ನವದೆಹಲಿ: ಆರು ಬಾರಿಯ ವಿಶ್ವ ಚಾಂಪಿಯನ್ ಬಾಕ್ಸರ್ ಎಂಸಿ ಮೇರಿ ಕೋಮ್ ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ಗೆ ಭಾರತ ತಂಡದ ಚೀಫ್ ಡಿ ಮಿಷನ್ ಹುದ್ದೆಯನ್ನು ತ್ಯಜಿಸಿದ್ದಾರೆ. ವೈಯಕ್ತಿಕ ಕಾರಣಗಳಿಂದಾಗಿ ಅನಿವಾರ್ಯವಾಗಿ ಈ ನಿರ್ಧಾರ ತೆಗೆದುಕೊಂಡಿರುವುದಾಗಿ 41 ವರ್ಷದ ಮೇರಿ ಕೋಮ್ ತಿಳಿಸಿದ್ದಾರೆ.
2012ರ ಲಂಡನ್ ಒಲಿಂಪಿಕ್ಸ್ ಕಂಚು ವಿಜೇತೆ ಮೇರಿ ಕೋಮ್ ತನ್ನನ್ನು ಹುದ್ದೆಯಿಂದ ಬಿಡುಗಡೆಗೊಳಿಸುವಂತೆ ಪತ್ರ ಮುಖೇನ ಕೇಳಿಕೊಂಡಿದ್ದಾರೆ ಎಂದು ಭಾರತೀಯ ಒಲಿಂಪಿಕ್ ಸಮಿತಿಯ (ಐಒಎ) ಅಧ್ಯಕ್ಷೆ ಪಿಟಿ ಉಷಾ ತಿಳಿಸಿದ್ದಾರೆ.
"ನಾನು ಸಾಧ್ಯವಿರುವ ಎಲ್ಲ ವಿಧದಲ್ಲೂ ದೇಶಸೇವೆಗೆ ಸಿದ್ಧಳಿರುತ್ತೇನೆ. ಈ ಹುದ್ದೆಗೂ ನಾನು ಮಾನಸಿಕವಾಗಿ ಸಜ್ಜಾಗಿದ್ದೆ. ಆದರೆ ಈಗ ಈ ಪ್ರತಿಷ್ಠಿತ ಜವಾಬ್ದಾರಿಯನ್ನು ವಹಿಸಿಕೊಳ್ಳಲು ನನಗೆ ಸಾಧ್ಯವಾಗದಿರುವ ಬಗ್ಗೆ ವಿಷಾದವಿದೆ. ವೈಯಕ್ತಿಕ ಕಾರಣಗಳಿಂದಾಗಿ ನಾನು ಹುದ್ದೆಗೆ ರಾಜೀನಾಮೆ ಸಲ್ಲಿಸುತ್ತಿದ್ದೇನೆ. ಬೇರೆ ಆಯ್ಕೆ ಇಲ್ಲದ ಕಾರಣ ಈ ನಿರ್ಧಾರ ಕೈಗೊಂಡಿರುವೆ. ಇನ್ನೀಗ ಒಲಿಂಪಿಕ್ಸ್ನಲ್ಲಿ ಪಾಲ್ಗೊಳ್ಳುವ ದೇಶದ ಕ್ರೀಡಾಪಟುಗಳನ್ನು ಹುರಿದುಂಬಿಸಲಿದ್ದೇನೆ' ಎಂದು ಮೇರಿ ಕೋಮ್ ಪತ್ರದಲ್ಲಿ ವಿವರಿಸಿದ್ದಾರೆ. ಕಳೆದ ಮಾರ್ಚ್ 21ರಂದೇ ಅವರನ್ನು ಐಒಎ ನೇಮಕ ಮಾಡಿತ್ತು.
ಮೇರಿ ಕೋಮ್ ನಿರ್ಧಾರ ಮತ್ತು ಖಾಸಗಿತನವನ್ನು ನಾವು ಗೌರವಿಸುತ್ತೇವೆ. ಶೀಘ್ರದಲ್ಲೇ ಈ ಹುದ್ದೆಗೆ ಬದಲಿ ವ್ಯಕ್ತಿಯನ್ನು ನೇಮಿಸಲಿದ್ದೇವೆ ಎಂದು ಪಿಟಿ ಉಷಾ ತಿಳಿಸಿದ್ದಾರೆ. ಪ್ಯಾರಿಸ್ ಒಲಿಂಪಿಕ್ಸ್ ಜುಲೈ 26ರಿಂದ ಆಗಸ್ಟ್ 11ರವರೆಗೆ ನಡೆಯಲಿದೆ. ವಿಂಟರ್ ಒಲಿಂಪಿಯನ್ ಮತ್ತು ಲ್ಯುಗರ್ ಶಿವ ಕೇಶವನ್ ಒಲಿಂಪಿಕ್ಸ್ಗೆ ಭಾರತ ತಂಡದ ಉಪ ಚೀಫ್ ಡಿ ಮಿಷನ್ ಆಗಿದ್ದಾರೆ.
ಮಹಿಳಾ ಧ್ವಜಧಾರಿ ಆಯ್ಕೆ ವಿಳಂಬ
ಒಲಿಂಪಿಕ್ಸ್ ಉದ್ಘಾಟನಾ ಸಮಾರಂಭಕ್ಕೆ ಈಗಾಗಲೆ ಅನುಭವಿ ಟೇಬಲ್ ಟೆನಿಸ್ ಆಟಗಾರ ಶರತ್ ಕಮಲ್ ಅವರನ್ನು ಧ್ವಜಧಾರಿಯಾಗಿ ಆರಿಸಲಾಗಿದೆ. ಭಾರತ ಧ್ವಜಧಾರಿಯಾಗಿ ಇನ್ನೋರ್ವ ಮಹಿಳಾ ಕ್ರೀಡಾಪಟುವನ್ನು ಕೂಡ ಆಯ್ಕೆ ಮಾಡಬೇಕಾಗಿದೆ. ಒಲಿಂಪಿಕ್ಸ್ ಅರ್ಹತಾ ಪ್ರಕ್ರಿಯೆ ಇನ್ನೂ ಪೂರ್ಣಗೊಳ್ಳದ ಕಾರಣ ಮಹಿಳಾ ಕ್ರೀಡಾಪಟು ಆಯ್ಕೆ ವಿಳಂಬಗೊಳಿಸಲಾಗಿದೆ. ಸದ್ಯಕ್ಕೆ ಪ್ಯಾರಿಸ್ ಒಲಿಂಪಿಕ್ಸ್ಗೆ ಭಾರತದ 66 ಕ್ರೀಡಾಪಟುಗಳು ಅರ್ಹತೆ ಸಂಪಾದಿಸಿದ್ದಾರೆ. ಈ ಪೈಕಿ 43 ಪುರುಷ ಮತ್ತು 23 ಮಹಿಳಾ ಕ್ರೀಡಾಪಟುಗಳಾಗಿದ್ದಾರೆ.