ಗಾಲೆ: ಕಮಿಂದು ಮೆಂಡಿಸ್ (182*ರನ್, 250 ಎಸೆತ, 16 ಬೌಂಡರಿ, 4 ಸಿಕ್ಸರ್) ಭರ್ಜರಿ ಶತಕದೊಂದಿಗೆ ಬರೆದ ಅವಳಿ ದಾಖಲೆಗಳ ಧಮಾಕಾ ಮತ್ತು ಕುಸಲ್ ಮೆಂಡಿಸ್ (106*ರನ್, 149 ಎಸೆತ, 6 ಬೌಂಡರಿ, 3 ಸಿಕ್ಸರ್) ನೀಡಿದ ಸಮರ್ಥ ಬೆಂಬಲದ ಬಲದಿಂದ ಶ್ರೀಲಂಕಾ ತಂಡ ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧದ 2ನೇ ಹಾಗೂ ಅಂತಿಮ ಟೆಸ್ಟ್ನಲ್ಲಿ ಬೃಹತ್ ಮೊತ್ತ ಪೇರಿಸಿ ಮೇಲುಗೈ ಸಾಧಿಸಿದೆ.
ಗಾಲೆ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದ 2ನೇ ದಿನವಾದ ಶುಕ್ರವಾರ 3 ವಿಕೆಟ್ಗೆ 306 ರನ್ಗಳಿಂದ ದಿನದಾಟ ಮುಂದುವರಿಸಿದ ಲಂಕಾ, 5 ವಿಕೆಟ್ಗೆ 602 ರನ್ ಪೇರಿಸಿ ಡಿಕ್ಲೇರ್ ಮಾಡಿಕೊಂಡಿತು. ಕಮಿಂದು&ಕುಸಲ್ ಮುರಿಯದ 6ನೇ ವಿಕೆಟ್ಗೆ 271 ಎಸೆತಗಳಲ್ಲಿ 200 ರನ್ ಜತೆಯಾಟವಾಡಿದರು. ಪ್ರತಿಯಾಗಿ ದಿನದಂತ್ಯಕ್ಕೆ ಕಿವೀಸ್ 2 ವಿಕೆಟ್ಗೆ 22 ರನ್ ಗಳಿಸಿ ಸಂಕಷ್ಟದಲ್ಲಿದೆ. ಕೇನ್ ವಿಲಿಯಮ್ಸನ್ (6*) ಜತೆಗೆ ಖಾತೆ ತೆರೆಯದ ನೈಟ್ ವಾಚ್ಮನ್ ಅಜಾಜ್ ಪಟೇಲ್ ಕ್ರೀಸ್ನಲ್ಲಿದ್ದಾರೆ. ಕಿವೀಸ್ ಸದ್ಯ 580 ರನ್ ಹಿನ್ನಡೆಯಲ್ಲಿದ್ದು, ಫಾಲೋಆನ್ ತಪ್ಪಿಸಿಕೊಳ್ಳಲು ಇನ್ನೂ 381 ರನ್ ಗಳಿಸಬೇಕಿದೆ.
ಅವಳಿ ದಾಖಲೆಗಳ ಕಮಾಲ್
ಎಡಗೈ ಬ್ಯಾಟರ್ ಕಮಿಂದು ಮೆಂಡಿಸ್ ತಾನಾಡಿದ 13 ಟೆಸ್ಟ್ ಇನಿಂಗ್ಸ್ಗಳಲ್ಲೇ 5 ಶತಕ ಸಿಡಿಸಿದ್ದು, ಏಷ್ಯಾದ ಅತಿವೇಗದ ಸಾಧಕ ಎನಿಸಿದ್ದಾರೆ. ಪಾಕಿಸ್ತಾನದ ವಾದ್ ಅಲಮ್ 22 ಇನಿಂಗ್ಸ್ಗಳಲ್ಲಿ 5 ಶತಕ ಸಿಡಿಸಿದ್ದು ಹಿಂದಿನ ದಾಖಲೆ. ಒಟ್ಟಾರೆಯಾಗಿ ಕಮಿಂದು 3ನೇ ಅತಿವೇಗದ ಸಾಧಕರಾಗಿದ್ದು, ದಿಗ್ಗಜ ಡಾನ್ ಬ್ರಾಡ್ಮನ್ (13) ಸಾಧನೆ ಸರಿಗಟ್ಟಿದ್ದಾರೆ. ವಿಂಡೀಸ್ನ ಎವರ್ಟನ್ ವೀಕ್ಸ್ 10 ಇನಿಂಗ್ಸ್ಗಳಲ್ಲೇ 5 ಶತಕ ಸಿಡಿಸಿದ್ದು ವಿಶ್ವದಾಖಲೆಯಾಗಿದ್ದರೆ, ಇಂಗ್ಲೆಂಡ್ನ ಹರ್ಬೆರ್ಟ್ ಸಟ್ಕ್ಲ್ಿ ಮತ್ತು ಆಸೀಸ್ನ ನೀಲ್ ಹಾರ್ವೆ ತಲಾ 12 ಇನಿಂಗ್ಸ್ಗಳಲ್ಲಿ ಈ ಸಾಧನೆ ಮಾಡಿ 2ನೇ ಸ್ಥಾನದಲ್ಲಿದ್ದಾರೆ. ವಿಂಡೀಸ್ನ ಜಾರ್ಜ್ ಹಾರ್ಡ್ಲಿ ಕೂಡ 13 ಇನಿಂಗ್ಸ್ಗಳಲ್ಲೇ 5 ಶತಕ ಸಿಡಿಸಿದ್ದರು. ಇನ್ನು 25 ವರ್ಷದ ಕಮಿಂದು ಟೆಸ್ಟ್ನಲ್ಲಿ ಅತಿವೇಗವಾಗಿ ಸಾವಿರ ರನ್ ಪೂರೈಸಿದ ಏಷ್ಯಾದ ಸಾಧಕರೆನಿಸಿದ್ದು, ಒಟ್ಟಾರೆಯಾಗಿ 2ನೇ ಸ್ಥಾನದೊಂದಿಗೆ ಬ್ರಾಡ್ಮನ್ ಸಾಧನೆ ಸರಿಗಟ್ಟಿದ್ದಾರೆ. ಹರ್ಬೆರ್ಟ್ ಸಟ್ಕ್ಲ್ಿ ಮತ್ತು ಎವರ್ಟನ್ ವೀಕ್ಸ್ ತಲಾ 12 ಇನಿಂಗ್ಸ್ಗಳಲ್ಲೇ ಈ ಸಾಧನೆ ಮಾಡಿರುವುದು ವಿಶ್ವದಾಖಲೆಯಾಗಿದೆ.
ಶ್ರೀಲಂಕಾ: 163.4 ಓವರ್ಗಳಲ್ಲಿ 5 ವಿಕೆಟ್ಗೆ 602 ಡಿಕ್ಲೇರ್ (ಮ್ಯಾಥ್ಯೂಸ್ 88, ಕಮಿಂದು 182*, ಧನಂಜಯ 44, ಕುಸಲ್ ಮೆಂಡಿಸ್ 106*, ಫಿಲಿಪ್ಸ್ 141ಕ್ಕೆ 3, ಸೌಥಿ 70ಕ್ಕೆ 1), ನ್ಯೂಜಿಲೆಂಡ್: 14 ಓವರ್ಗಳಲ್ಲಿ 2 ವಿಕೆಟ್ಗೆ 22 (ಲಾಥಮ್ 2, ಕಾನ್ವೇ 9, ವಿಲಿಯಮ್ಸನ್ 6*, ಅಶಿತಾ 5ಕ್ಕೆ 1, ಪ್ರಭಾತ್ 3ಕ್ಕೆ 1).