ಬುಡಾಪೆಸ್ಟ್: ಇತ್ತೀಚೆಗೆ ಕ್ರೀಡಾಕ್ಷೇತ್ರದಲ್ಲಿ ಭಾರತ-ಪಾಕಿಸ್ತಾನದ ಮುಖಾಮುಖಿ ಹೆಚ್ಚಾಗಿದೆ. ಸ್ಯಾಫ್ ಫುಟ್ಬಾಲ್, ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ ಹಾಕಿ, ಎಮರ್ಜಿಂಗ್ ಏಷ್ಯಾಕಪ್ ಕ್ರಿಕೆಟ್ ಟೂರ್ನಿಯಲ್ಲಿ ಭಾರತ-ಪಾಕಿಸ್ತಾನ ನಡುವೆ ಸೆಣಸಾಟ ಏರ್ಪಟ್ಟಿತ್ತು. ಇದಲ್ಲದೆ ಮುಂಬರುವ ದಿನಗಳಲ್ಲಿ ಏಷ್ಯಾಕಪ್-ವಿಶ್ವಕಪ್ ಏಕದಿನ ಟೂರ್ನಿಗಳಲ್ಲೂ ಇಂಡೋ-ಪಾಕ್ ಹೈ-ವೋಲ್ಟೇಜ್ ಪಂದ್ಯಗಳು ನಡೆಯಲಿವೆ. ಇದರ ನಡುವೆ ಈಗ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್ಷಿಪ್ನಲ್ಲೂ ಭಾರತ-ಪಾಕಿಸ್ತಾನ ಸೆಣಸಾಟಕ್ಕೆ ವೇದಿಕೆ ಸಜ್ಜಾಗಿದೆ. ಜಾವೆಲಿನ್ ಎಸೆತ ಸ್ಪರ್ಧೆಯಲ್ಲಿ ಭಾರತದ ಮೂವರು ತಾರೆಯರಾದ ನೀರಜ್ ಚೋಪ್ರಾ, ಕನ್ನಡಿಗ ಮನು ಡಿ.ಪಿ. ಮತ್ತು ಕಿಶೋರ್ ಜೆನಾ ಫೈನಲ್ಗೇರಿದ್ದಾರೆ. ಭಾನುವಾರ ನಡೆಯಲಿರುವ ಪದಕ ಸ್ಪರ್ಧೆಯಲ್ಲಿ ಈ ಮೂವರಿಗೆ ಪಾಕಿಸ್ತಾನದ ಅರ್ಷದ್ ನದೀಮ್ ಪ್ರಮುಖ ಪ್ರತಿಸ್ಪರ್ಧಿ ಎನಿಸಿದ್ದಾರೆ.
ಅರ್ಹತಾ ಸುತ್ತಿನ ಮೊದಲ ಯತ್ನದಲ್ಲೇ 88.77 ಮೀ. ದೂರ ಎಸೆದು ಅಗ್ರಸ್ಥಾನದೊಂದಿಗೆ ಫೈನಲ್ಗೇರಿದ ಟೋಕಿಯೊ ಒಲಿಂಪಿಕ್ಸ್ ಚಾಂಪಿಯನ್ ನೀರಜ್ ಸಹಜವಾಗಿಯೇ ಸ್ವರ್ಣ ಗೆಲ್ಲುವ ಫೇವರಿಟ್ ಎನಿಸಿದ್ದಾರೆ. ಮನು (81.31 ಮೀ.) ಮತ್ತು ಕಿಶೋರ್ (80.55 ಮೀ) ಕೂಡ 80 ಮೀ. ಗಡಿ ದಾಟುವಲ್ಲಿ ಯಶಸ್ವಿಯಾಗಿದ್ದರು. ಅರ್ಷದ್ ನದೀಂ 86.79 ಮೀ. ದೂರ ಭರ್ಜಿ ಎಸೆದು ಅರ್ಹತಾ ಸುತ್ತಿನಲ್ಲಿ 2ನೇ ಸ್ಥಾನ ಪಡೆದಿದ್ದರು. ನೀರಜ್ ಇನ್ನೂ 90ರ ಗಡಿ ದಾಟಲು ಶಕ್ತರಾಗದಿರುವ ನಡುವೆ, ಅರ್ಷದ್ ಕಳೆದ ವರ್ಷ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ 90.18 ಮೀ. ಎಸೆದು ಬೀಗಿದ್ದರು. 25 ವರ್ಷದ ನೀರಜ್ ಫೈನಲ್ನಲ್ಲಿ ಮೊದಲ ಬಾರಿಗೆ 90 ಮೀ. ಗಡಿಯನ್ನೂ ದಾಟುವ ಹಂಬಲದಲ್ಲಿದ್ದಾರೆ.
ಹಾಲಿ ಚಾಂಪಿಯನ್ ಗ್ರೇನೆಡಾದ ಆಂಡರ್ಸನ್ ಪೀಟರ್ಸ್ ಅರ್ಹತಾ ಸುತ್ತಿನಲ್ಲೇ ಹೊರಬಿದ್ದಿರುವ ನಡುವೆ, ಟೋಕಿಯೊ ಒಲಿಂಪಿಕ್ಸ್ ರಜತ ವಿಜೇತ ಜೇಕಬ್ ವಡ್ಲೆಜ್ ಮತ್ತು ಜರ್ಮನಿಯ ಜೂಲಿಯನ್ ವೆಬರ್ ಕೂಡ ನೀರಜ್ಗೆ ಪ್ರಮುಖ ಪ್ರತಿಸ್ಪರ್ಧಿಗಳೆನಿಸಿದ್ದಾರೆ. ಒಲಿಂಪಿಕ್ಸ್, ಏಷ್ಯನ್ ಗೇಮ್ಸ್, ಕಾಮನ್ವೆಲ್ತ್ ಗೇಮ್ಸ್ ಚಿನ್ನ, ಡೈಮಂಡ್ ಲೀಗ್ ಪ್ರಶಸ್ತಿ ಸಹಿತ ಅಥ್ಲೆಟಿಕ್ಸ್ನಲ್ಲಿ ಬಹುತೇಕ ಕಿರೀಟ ಗೆದ್ದಿರುವ ನೀರಜ್ಗೆ ಈ ಬಾರಿ, ಏಕೈಕ ಕೊರತೆ ಎನಿಸಿರುವ ವಿಶ್ವ ಚಾಂಪಿಯನ್ ಪಟ್ಟವೂ ಒಲಿದುಬರುವ ನಿರೀಕ್ಷೆ ಹರಡಿದೆ.
ನೀರಜ್ ಚೋಪ್ರಾ ಚಿನ್ನದ ಪದಕ ಗೆದ್ದರೆ, ಒಲಿಂಪಿಕ್ಸ್ ಮತ್ತು ವಿಶ್ವ ಚಾಂಪಿಯನ್ಷಿಪ್ ಎರಡರಲ್ಲೂ ಚಿನ್ನ ಗೆದ್ದ 2ನೇ ಭಾರತೀಯ ಎನಿಸಲಿದ್ದಾರೆ. ಶೂಟರ್ ಅಭಿನವ್ ಬಿಂದ್ರಾ ಮೊದಲ ಸಾಧಕ.
ಫೈನಲ್ ಸ್ಪರ್ಧೆ
ಆರಂಭ: ರಾತ್ರಿ 11.50
ನೇರಪ್ರಸಾರ: ಜಿಯೋಸಿನಿಮಾ, ಸ್ಪೋರ್ಟ್ಸ್18
ನಾನು ಬೇರಾರೊಂದಿಗೂ ಸ್ಪರ್ಧಿಸುವುದಿಲ್ಲ. ಯಾವಾಗಲೂ ನನ್ನೊಂದಿಗೆ ಸ್ಪರ್ಧಿಸುತ್ತೇನೆ. ನೀರಜ್ ಜತೆಗೆ ಯಾವುದೇ ವೈರತ್ವವಿಲ್ಲ. ನೀರಜ್ ಕೂಡ ಉತ್ತಮ ನಿರ್ವಹಣೆ ತೋರಲಿ ಎಂದು ನಾನು ಶುಭ ಹಾರೈಸುತ್ತೇನೆ ಎಂದು ಅರ್ಷದ್ ನದೀಮ್ ಹೇಳಿದ್ದಾರೆ.