ದುಬೈ: ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಚೊಚ್ಚಲ ಆವೃತ್ತಿಯ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಪಂದ್ಯ ಡ್ರಾ ಅಥವಾ ಟೈ ಆದರೆ ಟ್ರೋಫಿ ಹಂಚಿಕೆ ಮಾಡುವ ಬಗ್ಗೆ ಈಗಾಗಲೆ ಸ್ಪಷ್ಟನೆ ನೀಡಿರುವ ಐಸಿಸಿ ಇದೀಗ ಪಂದ್ಯದಲ್ಲಿ ಫಾಲೋಆನ್ ನಿಯಮ ಹೇಗಿರಲಿದೆ ಎಂಬ ಬಗೆಗಿನ ಗೊಂದಲಗಳಿಗೂ ತೆರೆ ಎಳೆದಿದೆ.
ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಪಂದ್ಯ 5 ದಿನಗಳ ಕಾದಾಟವಾಗಿರುತ್ತದೆ ಮತ್ತು ಮಳೆಯಿಂದ ಅಡಚಣೆಗೆ ಒಳಗಾದರೆ ಮೀಸಲು ದಿನವಾದ 6ನೇ ದಿನವೂ ಆಟ ನಡೆಯಲಿದೆ. ಹೀಗಾಗಿ ಒಟ್ಟು 6 ದಿನಗಳ ಕಾಲ ಪಂದ್ಯ ನಡೆಯುವ ಸಾಧ್ಯತೆಯೂ ಇರುವುದರಿಂದ ಐಸಿಸಿ ಫಾಲೋಆನ್ ನಿಯಮದ ಬಗ್ಗೆ ಈಗಲೇ ಸ್ಪಷ್ಟಪಡಿಸಿದೆ. ಇದರನ್ವಯ ಹಾಲಿ ಇರುವ ಫಾಲೋಆನ್ ನಿಯಮಗಳೇ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ಗೂ ಅನ್ವಯಿಸಲಿದೆ. ಅದರಲ್ಲಿ ಯಾವುದೇ ರೀತಿಯ ಬದಲಾವಣೆ ಇರುವುದಿಲ್ಲ.
ಐಸಿಸಿ ನಿಯಮದ ಅನ್ವಯ ಸಾಮಾನ್ಯವಾಗಿ 5 ದಿನಗಳ ಟೆಸ್ಟ್ ಪಂದ್ಯದಲ್ಲಿ 200ಕ್ಕಿಂತ ಹೆಚ್ಚಿನ ರನ್ ಹಿನ್ನಡೆ ಕಾಣುವ ತಂಡ ಫಾಲೋಆನ್ಗೆ ಗುರಿಯಾಗುತ್ತದೆ. ಅದೇ 3 ಅಥವಾ 4 ದಿನಗಳ ಪಂದ್ಯವಾಗಿದ್ದರೆ, 150 ರನ್ ಹಿನ್ನಡೆ ಕಾಣುವ ತಂಡವೂ ಫಾಲೋಆನ್ಗೆ ಈಡಾಗುತ್ತದೆ. ಅಲ್ಲದೆ 2 ದಿನಗಳ ಪಂದ್ಯದಲ್ಲಿ 100 ಮತ್ತು 1 ದಿನದ ಪಂದ್ಯದಲ್ಲಿ 75 ರನ್ ಹಿನ್ನಡೆ ಕಾಣುವ ತಂಡ ಫಾಲೋಆನ್ಗೆ ಈಡಾಗುತ್ತದೆ. ಪಂದ್ಯದ ಮೊದಲ ಮತ್ತು 2ನೇ ದಿನದ ಆಟಗಳು ಮಳೆ ಅಥವಾ ಇತರ ಕಾರಣಗಳಿಂದಾಗಿ ನಡೆಯದೆ ಇದ್ದಾಗ ಈ 2, 3 ಮತ್ತು 1 ದಿನದ ಫಾಲೋಆನ್ ನಿಯಮಗಳು ಅನ್ವಯಿಸುತ್ತವೆ. ಆದರೆ ಪಂದ್ಯದ ಮೊದಲ ದಿನದಾಟ ನಷ್ಟಗೊಂಡರೆ, ಮೀಸಲು ದಿನ ಇರುವ ಕಾರಣ ಇದು 5 ದಿನಗಳ ಪಂದ್ಯವಾಗಿಯೇ ಪರಿಗಣಿಸಲ್ಪಡಲಿದೆ.