ಅಹಮದಾಬಾದ್: ನಾಯಕ ಶುಭಮಾನ್ ಗಿಲ್ (76 ರನ್, 38 ಎಸೆತ, 10 ಬೌಂಡರಿ, 2 ಸಿಕ್ಸರ್) ಮತ್ತು ಜೋಸ್ ಬಟ್ಲರ್ (64 ರನ್, 37 ಎಸೆತ, 3 ಬೌಂಡರಿ, 4 ಸಿಕ್ಸರ್) ಭರ್ಜರಿ ಬ್ಯಾಟಿಂಗ್ ಬಲದಿಂದ ರನ್ಮಳೆ ಹರಿಸಿದ ಗುಜರಾತ್ ಟೈಟಾನ್ಸ್ ತಂಡ ಐಪಿಎಲ್ 18ನೇ ಆವೃತ್ತಿಯಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಎದುರು 38 ರನ್ಗಳಿಂದ ಗೆಲುವು ದಾಖಲಿಸಿದೆ. 7ನೇ ಗೆಲುವಿನೊಂದಿಗೆ ಶುಭಮಾನ್ ಗಿಲ್ ಪಡೆ ಪ್ಲೇಆ್ ಸನಿಹ ತಲುಪಿದರೆ, ಸನ್ರೈಸರ್ಸ್ ಆಸೆ ಬಹುತೇಕ ಕೊನೆಗೊಂಡಿದೆ.
ನಮೋ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಕಾದಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಗುಜರಾತ್ ತಂಡ 6 ವಿಕೆಟ್ಗೆ 224 ರನ್ ಪೇರಿಸಿತು. ಗುಜರಾತ್ ಹಾಲಿ ಆವೃತ್ತಿಯ 10 ಪಂದ್ಯಗಳಲ್ಲಿ 5ನೇ ಬಾರಿ 200 ಪ್ಲಸ್ ಮೊತ್ತ ಕಲೆಹಾಕಿತು. ಪ್ರತಿಯಾಗಿ ಅಭಿಷೇಕ್ ಶರ್ಮ (74 ರನ್, 41 ಎಸೆತ, 4 ಬೌಂಡರಿ, 6 ಸಿಕ್ಸರ್) ದಿಟ್ಟ ಆಟದ ಹೊರತಾಗಿಯೂ ಸನ್ರೈಸರ್ಸ್ -6 ವಿಕೆಟ್ಗೆ 186 ರನ್ ಗಳಿಸಲಷ್ಟೇ ಶಕ್ತವಾಯಿತು.
ಅಭಿಷೇಕ್ ಹೋರಾಟ ವ್ಯರ್ಥ: ಇಂಪ್ಯಾಕ್ಟ್ ಪ್ಲೇಯರ್ ಟ್ರಾವಿಸ್ ಹೆಡ್ (20) ಮತ್ತು ಅಭಿಷೇಕ್ ಶರ್ಮ ಮೊದಲ ವಿಕೆಟ್ಗೆ 27 ಎಸೆತಗಳಲ್ಲಿ 49 ರನ್ ಸಿಡಿಸುವ ಮೂಲಕ ಸನ್ರೈಸರ್ಸ್ ಚೇಸಿಂಗ್ಗೆ ಬಿರುಸಿನ ಆರಂಭ ಒದಗಿಸಿದರು. ನಂತರ ಕಣಕ್ಕಿಳಿದ ಇಶಾನ್ ಕಿಶನ್ (13 ರನ್, 17 ಎಸೆತ) ರನ್ ಗಳಿಸಲು ತಿಣುಕಾಡಿದರು. ಇದರಿಂದ 2ನೇ ವಿಕೆಟ್ ಜತೆಯಾಟದಲ್ಲಿ 30 ಎಸೆತಗಳಲ್ಲಿ ಕೇವಲ 33 ರನ್ ಬಂತು. ನಂತರ ಕ್ಲಾಸೆನ್ ಮತ್ತ ಅಭಿಷೇಕ್ 3ನೇ ವಿಕೆಟ್ಗೆ 33 ಎಸೆತಗಳಲ್ಲಿ 57 ರನ್ ಗಳಿಸಿ ಸನ್ ಗೆಲುವಿನಾಸೆ ಆಸೆ ಜೀವಂತವಿಟ್ಟರು. ಆದರೆ ಅಭಿಷೇಕ್, ಅನುಭವಿ ವೇಗಿ ಇಶಾಂತ್ ಶರ್ಮ ಎಸೆತದಲ್ಲಿ ಔಟಾದ ನಂತರ ಸನ್ರೈಸರ್ಸ್ ತಂಡ ದಿಢೀರ್ ಕುಸಿತ ಕಂಡು 6 ರನ್ ಅಂತರದಲ್ಲಿ 4 ವಿಕೆಟ್ ಕೈಚೆಲ್ಲಿತು. ಜತೆಗೆ ಪಂದ್ಯವೂ ಕೈಜಾರಿತು.