ಬೆಂಗಳೂರು: ಭಾರತದಲ್ಲಿ ಯಾವಾಗಲೂ ಕ್ರಿಕೆಟ್ ಪಂದ್ಯಗಳ ಟಿಕೆಟ್ಗಳಿಗೆ ಭಾರಿ ಬೇಡಿಕೆ ಇರುತ್ತದೆ. ಅದರಲ್ಲೂ ಈ ಬಾರಿ ಭಾರತದಲ್ಲೇ ವಿಶ್ವಕಪ್ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಟಿಕೆಟ್ಗಳಿಗೆ ಇನ್ನಿಲ್ಲದ ಬೇಡಿಕೆ ಕಂಡುಬಂದಿದೆ. ಅಕ್ಟೋಬರ್ 5ರಿಂದ ನಡೆಯಲಿರುವ ಟೂರ್ನಿಗೆ ಕೇವಲ ಒಂದೂವರೆ ತಿಂಗಳು ಬಾಕಿ ಇರುವಾಗ ಆನ್ಲೈನ್ ಟಿಕೆಟ್ ಮಾರಾಟ ಪ್ರಕ್ರಿಯೆ ಆರಂಭಗೊಂಡಿದ್ದರೂ, ಮೊದಲ ಹಂತದಲ್ಲಿ ಮಾರಾಟಕ್ಕಿಟ್ಟ ಎಲ್ಲ ಟಿಕೆಟ್ಗಳು ಈಗಾಗಲೆ ಸೋಲ್ಡ್ಔಟ್ ಆಗಿವೆ ಎಂದು ಟೂರ್ನಿಯ ಅಧಿಕೃತ ಟಿಕೆಟ್ ಮಾರಾಟ ವೆಬ್ಸೈಟ್ "ಬುಕ್ ಮೈ ಶೋ' ತಿಳಿಸಿದೆ. ಹೀಗಾಗಿ ಟಿಕೆಟ್ ಸಿಗದೆ ನಿರಾಸೆ ಅನುಭವಿಸಿರುವ ಲಕ್ಷಾಂತರ ಕ್ರಿಕೆಟ್ ಪ್ರೇಮಿಗಳು ಈಗ ಟಿಕೆಟ್ಗಾಗಿ ಬೇರೆಬೇರೆ ವೆಬ್ಸೈಟ್ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಹುಡುಕಾಟ ನಡೆಸುತ್ತಿದ್ದಾರೆ. ಈ ವೇಳೆ ಅವರು ನಕಲಿ ಟಿಕೆಟ್ ಖರೀದಿಸುವ ಮತ್ತು ನಕಲಿ ಟಿಕೆಟ್ ಮಾರಾಟ ವೆಬ್ಸೈಟ್ಗಳ ಮೋಸದ ಜಾಲಕ್ಕೆ ಸಿಲುಕುವ ಭೀತಿ ಹೆಚ್ಚಾಗಿದೆ.
"ಬುಕ್ ಮೈ ಶೋ'ನಲ್ಲಿ ಟಿಕೆಟ್ಗಳು ಖಾಲಿಯಾಗಿದ್ದರೂ, ಗೂಗಲ್ ಸರ್ಚ್ನಲ್ಲಿ ಹುಡುಕಾಟ ನಡೆಸಿದರೆ, ಕಾಳಸಂತೆಯಲ್ಲಿ ಟಿಕೆಟ್ ಮಾರಾಟ ನಡೆಸುವ ಕೆಲ ವೆಬ್ಸೈಟ್ಗಳಲ್ಲಿ ಟಿಕೆಟ್ಗಳು ಈಗಲೂ ಲಭ್ಯವಿವೆ. ಆದರೆ ಇದಕ್ಕೆ ದುಬಾರಿ ಮೊತ್ತದ ಬೇಡಿಕೆಗಳನ್ನು ಇಡಲಾಗುತ್ತಿದೆ. ಇನ್ನು ಅವುಗಳು ಮಾರಾಟ ನಡೆಸುತ್ತಿರುವ ಟಿಕೆಟ್ಗಳು ಅಸಲಿಯಾದವುಗಳೇ ಎಂಬುದೂ ಖಚಿತವಿಲ್ಲ. ಕಳೆದ ಐಪಿಎಲ್ ಸಮಯದಲ್ಲಿ ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಬಹಿರಂಗವಾಗಿಯೇ ಟಿಕೆಟ್ಗಳನ್ನು ಮುಖಬೆಲೆಗಿಂತ ಹೆಚ್ಚಿನ ಮೊತ್ತಕ್ಕೆ ಮಾರಾಟ ಮಾಡುತ್ತಿದ್ದರು. ಅದೇ ರೀತಿ ಇದೀಗ ಸಾಮಾಜಿಕ ಜಾಲತಾಣಗಳಲ್ಲೂ, ವಿಶ್ವಕಪ್ ಟಿಕೆಟ್ಗಳ ಮಾರಾಟ ಮಾಡುವವರಿಗಾಗಿ ಕ್ರಿಕೆಟ್ ಪ್ರೇಮಿಗಳ ಹುಡುಕಾಟ ಹೆಚ್ಚಾಗಿವೆ. ಈ ವೇಳೆ ಕ್ರಿಕೆಟ್ ಪ್ರೇಮಿಗಳು ನಕಲಿ ಟಿಕೆಟ್ಗಳನ್ನು ಖರೀದಿಸಿ ಮೋಸ ಹೋಗುವ ಭೀತಿಯೂ ಅಧಿಕವಾಗಿದೆ. ಈಗಾಗಲೆ ಕೆಲವರು ವಿಶ್ವಕಪ್ ಟಿಕೆಟ್ ಮಾರಾಟಕ್ಕಿವೆ ಎಂದು ಪೋಸ್ಟ್ ಹಾಕಲಾರಂಭಿಸಿದ್ದಾರೆ. ದುಬಾರಿ ಮಾತ್ರವಲ್ಲ ಕಾಳಸಂತೆಯಲ್ಲಿ ಅಗ್ಗದ ಬೆಲೆಗೆ ಟಿಕೆಟ್ ಮಾರಾಟವಾಗುವ ಟಿಕೆಟ್ಗಳನ್ನು ಖರೀದಿಸುವುದು ಕೂಡ ಅಪಾಯಕಾರಿ. ಯಾಕೆಂದರೆ ಅವುಗಳು ನಕಲಿಯಾಗಿರುವ ಸಾಧ್ಯತೆಗಳು ಹೆಚ್ಚಿರುತ್ತವೆ.
ಕ್ರಿಕೆಟ್ ಪ್ರೇಮಿಗಳು ಕಾಳಸಂತೆಯಲ್ಲಿ ಟಿಕೆಟ್ ಖರೀದಿಸಿದರೂ, ಅದು ಅಸಲಿಯೇ ಅಥವಾ ನಕಲಿಯೇ ಎಂಬುದು ಅವರು ಪಂದ್ಯದ ದಿನ ಕ್ರೀಡಾಂಗಣ ಪ್ರವೇಶಿಸಲು ಮುಂದಾಗುವವರೆಗೂ ಸ್ಪಷ್ಟತೆ ಇರುವುದಿಲ್ಲ. ಇನ್ನು ನಕಲಿ ಟಿಕೆಟ್ ಖರೀದಿಸಿ ಮೋಸ ಹೋದವರು ಪೊಲೀಸ್ ಠಾಣೆಯ ಮೆಟ್ಟಿಲೇರಲು ಕೂಡ ಸಾಧ್ಯವಾಗುವುದಿಲ್ಲ. ಯಾಕೆಂದರೆ ಭಾರತೀಯ ದಂಡ ಸಂಹಿತೆಯ (ಐಪಿಸಿ) ಪ್ರಕಾರ, ಭಾರತದಲ್ಲಿ ಕಾಳಸಂತೆಯಲ್ಲಿ ಟಿಕೆಟ್ ಮಾರಾಟ ಮಾಡುವುದು ಮಾತ್ರವಲ್ಲ, ಖರೀದಿಸುವುದು ಕೂಡ ಕ್ರಿಮಿನಲ್ ಅಪರಾಧವಾಗಿದೆ.
ಬಿಸಿಸಿಐ ಅವ್ಯವಸ್ಥೆ ಬಗ್ಗೆ ಫ್ಯಾನ್ಸ್ ಆಕ್ರೋಶ
ವಿಶ್ವಕಪ್ ಟಿಕೆಟ್ಗಳ ಮಾರಾಟ ಪ್ರಕ್ರಿಯೆಯನ್ನು ಬಹಳ ತಡವಾಗಿ ಆರಂಭಿಸಿದ್ದಕ್ಕೆ ಮೊದಲೇ ಬಿಸಿಸಿಐ ವಿರುದ್ಧ ಸಿಟ್ಟಾಗಿದ್ದ ಕ್ರಿಕೆಟ್ ಪ್ರೇಮಿಗಳು ಈಗ ಆನ್ಲೈನ್ನಲ್ಲಿ ಟಿಕೆಟ್ ಖರೀದಿಗೆ ಮುಗಿಬಿದ್ದು ಹಲವು ಗಂಟೆಗಳ ಕಾಲ ವೆಬ್ಸೈಟ್ನಲ್ಲಿ ಕಾದರೂ ಟಿಕೆಟ್ ಸಿಗದೆ ನಿರಾಸೆ ಅನುಭವಿಸಿದ್ದಾರೆ. ಇದರಿಂದ ಬಿಸಿಸಿಐ ವಿರುದ್ಧ ಕ್ರಿಕೆಟ್ ಪ್ರೇಮಿಗಳ ಆಕ್ರೋಶ ಹೆಚ್ಚಾಗಿದೆ. ಹೆಚ್ಚಿನ ಟಿಕೆಟ್ಗಳು ಉಳ್ಳವರು ಅಂದರೆ ಕಾಪೋರ್ರೇಟ್ಗಳ ಪಾಲಾಗಿರುವ ಲಕ್ಷಣಗಳು ಕಾಣಿಸಿವೆ. ಇದರಿಂದ ಸಾಮಾನ್ಯ ಜನರಿಗೆ ಕ್ರೀಡಾಂಗಣದಲ್ಲಿ ಕ್ರಿಕೆಟ್ ನೋಡುವ ಭಾಗ್ಯವನ್ನು ಬಿಸಿಸಿಐ ಕಲ್ಪಿಸದಿರುವ ಬಗ್ಗೆ ಕಿಡಿಕಾರಲಾಗುತ್ತಿದೆ. ಕರ್ನಾಟಕದ ಮಾಜಿ ಕ್ರಿಕೆಟಿಗ ವೆಂಕಟೇಶ್ ಪ್ರಸಾದ್ ಇತ್ತೀಚೆಗೆ ಸಾಮಾನ್ಯ ಕ್ರಿಕೆಟ್ ಪ್ರೇಮಿಗಳ ಪರ ಮಾತನಾಡಿ, ಟಿಕೆಟ್ ಮಾರಾಟದಲ್ಲಿ ಪಾರದರ್ಶಕ ವ್ಯವಸ್ಥೆಯನ್ನು ಬಿಸಿಸಿಐ ಅಳವಡಿಸಿಕೊಳ್ಳಬೇಕೆಂದು ಹೇಳಿದ್ದರು.
ಬಿಸಿಸಿಐನಿಂದ ಸಿಹಿ ಸುದ್ದಿ; ಮತ್ತೆ 4 ಲಕ್ಷ ಟಿಕೆಟ್ ಸೇಲ್
ವಿಶ್ವಕಪ್ ಪಂದ್ಯಗಳ ಟಿಕೆಟ್ಗೆ ಭಾರಿ ಬೇಡಿಕೆ ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ ಬಿಸಿಸಿಐ, ಆತಿಥೇಯ ರಾಜ್ಯ ಕ್ರಿಕೆಟ್ ಸಂಸ್ಥೆಗಳ ಜತೆ ಚರ್ಚಿಸಿ ಸೆಪ್ಟೆಂಬರ್ 8ರಿಂದ ಮತ್ತೆ 4 ಲಕ್ಷ ಟಿಕೆಟ್ಗಳನ್ನು ಮಾರಾಟಕ್ಕಿಡಲು ನಿರ್ಧರಿಸಿದೆ. ಕ್ರಿಕೆಟ್ ಪ್ರೇಮಿಗಳ ಟಿಕೆಟ್ ಬೇಡಿಕೆಗೆ ಕೊನೆಗೂ ಮಣಿದಿರುವ ಬಿಸಿಸಿಐ, ಅಧಿಕೃತ ವೆಬ್ಸೈಟ್ https://tickets.cricketworldcup.com ನಲ್ಲಿ ಟಿಕೆಟ್ ಖರೀದಿಸಲು ಸೂಚಿಸಿದೆ.