ಬೆಂಗಳೂರು: ಸ್ಟಾರ್ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಮುಂಬರುವ ಐಪಿಎಲ್ 17ನೇ ಆವೃತ್ತಿಗೆ ಗುಜರಾತ್ ಟೈಟಾನ್ಸ್ ತಂಡದಲ್ಲಿ ರಿಟೇನ್ ಆಗಿದ್ದರೂ, ಮುಂಬೈ ಇಂಡಿಯನ್ಸ್ ತಂಡಕ್ಕೆ ಅವರು ಮರಳುವ ಸಾಧ್ಯತೆ ಇನ್ನೂ ದೂರವಾಗಿಲ್ಲ. ಡಿಸೆಂಬರ್ 19ರಂದು ನಡೆಯಲಿರುವ ಐಪಿಎಲ್ ಆಟಗಾರರ ಹರಾಜು ಪ್ರಕ್ರಿಯೆಗೆ ಪೂರ್ವಭಾವಿಯಾಗಿ ಎಲ್ಲ 10 ತಂಡಗಳು ಭಾನುವಾರ ಉಳಿಸಿಕೊಂಡ ಮತ್ತು ಕೈಬಿಟ್ಟ ಆಟಗಾರರ ಪಟ್ಟಿಯನ್ನು ಪ್ರಕಟಿಸಿವೆ. ಆದರೆ ಆಟಗಾರರ ವರ್ಗಾವಣೆಗೆ ಡಿಸೆಂಬರ್ 12ರವರೆಗೂ ಅವಕಾಶವಿದೆ. ಹೀಗಾಗಿ ಹಾರ್ದಿಕ್ ಮುಂಬೈಗೆ ಮರಳುವ ಲೆಕ್ಕಾಚಾರ ಇನ್ನೂ ಚಾಲ್ತಿಯಲ್ಲಿದೆ.
ಕೆಲ ವರದಿಗಳ ಪ್ರಕಾರ, ಹಾರ್ದಿಕ್ ಪಾಂಡ್ಯ ಮುಂಬೈಗೆ ವರ್ಗಾವಣೆಯಾಗುವುದು ಬಹುತೇಕ ಖಚಿತವೆನಿಸಿದೆ. ಆಟಗಾರರ ರಿಟೇನ್ ಬಳಿಕ ಮುಂಬೈ ತಂಡ ಸದ್ಯ ಕೇವಲ 15.25 ಕೋಟಿ ರೂ. ಬಜೆಟ್ ಉಳಿಸಿಕೊಂಡಿದೆ. ಹೀಗಾಗಿ, ಕಳೆದ ಹರಾಜಿನಲ್ಲಿ 17.5 ಕೋಟಿ ರೂ. ಖರೀದಿಸಿದ್ದ ಆಸೀಸ್ ಆಲ್ರೌಂಡರ್ ಕ್ಯಾಮರಾನ್ ಗ್ರೀನ್ರನ್ನು ಮುಂಬೈ ತಂಡ ಆರ್ಸಿಬಿಗೆ ವರ್ಗಾವಣೆ ಮಾಡಲಿದೆ. ಜತೆಯಲ್ಲೇ 15 ಕೋಟಿ ರೂ. ಮೌಲ್ಯದ ಹಾರ್ದಿಕ್ರನ್ನು ಗುಜರಾತ್ ತಂಡದಿಂದ ಸೆಳೆದುಕೊಳ್ಳಲಿದೆ ಎನ್ನಲಾಗಿದೆ. ಇನ್ನು ಕೆಲದಿನಗಳಲ್ಲಿ ವರ್ಗಾವಣೆ ಒಪ್ಪಂದ ಅಂತಿಮಗೊಳಿಸಿ ಮುಂಬೈ&ಗುಜರಾತ್ ತಂಡಗಳು ಅಧಿಕೃತ ಪ್ರಕಟಣೆ ಹೊರಡಿಸಲಿವೆ ಎನ್ನಲಾಗಿದೆ. ಹಾರ್ದಿಕ್ ಈ ಮುನ್ನ 2015ರಿಂದ 2021ರವರೆಗೆ ಮುಂಬೈ ತಂಡದಲ್ಲೇ ಇದ್ದರು ಮತ್ತು 4 ಬಾರಿ ಪ್ರಶಸ್ತಿ ಗೆದ್ದ ತಂಡದ ಭಾಗವಾಗಿದ್ದರು.
2022ರಲ್ಲಿ ಗುಜರಾತ್ ತಂಡದ ನಾಯಕರಾಗಿ ಆಡಿದ ಚೊಚ್ಚಲ ಆವೃತ್ತಿಯಲ್ಲೇ ಪ್ರಶಸ್ತಿ ಗೆದ್ದಿದ್ದ ಹಾರ್ದಿಕ್, ಐಪಿಎಲ್ನಲ್ಲಿ ವರ್ಗಾವಣೆಯಾಗುತ್ತಿರುವ 3ನೇ ನಾಯಕರೆನಿಸುವ ಸನಿಹದಲ್ಲಿದ್ದಾರೆ. ಆರ್. ಅಶ್ವಿನ್ (ಪಂಜಾಬ್ನಿಂದ ಡೆಲ್ಲಿ) ಮತ್ತು ಅಜಿಂಕ್ಯ ರಹಾನೆ (ರಾಜಸ್ಥಾನದಿಂದ ಡೆಲ್ಲಿ) ಈ ಹಿಂದಿನ ಇಬ್ಬರು ನಾಯಕರು.
ಹರ್ಷಲ್ಗೆ ಆರ್ಸಿಬಿ ಕೊಕ್: ಆರ್ಸಿಬಿ ತಂಡ ಪ್ರಮುಖರಾದ ವೇಗಿ ಹರ್ಷಲ್ ಪಟೇಲ್, ಲಂಕಾ ಸ್ಪಿನ್ನರ್ ವಾನಿಂದು ಹಸರಂಗ ಮತ್ತು ಆಸೀಸ್ ವೇಗಿ ಜೋಶ್ ಹ್ಯಾಸಲ್ವುಡ್ರನ್ನು ಕೈಬಿಟ್ಟು ಅಚ್ಚರಿ ಮೂಡಿಸಿದೆ. ಮುಂಬೈ ತಂಡ ಇಂಗ್ಲೆಂಡ್ ವೇಗಿ ಜೋ್ರಾ ಆರ್ಚರ್ರನ್ನು ಕೈಬಿಟ್ಟಿದೆ.