ನವದೆಹಲಿ: ಟಿ-20 ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಸೋಲುವ ಮೂಲಕ ಪಾಕಿಸ್ತಾನದ ಕಪ್ ಗೆಲ್ಲುವ ಆಸೆಗೆ ತಣ್ಣಿರೆರಚಿದಂತಾಗಿದೆ. ಇದೀಗ ಪಾಕಿಸ್ತಾನದ ಆಟಗಾರರು ಹಾಗೂ ಫ್ಯಾನ್ಸ್ ನಿರಾಸೆಯ ಮುಖ ಹೊತ್ತಿದ್ದಾರೆ. ಈ ನಡುವೆ ಈ ಬಾರಿಯ ಟಿ-20 ವಿಶ್ವಕಪ್ನ್ನು ಪಾಕಿಸ್ತಾನ ಗೆದ್ದೇ ಗೆಲ್ಲುತ್ತದೆ ಎಂಬ ನಂಬಿಕೆಯಲ್ಲಿ, ಪಾಕಿಸ್ತಾನದ ಕೆಲವು ಮಾಜಿ ಆಟಗಾರರು ಅನೇಕ ಹೇಳಿಕೆಗಳನ್ನು ನೀಡಿದ್ದರು. ತನ್ನ ಹೇಳಿಕೆಗಳ ಮೂಲಕ ಎದುರಾಳಿಗಳ ಆತ್ಮವಿಶ್ವಾಸವನ್ನು ಕಡಿಮೆ ಮಾಡುವ ಕೆಲಸ ಮಾಡುತ್ತಿದ್ದವರಲ್ಲಿ ಪಾಕ್ನ ಮಾಜಿ ಆಟಗಾರ ಶೋಯೆಬ್ ಅಖ್ತರ್ ಅಗ್ರಗಣ್ಯರು.
ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ ಅಖ್ತರ್, ಇಂಗ್ಲೆಂಡ್ ತಂಡ ಅತಿಯಾದ ಆತ್ಮವಿಶ್ವಾಸದಲ್ಲಿದೆ. ನಾವು ಫೈನಲ್ ಆಡುತ್ತಿರುವುದು ಪಾಕಿಸ್ತಾನ ತಂಡದ ವಿರುದ್ಧ. ಭಾರತೀಯ ಬೌಲರ್ಗಳಂತಲ್ಲ ಪಾಕ್ ಬೌಲರ್ಗಳು ಎಂದು ಹೇಳಿದ್ದರು.
ಇದೀಗ ಪಾಕಿಸ್ತಾನ ಫೈನಲ್ನಲ್ಲಿ ಸೋಲೊಪ್ಪಿಕೊಳ್ಳುತ್ತಿದ್ದಂತೆ, ಅಖ್ತರ್ ಮೌನವಾಗಿದ್ದಾರೆ. ತಾನಾಡಿದ ಅತಿಯಾದ ಆತ್ಮವಿಶ್ವಾಸದ ಮಾತುಗಳನ್ನೆಲ್ಲಾ ಹಿಂತೆಗೆದುಕೊಳ್ಳಬೇಕಾದ ಸಂದರ್ಭ ಎದುರಾಗಿದೆ. ಅದರಲ್ಲೂ ಸೆಮಿಫೈನಲ್ನಲ್ಲಿ ಇಂಗ್ಲೆಂಡ್ ವಿರುದ್ಧ ಭಾರತ ಸೋಲುತ್ತಿದ್ದಂತೆ ಅಖ್ತರ್ ತಮ್ಮ ನಾಲಿಗೆ ಹರಿಬಿಟ್ಟಿದ್ದರು. ಇದೀಗ ಫೈನಲ್ನಲ್ಲಿ ಪಾಕಿಸ್ತಾನಕ್ಕೆ ಸೋಲಾಗುತ್ತಿದ್ದಂತೆ, ಹೃದಯ ಒಡೆದಿದೆ ಎಂಬರ್ಧದಲ್ಲಿ ಅಖ್ತರ್ ಹೃದಯದ ಇಮೋಜಿಯನ್ನು ಟ್ವೀಟ್ ಮಾಡಿದ್ದಾರೆ.
ಅಖ್ತರ್ ಒಡೆದ ಹೃದಯದ ಇಮೋಜಿಯನ್ನು ಟ್ವೀಟ್ ಮಾಡುತ್ತಿದ್ದಂತೆ, ಭಾರತ ತಂಡದ ವೇಗೆ ಮೊಹಮ್ಮದ್ ಶಮಿ ರೀಟ್ವೀಟ್ ಮಾಡುವ ಮೂಲಕ ಅಖ್ತರ್ನ ಕಾಲೆಳೆಯುವ ಕೆಲಸ ಮಾಡಿದ್ದಾರೆ. ಶಮಿ ರೀಟ್ವೀಟ್ ಮಾಡಿ ಕ್ಷಮಿಸಿ ಸಹೋದರ. ಇದನ್ನ ಕರ್ಮ ಎಂದು ಕರೆಯುತ್ತಾರೆ (Sorry brother ...It’s call karma) ಎಂದು ಶಮಿ ಟ್ವೀಟ್ ಮಾಡಿದ್ದಾರೆ.