ಪರ್ತ್: ಕಳೆದ 20 ದಿನಗಳಿಂದ ಆಸ್ಟ್ರೆಲಿಯಾ ಪ್ರವಾಸದಲ್ಲಿದ್ದ ಋತುರಾಜ್ ಗಾಯಕ್ವಾಡ್ ಸಾರಥ್ಯದ ಭಾರತ ಎ ತಂಡ ಭಾರತ ಟೆಸ್ಟ್ ತಂಡದೆದುರಿನ ಅಭ್ಯಾಸ ಪಂದ್ಯವನ್ನು ಭಾನುವಾರ ಮುಗಿಸಿ ತವರಿನತ್ತ ಹೊರಟಿದೆ. ಆದರೆ ಎಡಗೈ ಬ್ಯಾಟರ್ ಹಾಗೂ ಕನ್ನಡಿಗ ದೇವದತ್ ಪಡಿಕ್ಕಲ್ ಮಾತ್ರ ಆಸೀಸ್ನಲ್ಲೇ ಉಳಿದುಕೊಳ್ಳಲಿದ್ದಾರೆ.
ಶುಭಮಾನ್ ಗಿಲ್ ಎಡಗೈ ಹೆಬ್ಬೆರಳಿನ ಮೂಳೆ ಮುರಿತಕ್ಕೆ ಒಳಗಾಗಿರುವುದರಿಂದ ಮತ್ತು 2ನೇ ಮಗುವಿನ ನಿರೀಕ್ಷೆಯಲ್ಲಿ ರೋಹಿತ್ ಶರ್ಮ ತವರಿನಲ್ಲೇ ಉಳಿದುಕೊಂಡಿರುವುದರಿಂದ ಪಡಿಕ್ಕಲ್ರನ್ನು ಆಸೀಸ್ ವಿರುದ್ಧದ ಮೊದಲ ಟೆಸ್ಟ್ಗೆ ಮೀಸಲು ಬ್ಯಾಟರ್ ಆಗಿ ಉಳಿಸಿಕೊಳ್ಳಲು ಟೀಮ್ ಮ್ಯಾನೇಜ್ಮೆಂಟ್ ನಿರ್ಧರಿಸಿದೆ ಎನ್ನಲಾಗಿದೆ. ಇದರಿಂದಾಗಿ ಪಡಿಕ್ಕಲ್ ನ.23ರಿಂದ ನಡೆಯಲಿರುವ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿ ಟಿ20 ಟೂರ್ನಿಯ ಆರಂಭಿಕ ಕೆಲ ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ.
ಆಸ್ಟ್ರೆಲಿಯಾ ಎ ವಿರುದ್ಧದ 2 ಚತುರ್ದಿನ ಪಂದ್ಯಗಳ 4 ಇನಿಂಗ್ಸ್ಗಳಲ್ಲಿ ಪಡಿಕ್ಕಲ್ 36, 88, 26 ಮತ್ತು 1 ರನ್ ಗಳಿಸಿದ್ದರು. ಇದುವರೆಗೆ ಭಾರತ ಪರ ಏಕೈಕ ಟೆಸ್ಟ್ ಆಡಿರುವ 24 ವರ್ಷದ ಪಡಿಕ್ಕಲ್, 65 ರನ್ ಬಾರಿಸಿ ಮಿಂಚಿದ್ದರು. ಇಂಗ್ಲೆಂಡ್ ವಿರುದ್ಧ ಹಾಲಿ ವರ್ಷ ಮಾರ್ಚ್ನಲ್ಲಿ ಆಡಿದ ಈ ಟೆಸ್ಟ್ ಬಳಿಕ ಪಡಿಕ್ಕಲ್ ಅವಕಾಶ ಪಡೆದಿಲ್ಲ.
ರೋಹಿತ್ ಪ್ರಯಾಣ ವಿಳಂಬ
ಪತ್ನಿ ರಿತಿಕಾ ಕಳೆದ ಶುಕ್ರವಾರವೇ 2ನೇ ಮಗುವಿಗೆ ಜನ್ಮ ನೀಡಿದ್ದರೂ, ನಾಯಕ ರೋಹಿತ್ ಶರ್ಮ ಅವರ ಆಸ್ಟ್ರೆಲಿಯಾ ಪ್ರಯಾಣ ವಿಳಂಬವಾಗಲಿದೆ. ಪತ್ನಿ ಮತ್ತು ಮಗುವಿನ ಜತೆಗೆ ಹೆಚ್ಚಿನ ಸಮಯ ಕಳೆಯಲು ಬಯಸಿರುವುದಾಗಿ ರೋಹಿತ್, ಬಿಸಿಸಿಐಗೆ ಮಾಹಿತಿ ನೀಡಿದ್ದಾರೆ. ಇದರಿಂದಾಗಿ ಶುಕ್ರವಾರದಿಂದ ಪರ್ತ್ನಲ್ಲಿ ನಡೆಯಲಿರುವ ಮೊದಲ ಟೆಸ್ಟ್ ಪಂದ್ಯಕ್ಕೆ ಅವರು ಅಲಭ್ಯರಾಗಲಿದ್ದು, ಉಪನಾಯಕ ಜಸ್ಪ್ರೀತ್ ಬುಮ್ರಾ ಭಾರತ ತಂಡವನ್ನು ಮುನ್ನಡೆಸುವುದು ಬಹುತೇಕ ಖಚಿತಗೊಂಡಿದೆ. ಡಿಸೆಂಬರ್ 6ರಿಂದ ಅಡಿಲೇಡ್ನಲ್ಲಿ ಪಿಂಕ್ಬಾಲ್ನಲ್ಲಿ ನಡೆಯಲಿರುವ 2ನೇ ಟೆಸ್ಟ್ಗೆ ಮುನ್ನ ರೋಹಿತ್ ತಂಡವನ್ನು ಕೂಡಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಮೊದಲ ಟೆಸ್ಟ್ ಬಳಿಕ 2ನೇ ಪಂದ್ಯಕ್ಕೆ ಮುನ್ನ 9 ದಿನಗಳ ಅಂತರವಿದೆ.