ಬೆಂಗಳೂರು: ಪುರುಷರ ವಾಲಿಬಾಲ್ ಕ್ಲಬ್ ವಿಶ್ವ ಚಾಂಪಿಯನ್ಷಿಪ್ ಬುಧವಾರದಿಂದ 5 ದಿನಗಳ ಕಾಲ ಉದ್ಯಾನನಗರಿಯಲ್ಲಿ ನಡೆಯಲಿದ್ದು, ಅಹಮದಾಬಾದ್ ಡಿಫೆಂಡರ್ಸ್ ತಂಡ ಆತಿಥೇಯ ಭಾರತವನ್ನು ಪ್ರತಿನಿಧಿಸಲಿದೆ. ಭಾರತೀಯ ವಾಲಿಬಾಲ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಟೂರ್ನಿಗೆ ಆತಿಥ್ಯ ವಹಿಸುವ ಅವಕಾಶ ಒಲಿದುಬಂದಿದೆ.
ವಿಶ್ವದ 6 ಪ್ರಮುಖ ವಾಲಿಬಾಲ್ ಕ್ಲಬ್ಗಳು ಭಾಗವಹಿಸುತ್ತಿರುವ ಟೂರ್ನಿಯ ಪಂದ್ಯಗಳು ಕೋರಮಂಗಲ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯಲಿವೆ. ರುಪೇ ಪೆಮ್ ವಾಲಿಬಾಲ್ ಲೀಗ್ನಲ್ಲಿ ಪ್ರಶಸ್ತಿ ಗೆದ್ದ ಆಧಾರದಲ್ಲಿ ಅಹಮದಾಬಾದ್ ಡಿಫೆಂಡರ್ಸ್ ತಂಡ ಟೂರ್ನಿಗೆ ಅರ್ಹತೆ ಪಡೆದಿದೆ. ಕರ್ನಾಟಕದ ಅಶ್ವಲ್ ರೈ, ಸೃಜನ್ ಶೆಟ್ಟಿ ಅವರನ್ನು ಒಳಗೊಂಡ ಅಹಮದಾಬಾದ್ ತಂಡ ಎ ಗುಂಪಿನಲ್ಲಿ ಹಾಲಿ ಚಾಂಪಿಯನ್ ಇಟಲಿಯ ಸರ್ ಸಿಕೊಮಾ ಪೆರುಗಿಯಾ ಮತ್ತು ಬ್ರೆಜಿಲ್ನ ಮಿನಾಸ್ ಟೆನಿಸ್ ಕ್ಲಬ್ ತಂಡಗಳನ್ನು ಎದುರಿಸಲಿದೆ.
ಟರ್ಕಿಯ ಹಾಲ್ಕ್ಬ್ಯಾಂಕ್ ಸ್ಪೋರ್ ಕುಲುಬೆ, ಬ್ರೆಜಿಲ್ ಸಡಾ ಕ್ರುಜೈರೊ ವೊಲೆ ಮತ್ತು ಜಪಾನ್ನ ಸುಂಟೋರಿ ಸನ್ಬರ್ಡ್ಸ್ ಬಿ ಗುಂಪಿನಲ್ಲಿವೆ. ಪಂದ್ಯಗಳು ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್ನಲ್ಲಿ ನೇರಪ್ರಸಾರ ಕಾಣಲಿವೆ.