ಕೊಲಂಬೊ: ದ್ವಿಪಯ ಸರಣಿಗಳ ಹೊರತಾಗಿ ಬಹುರಾಷ್ಟ್ರಗಳ ಕ್ರಿಕೆಟ್ ಟೂರ್ನಿಗಳಲ್ಲಿ ಕಳೆದ 5 ವರ್ಷಗಳಿಂದ ಪ್ರಶಸ್ತಿ ಗೆಲುವಿನ ಬರ ಎದುರಿಸುತ್ತಿರುವ ಭಾರತ ತಂಡಕ್ಕೆ 16ನೇ ಆವೃತ್ತಿಯ ಏಷ್ಯಾಕಪ್ ಏಕದಿನ ಟೂರ್ನಿಯಲ್ಲಿ ಇದನ್ನು ನೀಗಿಸಿಕೊಳ್ಳುವ ಸುವರ್ಣಾವಕಾಶ ಎದುರಾಗಿದೆ. ಜಂಟಿ ಆತಿಥೇಯ ಶ್ರೀಲಂಕಾ ವಿರುದ್ಧ ಭಾನುವಾರ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ರೋಹಿತ್ ಶರ್ಮ ಪಡೆ ಫೇವರಿಟ್ ತಂಡವಾಗಿ ಕಣಕ್ಕಿಳಿಯಲಿದೆ. ತವರಿನ ಏಕದಿನ ವಿಶ್ವಕಪ್ ಟೂರ್ನಿಗೆ ಮುನ್ನ ರಾಹುಲ್ ದ್ರಾವಿಡ್-ರೋಹಿತ್ ಶರ್ಮ ಅವರ ಕೋಚ್-ಕ್ಯಾಪ್ಟನ್ ಕಾಂಬಿನೇಷನ್ಗೆ ಏಷ್ಯಾಕಪ್ ಕಿರೀಟ ದೊಡ್ಡ ಟಾನಿಕ್ ಆಗಲಿದೆ.
ಸೂಪರ್-4 ಹಂತದಲ್ಲಿ ಪಾಕ್, ಲಂಕಾ ಎದುರು ಭರ್ಜರಿ ಗೆಲುವು ದಾಖಲಿಸಿ ಪ್ರಶಸ್ತಿ ಸುತ್ತಿಗೇರುವುದನ್ನು ಖಚಿತಪಡಿಸಿಕೊಂಡಿದ್ದ ಭಾರತ, ಬಾಂಗ್ಲಾ ವಿರುದ್ಧದ ಔಪಚಾರಿಕ ಪಂದ್ಯದಲ್ಲಿ ಪ್ರಮುಖ ಆಟಗಾರರಿಗೆ ವಿಶ್ರಾಂತಿ ನೀಡಿ ಕೈಸುಟ್ಟುಕೊಂಡಿತ್ತು. ಇದರಿಂದ ಗೆಲುವಿನ ಲಯ ತಪ್ಪಿದ್ದರೂ, ಉಪನಾಯಕ ಹಾರ್ದಿಕ್ ಪಾಂಡ್ಯ, ವಿರಾಟ್ ಕೊಹ್ಲಿ, ಜಸ್ಪ್ರೀತ್ ಬುಮ್ರಾ, ಕುಲದೀಪ್ ಯಾದವ್ರಂಥ ಪ್ರಮುಖರ ಗೈರಲ್ಲಿ ಈ ಸೋಲು ಎದುರಾಗಿರುವುದರಿಂದ ಹೆಚ್ಚಿನ ಹಿನ್ನಡೆ ತಂದಿಲ್ಲ. ದಸುನ್ ಶನಕ ಪಡೆಯ ವಿರುದ್ಧ ಭಾರತ ತಂಡ ಪ್ರಶಸ್ತಿ ಸುತ್ತಿನಲ್ಲಿ ವಿಶ್ವಾಸದಿಂದಲೇ ಕಣಕ್ಕಿಳಿಯಲಿದೆ. ಸೂಪರ್-4 ಮುಖಾಮುಖಿಯಲ್ಲಿ ಕಂಡ ಗೆಲುವು ಕೂಡ ಭಾರತಕ್ಕೆ ವಿಶ್ವಾಸ ತುಂಬಿದೆ. ಆದರೆ ಎಡಗೈ ಸ್ಪಿನ್ನರ್ ದುನಿತ್ ವೆಲ್ಲಲಾಗೆ ಅವರನ್ನು ಈ ಬಾರಿ ಎಚ್ಚರಿಕೆಯಿಂದ ಎದುರಿಸಬೇಕಾಗಿದೆ. ಪಾಕಿಸ್ತಾನ ವಿರುದ್ಧ ರೋಚಕ ಗೆಲುವು ದಾಖಲಿಸಿ ಫೈನಲ್ಗೇರಿರುವ ಲಂಕಾ ಕೂಡ ಈ ಬಾರಿ ವಿಶ್ವಾಸದಿಂದಲೇ ಕಣಕ್ಕಿಳಿಯಲಿದೆ. ಜತೆಗೆ ಲಂಕಾಗೆ ತವರಿನ ಲಾಭವೂ ಇದೆ.
2018ರಿಂದ ಪ್ರಶಸ್ತಿ ಬರ
ಭಾರತ ತಂಡ ಇತ್ತೀಚೆಗೆ ದ್ವಿಪಯ ಸರಣಿಗಳಲ್ಲಿ ಪ್ರಾಬಲ್ಯ ಸಾಧಿಸುತ್ತಿದ್ದರೂ, ಕಳೆದ 5 ವರ್ಷಗಳಿಂದ ಐಸಿಸಿ&ಏಷ್ಯಾಕಪ್ನಂಥ 2ಕ್ಕಿಂತ ಹೆಚ್ಚು ತಂಡಗಳು ಆಡುವ ಟೂರ್ನಿಗಳಲ್ಲಿ ಪ್ರಶಸ್ತಿ ಗೆಲುವು ಕಂಡಿಲ್ಲ. 2018ರ ಏಷ್ಯಾಕಪ್ನಲ್ಲೇ ಭಾರತ ಕೊನೆಯದಾಗಿ ಪ್ರಶಸ್ತಿ ಗೆದ್ದಿದೆ. ನಂತರ 2019ರ ವಿಶ್ವಕಪ್, 2021, 2022ರ ಟಿ20 ವಿಶ್ವಕಪ್, 2021, 2023ರ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್, 2022ರ ಟಿ20 ಏಷ್ಯಾಕಪ್ನಲ್ಲಿ ನಿರಾಸೆ ಕಂಡಿದೆ. ಇದೀಗ ಏಷ್ಯಾಕಪ್ ಗೆಲುವಿನೊಂದಿಗೆ ಈ ಕೊರತೆ ನೀಗಿಸಲು ಅವಕಾಶ ಲಭಿಸಿದೆ.
ಟೀಮ್ ನ್ಯೂಸ್:
ಭಾರತ: ಬಾಂಗ್ಲಾ ವಿರುದ್ಧದ ಪಂದ್ಯದಲ್ಲಿ ವಿಶ್ರಾಂತಿ ಪಡೆದಿದ್ದ ಐವರು ಆಟಗಾರರಾದ ವಿರಾಟ್ ಕೊಹ್ಲಿ, ಹಾರ್ದಿಕ್ ಪಾಂಡ್ಯ, ಜಸ್ಪ್ರೀತ್ ಬುಮ್ರಾ, ಮೊಹಮದ್ ಸಿರಾಜ್, ಕುಲದೀಪ್ ಯಾದವ್ ಮರಳಿ ಕಣಕ್ಕಿಳಿಯಲಿದ್ದಾರೆ. ಇದೇ ವೇಳೆ ತಿಲಕ್ ವರ್ಮ, ಸೂರ್ಯಕುಮಾರ್, ಪ್ರಸಿದ್ಧ ಕೃಷ್ಣ, ಮೊಹಮದ್ ಶಮಿ ಹೊರಬೀಳುವುದು ನಿಶ್ಚಿತ. ಆದರೆ ಅಕ್ಷರ್ ಪಟೇಲ್ ಸ್ಥಾನದಲ್ಲಿ ಶಾರ್ದೂಲ್ ಠಾಕೂರ್ ಸ್ಥಾನ ಉಳಿಸಿಕೊಳ್ಳುವರೇ ಅಥವಾ ವಾಷಿಂಗ್ಟನ್ ಸುಂದರ್ ಆಡುವರೇ ಎಂಬುದು ಸ್ಪಷ್ಟವಿಲ್ಲ.
ಶ್ರೀಲಂಕಾ: ಗಾಯದಿಂದಾಗಿ ಫೈನಲ್ ಪಂದ್ಯಕ್ಕೆ ಅಲಭ್ಯರಾಗಿರುವ ಮಹೀಶ್ ತೀಕ್ಷಣ ಸ್ಥಾನವನ್ನು 11ರ ಬಳಗದಲ್ಲಿ ಲೆಗ್ ಸ್ಪಿನ್ನರ್ ದುಶನ್ ಹೇಮಂತ ತುಂಬುವ ನಿರೀಕ್ಷೆ ಇದೆ. ತೀಕ್ಷಣ ಬದಲಿಗೆ ಆಲ್ರೌಂಡರ್ ಸಹನ್ ಅರಚ್ಚಿಗೆ ತಂಡ ಸೇರಿದ್ದರೂ, ಆಡುವ ಸಾಧ್ಯತೆ ಕಡಿಮೆ ಇದೆ. ದಿಮುತ್ ಕರುಣರತ್ನೆ ಬದಲಿಗೆ ಪಾಕ್ ವಿರುದ್ಧದ ಪಂದ್ಯದಲ್ಲಿ ಅವಕಾಶ ಪಡೆದ ಕುಸಲ್ ಪೆರೇರಾ ಸ್ಥಾನ ಉಳಿಸಿಕೊಳ್ಳುವ ನಿರೀಕ್ಷೆ ಇದೆ.
ಆರಂಭ: ಮಧ್ಯಾಹ್ನ 3.00
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಡಿಡಿ ಸ್ಪೋರ್ಟ್ಸ್, ಡಿಸ್ನಿ+ಹಾಟ್ಸ್ಟಾರ್ (ಒಟಿಟಿ).
7: ಭಾರತ-ಶ್ರೀಲಂಕಾ ತಂಡಗಳು ಏಷ್ಯಾಕಪ್ ಫೈನಲ್ನಲ್ಲಿ ಈ ಹಿಂದೆ 7 ಬಾರಿ ಪರಸ್ಪರ ಮುಖಾಮುಖಿ ಆಗಿದ್ದು, ಭಾರತ 4 ಮತ್ತು ಲಂಕಾ 3ರಲ್ಲಿ ಗೆಲುವು ಕಂಡಿದೆ.
ಮಳೆ ಕಾಡಿದರೆ ಮೀಸಲು ದಿನವಿದೆ
ಭಾರತ-ಪಾಕ್ ನಡುವಿನ ಸೂಪರ್-4 ಪಂದ್ಯದಂತೆ ಫೈನಲ್ ಪಂದ್ಯಕ್ಕೂ ಮೀಸಲು ದಿನವಿದೆ. ಭಾನುವಾರ ಮಳೆ ಅಡಚಣೆ ತಂದರೆ ಸೋಮವಾರ ಪಂದ್ಯ ಮುಂದುವರಿಯಲಿದೆ. ಟೂರ್ನಿಯಲ್ಲಿ ಲಂಕಾ ಚರಣದ ಇದುವರೆಗಿನ ಪಂದ್ಯಗಳಿಗೆ ಕಾಡಿದಂತೆ, ಫೈನಲ್ಗೂ ಮಳೆ ಭೀತಿ ಇದೆ. ಸಂಜೆ ವೇಳೆ ಮಳೆ ಬರುವ ಸಾಧ್ಯತೆ ಶೇ. 50ರಷ್ಟಿದ್ದರೆ, ರಾತ್ರಿ ವೇಳೆಗೆ ಈ ಸಾಧ್ಯತೆ ಶೇ.68ಕ್ಕೆ ಏರಿಕೆಯಾಗಲಿದೆ. ಹೀಗಾಗಿ ಫೈನಲ್ನಲ್ಲೂ ಓವರ್ ಕಡಿತದ ಸಾಧ್ಯತೆಗಳಿವೆ.
ಮುಖಾಮುಖಿ: 166
ಭಾರತ: 97
ಶ್ರೀಲಂಕಾ: 57
ಟೈ: 1, ರದ್ದು: 11
ಏಷ್ಯಾಕಪ್ನಲ್ಲಿ: 20
ಭಾರತ: 10
ಶ್ರೀಲಂಕಾ: 10
8: ಭಾರತ ತಂಡ ಏಕದಿನ ಮಾದರಿಯಲ್ಲಿ 7ನೇ (1984, 1988, 1990-91, 1995, 2010, 2018) ಮತ್ತು ಒಟ್ಟಾರೆ 8ನೇ ಬಾರಿ (2016ರಲ್ಲಿ ಟಿ20 ಮಾದರಿ) ಏಷ್ಯಾಕಪ್ ಗೆಲ್ಲುವ ಅವಕಾಶ ಹೊಂದಿದೆ.
7: ಶ್ರೀಲಂಕಾ ತಂಡ ಏಕದಿನ ಮಾದರಿಯಲ್ಲಿ 6ನೇ (1986, 1997, 2004, 2008, 2014) ಮತ್ತು ಒಟ್ಟಾರೆ 7ನೇ ಬಾರಿ (2022ರಲ್ಲಿ ಟಿ20 ಮಾದರಿ) ಏಷ್ಯಾಕಪ್ ಗೆಲ್ಲುವ ಅವಕಾಶ ಹೊಂದಿದೆ.
1: ಇದುವರೆಗಿನ ಎಲ್ಲ ಏಷ್ಯಾಕಪ್ ಫೈನಲ್ಗಳಲ್ಲಿ ಭಾರತ ಅಥವಾ ಪಾಕಿಸ್ತಾನ ಮತ್ತು ಶ್ರೀಲಂಕಾ ಅಥವಾ ಬಾಂಗ್ಲಾದೇಶ ತಂಡಗಳು ಕಾಣಿಸಿಕೊಂಡಿವೆ. ಆದರೆ ಭಾರತ-ಪಾಕ್, ಲಂಕಾ-ಬಾಂಗ್ಲಾ ಒಮ್ಮೆಯೂ ಫೈನಲ್ನಲ್ಲಿ ಮುಖಾಮುಖಿ ಆಗಿಲ್ಲ!