ಡಲ್ಲಾಸ್/ಮುಂಬೈ: ಮೇಜರ್ ಲೀಗ್ ಕ್ರಿಕೆಟ್ (ಎಂಎಲ್ಸಿ) ಇಂದು ಮಾಧ್ಯಮ ಹಕ್ಕುಗಳ ಪಾಲುದಾರಿಕೆಯನ್ನು ಘೋಷಿಸಿದೆ. ಚೊಚ್ಚಲ ಆವೃತ್ತಿಯ ಎಂಎಲ್ಸಿ ಟಿ20 ಟೂರ್ನಿಯ ಪಂದ್ಯಗಳನ್ನು ಭಾರತದಲ್ಲಿ ಎಕ್ಸ್ಕ್ಲೂಸಿವ್ ಆಗಿ ನೇರಪ್ರಸಾರ ಮಾಡುವ ಹಕ್ಕನ್ನು ವಯಾಕಾಮ್18ನ ಕ್ರೀಡಾ ನೆಟ್ವರ್ಕ್ ಪಡೆದುಕೊಂಡಿದೆ. ಈ ಬಹು-ಪ್ಲಾಟ್ಫಾರ್ಮ್ ಕವರೇಜ್, ಜಿಯೋಸಿನಿಮಾದಲ್ಲಿ ಡಿಜಿಟಲ್ ಲೈವ್ ಸ್ಟ್ರೀಮಿಂಗ್ ಮತ್ತು ಸ್ಪೋರ್ಟ್ಸ್18ನಲ್ಲಿ ಟಿವಿ ಮೂಲಕ ನೇರಪ್ರಸಾರವನ್ನು ಒಳಗೊಂಡಿರುತ್ತದೆ. ಜುಲೈ 13ರಂದು (ಗುರುವಾರ) ಟೆಕ್ಸಾಸ್ ಸೂಪರ್ಕಿಂಗ್ಸ್ ಮತ್ತು ಲಾಸ್ ಏಂಜಲೀಸ್ ನೈಟ್ರೈಡರ್ಸ್ ತಂಡಗಳು ಡಲ್ಲಾಸ್ ಬಳಿಯ ಗ್ರ್ಯಾಂಡ್ ಪ್ರೈರೀ ಸ್ಟೇಡಿಯಂನಲ್ಲಿ ಮುಖಾಮುಖಿ ಆಗುವುದರೊಂದಿಗೆ ಎಂಸಿಎಲ್ ಟೂರ್ನಿಗೆ ಚಾಲನೆ ಸಿಗಲಿದೆ.
ಅಮೆರಿಕದ ಅತ್ಯುತ್ತಮ ಆಟಗಾರರೊಂದಿಗೆ ಉನ್ನತ ದರ್ಜೆಯ ಅಂತಾರಾಷ್ಟ್ರೀಯ ಕ್ರಿಕೆಟಿಗರು ಆಡಲಿರುವ ಎಂಎಲ್ಸಿ ಟೂರ್ನಿಯಲ್ಲಿ ಲಾಸ್ ಏಂಜಲೀಸ್ ನೈಟ್ರೈಡರ್ಸ್, ಎಂಐ ನ್ಯೂಯಾರ್ಕ್, ಸ್ಯಾನ್ ಫ್ರಾನ್ಸಿಸ್ಕೊ ಯುನಿಕಾರ್ನ್ಸ್, ಸಿಯಾಟಲ್ ಓರ್ಕಾಸ್, ಟೆಕ್ಸಾಸ್ ಸೂಪರ್ಕಿಂಗ್ಸ್ ಮತ್ತು ವಾಷಿಂಗ್ಟನ್ ಫ್ರೀಡಮ್ ತಂಡಗಳು ಸ್ಪರ್ಧಿಸಲಿವೆ. ಉದ್ಘಾಟನಾ ಆವೃತ್ತಿಯಲ್ಲಿ ರೌಂಡ್-ರಾಬಿನ್ ಸ್ವರೂಪ ಲೀಗ್ ಪಂದ್ಯಗಳು ನಡೆಯಲಿವೆ. ಬಳಿಕ ಅಗ್ರ ನಾಲ್ಕು ತಂಡಗಳು ಬಹು-ಪಂದ್ಯಗಳ ಪ್ಲೇಆಫ್ ಹಂತಕ್ಕೇರಲಿವೆ. ಜುಲೈ 30ರಂದು ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಎಂಎಲ್ಸಿ ಟೂರ್ನಿಯ ಚೊಚ್ಚಲ ಚಾಂಪಿಯನ್ ತಂಡವನ್ನು ನಿರ್ಧರಿಸಲಾಗುತ್ತದೆ.
'ಜಿಯೋಸಿನಿಮಾ ಕ್ರೀಡಾ ಬಳಕೆಯ ದಿಕ್ಕನ್ನೇ ಬದಲಾಯಿಸುವುದನ್ನು ಮುಂದುವರಿಸಿದೆ ಮತ್ತು ಮೇಜರ್ ಲೀಗ್ ಕ್ರಿಕೆಟ್ನೊಂದಿಗೆ, ಅಭಿಮಾನಿಗಳು ತಮ್ಮ ನೆಚ್ಚಿನ ಟಿ20 ಕ್ರಿಕೆಟಿಗರನ್ನು ವೀಕ್ಷಿಸುವ ಅವಕಾಶ ಪಡೆಯಲಿದ್ದಾರೆ ಮತ್ತು ಅವರ ನೆಚ್ಚಿನ ಫ್ರಾಂಚೈಸಿಗಳಿಗೆ ಸೇರಿದ ತಂಡಗಳನ್ನು ಹುರಿದುಂಬಿಸಲಿದ್ದಾರೆ. ಭಾರತೀಯ ವೀಕ್ಷಕರು ಟಿ20 ಕ್ರಿಕೆಟ್ಅನ್ನು ಇಷ್ಟಪಡುತ್ತಾರೆ ಮತ್ತು ಜಿಯೋಸಿನಿಮಾ ಮತ್ತು ಸ್ಪೋರ್ಟ್ಸ್18 ಮೂಲಕ ಉದ್ಘಾಟನಾ ಆವೃತ್ತಿಯ ಎಂಎಲ್ಸಿ ಟೂರ್ನಿಯ ರೋಚಕ ಪಂದ್ಯಗಳನ್ನು ಆನಂದಿಸುತ್ತಾರೆ ಎಂದು ನಾವು ನಿರೀಕ್ಷಿಸುತ್ತಿದ್ದೇವೆ' ಎಂದು ವಯಾಕಾಮ್18ನ ಕ್ರೀಡಾ ತಂತ್ರಗಾರಿಕೆ, ಪಾಲುದಾರಿಕೆ ಮತ್ತು ಸ್ವಾಧೀನಗಳ ಮುಖ್ಯಸ್ಥ ಹರ್ಷ್ ಶ್ರೀವಾಸ್ತವ ಹೇಳಿದ್ದಾರೆ.
'ವಯಾಕಾಮ್18ನೊಂದಿಗೆ ಪಾಲುದಾರರಾಗಲು ನಾವು ಸಂತೋಷ ಪಡುತ್ತೇವೆ ಮತ್ತು ವಿಶ್ವ ದರ್ಜೆಯ ಟಿ20 ಪಂದ್ಯಗಳು ಮೇಜರ್ ಲೀಗ್ ಕ್ರಿಕೆಟ್ ಮೂಲಕ ಭಾರತದಲ್ಲಿ ವ್ಯಾಪಕವಾಗಿ ಲಭ್ಯವಿರುತ್ತದೆ ಎಂದು ಖಚಿತಪಡಿಸಿಕೊಳ್ಳಲು ನಾವು ಸಂತೋಷಪಡುತ್ತೇವೆ. ಜಿಯೋಸಿನಿಮಾದಲ್ಲಿ ಡಿಜಿಟಲ್ ಮೂಲಕ ಲೈವ್ ಸ್ಟ್ರೀಮ್ ಮಾಡಲಾಗುತ್ತದೆ ಮತ್ತು ಸ್ಪೋರ್ಟ್ಸ್18 ಚಾನೆಲ್ ಮೂಲಕ ಟಿವಿಯಲ್ಲಿ ಪಂದ್ಯಗಳನ್ನು ನೇರಪ್ರಸಾರ ಮಾಡಲಾಗುತ್ತದೆ. ನಮ್ಮ ಆರು ತಂಡಗಳು, ಭಾರತದಲ್ಲಿನ ಅಭಿಮಾನಿಗಳು ವೀಕ್ಷಿಸಲು ಇಷ್ಟಪಡುವಂಥ ಟಿ20 ಸೂಪರ್ಸ್ಟಾರ್ ಆಟಗಾರರನ್ನು ಒಳಗೊಂಡಿವೆ ಮತ್ತು ಪ್ರಪಂಚದ ಅತಿದೊಡ್ಡ ಕ್ರಿಕೆಟ್ ಮಾರುಕಟ್ಟೆಯಲ್ಲಿ ವಿಶ್ವ ದರ್ಜೆಯ ಕ್ರೀಡಾ ಪ್ರಸಾರವನ್ನು ಪ್ರದರ್ಶಿಸಲು ವಯೋಕಾಮ್18ನ ಚಾನೆಲ್ಗಳಿಗಿಂತ ಉತ್ತಮ ಪಾಲುದಾರರಿಲ್ಲ' ಎಂದು ಮೇಜರ್ ಲೀಗ್ ಕ್ರಿಕೆಟ್ನ ಸಹ-ಸಂಸ್ಥಾಪಕ ವಿಜಯ್ ಶ್ರೀನಿವಾಸನ್ ಹೇಳಿದ್ದಾರೆ.
ಎಂಎಲ್ಸಿ ಟೂರ್ನಿಯಲ್ಲಿ ಆಡುವ ಒಟ್ಟು ಆರು ತಂಡಗಳ ಪೈಕಿ ನಾಲ್ಕು ತಂಡಗಳಿಗೆ, ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಫ್ರಾಂಚೈಸಿಗಳ ಮಾಲೀಕರೇ ಹೂಡಿಕೆದಾರರಾಗಿದ್ದಾರೆ. ಎಂಐ ನ್ಯೂಯಾರ್ಕ್ (ಐದು ಬಾರಿಯ ಐಪಿಎಲ್ ಚಾಂಪಿಯನ್ ಮುಂಬೈ ಇಂಡಿಯನ್ಸ್), ಎಲ್ಎ ನೈಟ್ರೈಡರ್ಸ್ (ಎರಡು ಬಾರಿಯ ಐಪಿಎಲ್ ಚಾಂಪಿಯನ್ ಕೋಲ್ಕತ್ತಾ ನೈಟ್ರೈಡರ್ಸ್), ಟೆಕ್ಸಾಸ್ ಸೂಪರ್ಸ್ಕಿಂಗ್ಸ್ (ಐದು ಬಾರಿಯ ಐಪಿಎಲ್ ಚಾಂಪಿಯನ್ ಚೆನ್ನೈ ಸೂಪರ್ಕಿಂಗ್ಸ್) ಮತ್ತು ಸಿಯಾಟಲ್ ಓರ್ಕಾಸ್ (ಡೆಲ್ಲಿ ಕ್ಯಾಪಿಟಲ್ಸ್) ತಂಡಗಳು ಇದರಲ್ಲಿ ಸೇರಿವೆ. ಅಭಿಮಾನಿಗಳು ತಮ್ಮ ನೆಚ್ಚಿನ ಐಪಿಎಲ್ ತಾರೆಯರ ಆಟಕ್ಕೆ ಎಂಎಲ್ಸಿಯಲ್ಲೂ ಸಾಕ್ಷಿ ಆಗಬಹುದಾಗಿದೆ.
ಕೈರಾನ್ ಪೊಲ್ಲಾರ್ಡ್, ರಶೀದ್ ಖಾನ್, ನಿಕೋಲಸ್ ಪೂರನ್, ಟ್ರೆಂಟ್ ಬೌಲ್ಟ್, ಡಿವಾಲ್ಡ್ ಬ್ರೆವಿಸ್ ಮತ್ತು ಕಗಿಸೊ ರಬಾಡ ಅವರು ಎಂಐ ನ್ಯೂಯಾರ್ಕ್ ತಂಡವನ್ನು ಪ್ರತಿನಿಧಿಸಲಿದ್ದಾರೆ. ಎಲ್ಎ ನೈಟ್ರೈಡರ್ಸ ತಂಡ ಭಾರತದ 19 ವಯೋಮಿತಿ ತಂಡದ ಮಾಜಿ ನಾಯಕ ಉನ್ಮುಕ್ತ್ ಚಂದ್ ಜೊತೆಗೆ ಸುನಿಲ್ ನಾರಾಯಣ್, ಆಂಡ್ರೆ ರಸೆಲ್, ಜೇಸನ್ ರಾಯ್, ಆಡಂ ಝಂಪಾ ಮತ್ತು ಮಾರ್ಟಿನ್ ಗಪ್ಟಿಲ್ ಅವರನ್ನು ಒಳಗೊಂಡಿದೆ. ಟೆಕ್ಸಾಸ್ ಸೂಪರ್ಕಿಂಗ್ಸ್ ತಂಡವು ಚೆನ್ನೈ ಸೂಪರ್ಕಿಂಗ್ಸ್ ತಂಡದ ತಾರೆಯರಾದ ಅಂಬಟಿ ರಾಯುಡು, ಡೆವೊನ್ ಕಾನ್ವೇ, ಡ್ವೇನ್ ಬ್ರಾವೋ ಮತ್ತು ಮಿಚೆಲ್ ಸ್ಯಾಂಟ್ನರ್ ಅವರನ್ನು ಒಳಗೊಂಡಿದ್ದು, ಫಾಫ್ ಡು ಪ್ಲೆಸಿಸ್ ನಾಯಕತ್ವವನ್ನೂ ಹೊಂದಿದೆ.
ಸಿಯಾಟಲ್ ಓರ್ಕಾಸ್ ತಂಡ ಭಾರತದ 19 ವಯೋಮಿತಿ ತಂಡದ ಮಾಜಿ ಎಡಗೈ ಸ್ಪಿನ್ನರ್ ಹರ್ಮೀತ್ ಸಿಂಗ್ ಅವರನ್ನು ಒಳಗೊಂಡಿದ್ದು, ಮೇಜರ್ ಲೀಗ್ ಕ್ರಿಕೆಟ್ಗಾಗಿ ಮೊದಲ ಬಾರಿಗೆ ನಡೆದ ದೇಶೀಯ ಡ್ರಾಫ್ಟ್ನಲ್ಲಿ ಅವರು ಮೊದಲ ಆಯ್ಕೆಯಾಗಿ ಸೇರ್ಪಡೆಗೊಂಡಿದ್ದಾರೆ. ಕ್ವಿಂಟನ್ ಡಿಕಾಕ್ ಮತ್ತು ಮಿಚೆಲ್ ಮಾರ್ಷ್ ಓರ್ಕಾಸ್ ತಂಡದಲ್ಲಿರುವ ಇಬ್ಬರು ಅಗ್ರ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ತಾರೆಯರಾಗಿದ್ದಾರೆ. ವಾಷಿಂಗ್ಟನ್ ಫ್ರೀಡಮ್ ತಂಡದಲ್ಲಿ ಶ್ರೀಲಂಕಾದ ಸ್ಪಿನ್ ಮಾಂತ್ರಿಕ ವನಿಂದು ಹಸರಂಗ, ದಕ್ಷಿಣ ಆಫ್ರಿಕಾದ ವೇಗದ ಬೌಲರ್ಗಳಾದ ಆನ್ರಿಚ್ ನೋಕಿಯಾ ಮತ್ತು ಮಾರ್ಕೊ ಜಾನ್ಸೆನ್, ಕಿವೀಸ್ ಬ್ಯಾಟ್ಸ್ಮನ್ ಗ್ಲೆನ್ ಫಿಲಿಪ್ಸ್ ಅವರೊಂದಿಗೆ ಭಾರತದ 19 ವಯೋಮಿತಿಯ ತಂಡದ ಮಾಜಿ ಬೌಲರ್ ಸೌರಭ್ ನೇತ್ರವಾಲ್ಕರ್ ಅವರನ್ನು ಒಳಗೊಂಡಿದೆ.
ಮಾರ್ಕಸ್ ಸ್ಟೋಯಿನಿಸ್ ಅವರು ಸ್ಯಾನ್ ಫ್ರಾನ್ಸಿಸ್ಕೊ ಯುನಿಕಾರ್ನ್ಸ್ ತಂಡಕ್ಕೆ ಅಂತಾರಾಷ್ಟ್ರೀಯ ಮತ್ತು ಫ್ರಾಂಚೈಸಿ ಕ್ರಿಕೆಟ್ ಅನುಭವವನ್ನು ತುಂಬಲಿದ್ದಾರೆ. ಆಸ್ಟ್ರೇಲಿಯಾದ ಆರೋನ್ ಫಿಂಚ್ ಅವರು ಯುನಿಕಾರ್ನ್ಸ್ ತಂಡವನ್ನು ಮುನ್ನಡೆಸಲಿದ್ದಾರೆ. ಡ್ರಾಫ್ಟ್ನಲ್ಲಿ ನ್ಯೂಜಿಲೆಂಡ್ನ ಮಾಜಿ ಅಂತಾರಾಷ್ಟ್ರೀಯ ಕ್ರಿಕೆಟಿಗ ಕೋರಿ ಆಂಡರ್ಸನ್ ಅವರನ್ನು ಮೊದಲ ಸುತ್ತಿನಲ್ಲೇ ಯುನಿಕಾರ್ನ್ಸ್ ಆಯ್ಕೆ ಮಾಡಿತ್ತು. ನಂತರದಲ್ಲಿ ಇಂಗ್ಲೆಂಡ್ನ ವಿಶ್ವಕಪ್ ವಿಜೇತ ಲಿಯಾಮ್ ಪ್ಲಂಕೆಟ್ ಎರಡನೇ ಸುತ್ತಿನಲ್ಲಿ ತಂಡ ಸೇರಿದ್ದರು. ಪಾಕಿಸ್ತಾನದ ಶಾದಾಬ್ ಖಾನ್ ಮತ್ತು ಹ್ಯಾರಿಸ್ ರೌಫ್ ತಂಡದ ಒಪ್ಪಂದಕ್ಕೆ ಅಂತಿಮವಾಗಿ ಸಹಿ ಹಾಕಿದ್ದರೆ, ಮುಖ್ಯ ಕೋಚ್ ಆಗಿ ಶೇನ್ ವ್ಯಾಟ್ಸನ್ ಅವರ ಹೆಸರನ್ನು ಇತ್ತೀಚೆಗೆ ಘೋಷಿಸಲಾಗಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್, ಎಸ್ಎ20, ಭಾರತದ ವೆಸ್ಟ್ ಇಂಡೀಸ್ ಪ್ರವಾಸ-2023, ಪ್ಯಾರಿಸ್ ಒಲಿಂಪಿಕ್ಸ್-2024, ಅಲ್ಟಿಮೇಟ್ ಟೇಬಲ್ ಟೆನಿಸ್, ವರ್ಲ್ಡ್ ಪ್ಯಾಡೆಲ್ ಲೀಗ್, ಗ್ಲೋಬಲ್ ಚೆಸ್ ಲೀಗ್, ಫಿಫಾ ವಿಶ್ವಕಪ್ ಕತಾರ್-2022, ಎನ್ಬಿಎ, ಡೈಮಂಡ್ ಲೀಗ್, ಲಾಲೀಗಾ, ಸೆರ್ರಿ ಎ ಮತ್ತು ಅಗ್ರ ಬಿಡಬ್ಲ್ಯುಎಫ್ ಟೂರ್ನಿಗಳು ಸೇರಿದಂತೆ ವಿಶ್ವ ದರ್ಜೆಯ ಕ್ರೀಡಾಕೂಟಗಳ ಪ್ರಸಾರ ಹಕ್ಕು ಹೊಂದಿರುವ ವಯಾಕಾಮ್18ಅನ್ನು ಮೇಜರ್ ಲೀಗ್ ಕ್ರಿಕೆಟ್ನ ಸೇರ್ಪಡೆಯು ಇನ್ನಷ್ಟು ಬಲಪಡಿಸಿದೆ.