುಸೇರ್ಪಡೆಯಾಗಿವೆ. ಚೆಸ್ 13 ವರ್ಷಗಳ ಬಳಿಕ ಮತ್ತು ಕ್ರಿಕೆಟ್ 9 ವರ್ಷಗಳ ಬಳಿಕ ಮರಳುತ್ತಿದೆ. ಇವೆರಡರಲ್ಲೂ ಭಾರತ ಹೆಚ್ಚಿನ ಪದಕ ಗೆಲ್ಲುವ ನಿರೀಕ್ಷೆ ಇದೆ. ಚೆಸ್ನಲ್ಲಿ ಬಲಿಷ್ಠ ತಂಡವೇ ಕಣಕ್ಕಿಳಿಯುತ್ತಿದ್ದರೆ, ವಿಶ್ವಕಪ್ ಹಿನ್ನೆಲೆಯಲ್ಲಿ ಪುರುಷರ ಕ್ರಿಕೆಟ್ನಲ್ಲಿ ಭಾರತ ಮಾತ್ರವಲ್ಲದೆ, ಪಾಕ್, ಶ್ರೀಲಂಕಾ, ಬಾಂಗ್ಲಾದೇಶವೂ 2ನೇ ದರ್ಜೆ ತಂಡವನ್ನು ಕಣಕ್ಕಿಳಿಸುತ್ತಿದೆ.
ಒಲಿಂಪಿಕ್ಸ್ ಅರ್ಹತೆ ಅವಕಾಶ
ಮುಂದಿನ ವರ್ಷದ ಪ್ಯಾರಿಸ್ ಒಲಿಂಪಿಕ್ಸ್ಗೆ ಸಿದ್ಧತೆ ನಡೆಸಲು ಮತ್ತು ಅರ್ಹತೆ ಸಂಪಾದಿಸಲು ಕೂಡ ಏಷ್ಯನ್ ಗೇಮ್ಸ್ನಲ್ಲಿ ಅವಕಾಶವಿದೆ. 9 ಕ್ರೀಡೆಗಳಾದ ಆರ್ಚರಿ, ಆರ್ಟಿಸ್ಟಿಕ್ ಸ್ವಿಮ್ಮಿಂಗ್, ಬಾಕ್ಸಿಂಗ್, ಬ್ರೇಕ್ ಡ್ಯಾನ್ಸ್, ಹಾಕಿ, ಸೈಲಿಂಗ್, ಟೆನಿಸ್, ವಾಟರ್ಪೋಲೋ ಮತ್ತು ಮಾಡರ್ನ್ ಪೆಂಟಾಥ್ಲಾನ್ನಲ್ಲಿ ಚಿನ್ನ ಗೆದ್ದರೆ ಒಲಿಂಪಿಕ್ಸ್ ಅರ್ಹತೆ ಗಳಿಸಬಹುದಾಗಿದೆ. ಇನ್ನು ಅಥ್ಲೆಟಿಕ್ಸ್, ಈಜಿನಲ್ಲಿ ಪದಕ ಗೆಲ್ಲದಿದ್ದರೂ, ಒಲಿಂಪಿಕ್ಸ್ ಅರ್ಹತಾ ಮಾನದಂಡದ ನಿರ್ವಹಣೆ ತೋರಿದರೆ ಅರ್ಹತೆ ಗಳಿಸಬಹುದಾಗಿದೆ.