ಮೆಲ್ಬೋರ್ನ್: ಆಸ್ಟ್ರೆಲಿಯಾ-ನ್ಯೂಜಿಲೆಂಡ್ ಜಂಟಿ ಆತಿಥ್ಯದಲ್ಲಿ ನಡೆಯುತ್ತಿರುವ ಮಹಿಳೆಯರ ಫಿಫಾ ವಿಶ್ವಕಪ್ ಟೂರ್ನಿಯ ಲೀಗ್ ಹಂತದಲ್ಲಿ 3 ಗೋಲುಗಳನ್ನು ಸಿಡಿಸಿ ಗಮನಸೆಳೆದಿದ್ದ ಇಂಗ್ಲೆಂಡ್ ತಂಡದ ಯುವ ಫುಟ್ಬಾಲ್ ತಾರೆ ಲೌರೆನ್ ಜೇಮ್ಸ್, ನಾಕೌಟ್ ಹಂತದ ಮೊದಲ ಪಂದ್ಯದಲ್ಲಿ ಮಾಡಿದ ಎಡವಟ್ಟಿನಿಂದಾಗಿ ಈಗ ಕ್ವಾರ್ಟರ್ಫೈನಲ್ ಮತ್ತು ಸೆಮಿಫೈನಲ್ ಪಂದ್ಯಗಳನ್ನು ತಪ್ಪಿಸಿಕೊಳ್ಳುವಂತಾಗಿದೆ. ಹಾಲಿ ಚಾಂಪಿಯನ್ ಅಮೆರಿಕ ಟೂರ್ನಿಯಿಂದ ಹೊರಬಿದ್ದ ಬಳಿಕ ಆಂಗ್ಲರ ತಂಡವೇ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವೆನಿಸಿದ್ದರೂ, ಪ್ರಮುಖ ಆಟಗಾರ್ತಿಯೇ 2 ಮಹತ್ವದ ಪಂದ್ಯಗಳಿಗೆ ಅಲಭ್ಯರಾಗಿರುವುದು ಭಾರಿ ಹಿನ್ನಡೆ ತಂದಿದೆ.
ನೈಜೀರಿಯಾ ವಿರುದ್ಧದ ಪಂದ್ಯದಲ್ಲಿ ಎದುರಾಳಿ ಆಟಗಾರ್ತಿ ಮಿಚೆಲ್ ಅಲೋಜಿ ನೆಲಕ್ಕೆ ಬಿದ್ದಾಗ ಆಕೆಯ ಬೆನ್ನಮೇಲೆ ಕಾಲಿನಿಂದ ತುಳಿದು ಲೌರೆನ್ ಜೇಮ್ಸ್ ಮುಂದೆ ಹೋಗಿದ್ದರು. ಇದಕ್ಕಾಗಿ ಪಂದ್ಯದಲ್ಲೇ ಅವರಿಗೆ ರೆಡ್ ಕಾರ್ಡ್ ನೀಡಿ ಮೈದಾನದಿಂದ ಹೊರಕಳುಹಿಸಲಾಗಿತ್ತು. ಇದೀಗ, ಎದುರಾಳಿಗೆ ಗೌರವ ತೋರಿಸದ ಆಕೆಯ ವರ್ತನೆಯನ್ನು ಇನ್ನಷ್ಟು ಗಂಭೀರವಾಗಿ ಪರಿಗಣಿಸಿರುವ ಫಿಫಾ, 2 ಪಂದ್ಯಗಳ ನಿಷೇಧ ಶಿಕ್ಷೆಯನ್ನು ವಿಧಿಸಿದೆ. 16ರ ಘಟ್ಟದ ಪಂದ್ಯದ ಬಳಿಕ ಜೇಮ್ಸ್ ಕ್ಷಮೆಯಾಚಿಸಿದ್ದರೂ, ಫಿಫಾ ಕಠಿಣ ಕ್ರಮವನ್ನೇ ತೆಗೆದುಕೊಂಡಿದೆ.
ಶನಿವಾರ ಎಂಟರ ಘಟ್ಟದಲ್ಲಿ ಕೊಲಂಬಿಯಾ ತಂಡವನ್ನು ಎದುರಿಸಲಿರುವ ಇಂಗ್ಲೆಂಡ್, ನಂತರ 4ರ ಘಟ್ಟಕ್ಕೇರಿದರೆ ಅಲ್ಲೂ ಜೇಮ್ಸ್ ಇಲ್ಲದೆ ಆಡಬೇಕಾಗಿದೆ. ಪ್ರಶಸ್ತಿ ಸುತ್ತು ತಲುಪಿದರೆ ಮಾತ್ರ 21 ವರ್ಷದ ಲೌರೆನ್ ಜೇಮ್ಸ್ ಮರಳಿ ಕಣಕ್ಕಿಳಿಯಲಿದ್ದಾರೆ.