ಜೋಹರ್ (ಮಲೇಷ್ಯಾ): ಮೊದಲಾರ್ಧದ ಹಿನ್ನಡೆಯಿಂದ ಪುಟಿದೆದ್ದು ಮುನ್ನಡೆ ಸಾಧಿಸಿದರೂ ಅಂತಿಮ ಹಂತದಲ್ಲಿ ಮತ್ತೆ ಗೋಲು ಬಿಟ್ಟುಕೊಟ್ಟ ಭಾರತದ ಕಿರಿಯ ಪುರುಷರ ಹಾಕಿ ತಂಡ ಸುಲ್ತಾನ್ ಜೋಹರ್ ಕಪ್ನಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ಎದುರು 3-3 ಅಂತರದಿಂದ ಡ್ರಾಕ್ಕೆ ತೃಪ್ತಿಪಟ್ಟಿದೆ. ಇದರಿಂದ ಭಾರತ ಟೂರ್ನಿಯಲ್ಲಿ ಹ್ಯಾಟ್ರಿಕ್ ಗೆಲುವಿನ ಅವಕಾಶದಿಂದಲೂ ವಂಚಿತವಾಯಿತು.
ಮಂಗಳವಾರ ನಡೆದ ಪಂದ್ಯದಲ್ಲಿ ಪಾಕಿಸ್ತಾನ 5 ಮತ್ತು 39ನೇ ನಿಮಿಷದಲ್ಲಿ ಗೋಲು ಬಾರಿಸಿತು. ಇದರಿಂದ ಭಾರತ ಮೊದಲಾರ್ಧದಲ್ಲಿ 0-2 ಹಿನ್ನಡೆ ಅನುಭವಿಸಿತು. ನಂತರ ದ್ವೀತಿಯಾರ್ಧದಲ್ಲಿ ಅರೈಜೀತ್ ಸಿಂಗ್ (43ನೇ ನಿಮಿಷ), ಸೌರಭ್ ಆನಂದ್ (47) ತಲಾ 1 ಗೋಲು ಬಾರಿಸಿ ಸಮಬಲ ತಂದರೆ, ಮನ್ಮೀತ್ ಸಿಂಗ್ (53) ಮುನ್ನಡೆ ಒದಗಿಸಿದರು. ಆದರೆ, ಸುಫಿಯಾನ್ ಖಾನ್ 55ನೇ ನಿಮಿಷದಲ್ಲಿ ಪಂದ್ಯದಲ್ಲಿ ತನ್ನ 2ನೇ ಗೋಲು ಸಿಡಿಸಿ ಭಾರತಕ್ಕೆ ಗೆಲುವು ತಪ್ಪಿಸಿದರು.
ಹೈ-ಫೈವ್ ನೀಡಿದ ಹಾಕಿ ಆಟಗಾರರು!
ಭಾರತದ ಕ್ರಿಕೆಟಿಗರು ಏಷ್ಯಾಕಪ್ ಟಿ20 ಟೂರ್ನಿ ಮತ್ತು ಮಹಿಳೆಯರ ಏಕದಿನ ವಿಶ್ವಕಪ್ನಲ್ಲಿ ಪಾಕಿಸ್ತಾನದ ಆಟಗಾರರಿಗೆ ಹಸ್ತಲಾವ ನೀಡದೆ, ಪಹಲ್ಗಾಮ್ ಉಗ್ರರ ದಾಳಿಯನ್ನು ಇನ್ನೂ ಮರೆತಿಲ್ಲ ಎಂಬ ಸಂದೇಶ ರವಾನಿಸಿದ್ದರು. ಆದರೆ, ಸುಲ್ತಾನ್ ಜೋಹರ್ ಕಪ್ನಲ್ಲಿ ಭಾರತದ 21 ವಯೋಮಿತಿ ತಂಡದ ಆಟಗಾರರು ಪಂದ್ಯಕ್ಕೆ ಮುನ್ನ ಪಾಕ್ ಆಟಗಾರರಿಗೆ ಹೈ-ಫೈವ್ ನೀಡಿ ಟೀಕೆಗೆ ಗುರಿಯಾಗಿದ್ದಾರೆ. ಉಭಯ ದೇಶಗಳ ರಾಷ್ಟ್ರಗೀತೆಯ ಬಳಿಕ ಹಾಕಿ ಆಟದ ಸಂಪ್ರದಾಯದಂತೆ ಹೈ-ಫೈವ್ ನೀಡಿದರು.