ನವದೆಹಲಿ: ಕ್ರಿಕೆಟಿಗರು ಟೆಸ್ಟ್ ಅಥವಾ ಸೀಮಿತ ಓವರ್ ಪಂದ್ಯಗಳನ್ನು ಆಡಲು ವಿಶೇಷಜ್ಞರಾಗಿ ಉಳಿದುಕೊಳ್ಳುವ ಬದಲಾಗಿ ಎಲ್ಲ ಮೂರೂ ಮಾದರಿಯಲ್ಲಿ ಆಡಬೇಕು ಎಂದು ಭಾರತ ತಂಡದ ಹೊಸ ಮುಖ್ಯ ಕೋಚ್ ಗೌತಮ್ ಗಂಭೀರ್ ಹೇಳಿದ್ದಾರೆ.
ಕೋಚ್ ಆಗಿ ನೇಮಕಗೊಂಡ ಬಳಿಕ ಕ್ರೀಡಾ ವಾಹಿನಿಯೊಂದಕ್ಕೆ ನೀಡಿರುವ ಮೊದಲ ಸಂದರ್ಶನದಲ್ಲಿ ಗಂಭೀರ್, "ಅಂತಾರಾಷ್ಟ್ರೀಯ ಕ್ರಿಕೆಟಿಗರು ಎಲ್ಲ ಮಾದರಿಯ ಕ್ರಿಕೆಟ್ಗೆ ಯೋಗ್ಯರಾಗಿರುತ್ತಾರೆ. ಯಾವುದೇ ಕ್ರಿಕೆಟಿಗ ರ್ನಿದಿಷ್ಟ ಮಾದರಿಗೆ ಅಂಟಿಕೊಂಡಿರಲು ಬಯಸುವುದಿಲ್ಲ. ನಾನು ಕೂಡ ಈ ರೀತಿ ಆಟಗಾರರು ಯಾವುದಾದರು ಒಂದು ರೀತಿಯ ಮಾದರಿಗೆ ಮೀಸಲಾಗಿರುವುದನ್ನು ಬಯಸುವುದಿಲ್ಲ. ಉತ್ತಮ ಫಾರ್ಮ್ನಲ್ಲಿರುವ ಆಟಗಾರರು ಎಲ್ಲ 3 ಮಾದರಿಯಲ್ಲೂ ಆಡಬೇಕು' ಎಂದಿದ್ದಾರೆ.
ಕೆಲ ಆಟಗಾರರು ಸೀಮಿತ ಓವರ್ ಕ್ರಿಕೆಟ್ನತ್ತ ಗಮನಹರಿಸಿ, ಟೆಸ್ಟ್ ಕ್ರಿಕೆಟ್ ಕಡೆಗಣಿಸುತ್ತಿರುವ ಬಗ್ಗೆ ಗಂಭೀರ್ ಪರೋಕ್ಷವಾಗಿ ಆಕ್ಷೇಪ ಎತ್ತಿದ್ದಾರೆ. ಪ್ರಮುಖವಾಗಿ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಇತ್ತೀಚೆಗೆ ಟೆಸ್ಟ್ ಕ್ರಿಕೆಟ್ನಿಂದ ಸಂಪೂರ್ಣವಾಗಿ ದೂರ ಉಳಿದಿದ್ದಾರೆ. 2018ರಲ್ಲಿ ಅವರು ಕೊನೇ ಟೆಸ್ಟ್ ಆಡಿದ್ದರು. ವರ್ಷಾಂತ್ಯದ ಆಸ್ಟ್ರೆಲಿಯಾ ಪ್ರವಾಸದ ಟೆಸ್ಟ್ ಸರಣಿಯಲ್ಲಿ ಹಾರ್ದಿಕ್ ಪಾಂಡ್ಯರನ್ನು ಆಡಿಸಿದರೆ ಭಾರತ ತಂಡವನ್ನು ಸೋಲಿಸಲು ಸಾಧ್ಯವಾಗುವುದಿಲ್ಲ ಎಂದು ಮಾಜಿ ನಾಯಕ ಸುನೀಲ್ ಗಾವಸ್ಕರ್ ಇತ್ತೀಚೆಗೆ ಹೇಳಿದ್ದರು.
ಗಂಭೀರ್ ಕೂಡ ಇದೇ ನಿಟ್ಟಿನಲ್ಲಿ ಮಾತನಾಡಿದ್ದು, ಆಟಗಾರರು ಈ ರೀತಿ ಕೆಲ ಮಾದರಿಗೆ ಸೀಮಿತವಾಗಲು ಗಾಯದ ಸಮಸ್ಯೆ ಪ್ರಮುಖ ಕಾರಣವಾಗಿದೆ. ಹೀಗಾಗಿ ಇಂಜುರಿ ಮ್ಯಾನೇಜ್ಮೆಂಟ್ ಮತ್ತು ಕಾರ್ಯದೊತ್ತಡ ತಗ್ಗಿಸುವತ್ತ ಗಮನಹರಿಸಬೇಕಾಗಿದೆ. ವೃತ್ತಿಪರ ಕ್ರಿಕೆಟಿಗರ ಕ್ರೀಡಾ ಜೀವನ ಸಾಕಷ್ಟು ಕಿರಿದಾದುದು. ಹೀಗಾಗಿ ಅವರು ಸಾಧ್ಯವಾದಷ್ಟು ಪಂದ್ಯಗಳನ್ನು ಆಡಲು ಪ್ರಯತ್ನಿಸಬೇಕು ಎಂದು ಹೇಳಿದ್ದಾರೆ.