ಪ್ರಣಯ ನಗರ ಪ್ಯಾರಿಸ್​ನಲ್ಲಿ ನಡೆಯಲಿರುವ ಒಲಿಂಪಿಕ್ಸ್​ಗೆ ದಾಖಲೆಯ 3 ಲಕ್ಷ ಕಾಂಡಂ ಪೂರೈಕೆ!

ಪ್ಯಾರಿಸ್​: ಪ್ರಣಯ ನಗರ ಎಂದೇ ಹೆಸರಾದ ಪ್ಯಾರಿಸ್​ನಲ್ಲಿ ಒಲಿಂಪಿಕ್ಸ್​ ಕ್ರೀಡಾಕೂಟಕ್ಕೆ ವೇದಿಕೆ ಸಜ್ಜಾಗುತ್ತಿದೆ. ಇದೇ ವೇಳೆ ಒಲಿಂಪಿಕ್ಸ್​ ಕ್ರೀಡಾ ಗ್ರಾಮದಲ್ಲಿ ಕ್ರೀಡಾಪಟುಗಳಿಗೆ ಪೂರೈಕೆಗೆ ಎಂದು ಸಂಘಟಕರು 3 ಲಕ್ಷ ಕಾಂಡಂಗಳನ್ನು ಸಿದ್ಧಗೊಳಿಸಿಟ್ಟಿದ್ದಾರೆ. ಇದು ಒಲಿಂಪಿಕ್ಸ್​ ಇತಿಹಾಸದಲ್ಲೇ ಗರಿಷ್ಠ ಸಂಖ್ಯೆಯ ಕಾಂಡೋಮ್​ ಪೂರೈಕೆಯಾಗಿರಲಿದೆ.

ಕಳೆದ 2021ರ ಟೋಕಿಯೊ ಒಲಿಂಪಿಕ್ಸ್​ ವೇಳೆ ಸೆಕ್ಸ್​ ವಿಚಾರವನ್ನು ಕ್ರೀಡಾಪಟುಗಳು ಸಾಧ್ಯವಾದಷ್ಟು ದೂರವಿಟ್ಟಿದ್ದರು. ಇದಕ್ಕೆ ಕಾರಣ ಆಗಿನ ಕರೊನಾ ಹಾವಳಿ. ಅಲ್ಲದೆ ಕ್ರೀಡಾಪಟುಗಳು ಸಾಮಾಜಿಕ ಅಂತರ ಕಾಯ್ದುಕೊಳ್ಳಬೇಕಾಗಿತ್ತು. ಜತೆಗೆ ಕ್ರೀಡಾಗ್ರಾಮದಲ್ಲಿ ಕ್ರೀಡಾಪಟುಗಳಿಗೆ ನೀಡಲಾಗಿದ್ದ ಕಾರ್ಡ್​ಬೋರ್ಡ್​ ಬೆಡ್​ಗಳು ಒಬ್ಬರಿಗಿಂತ ಹೆಚ್ಚಿನ ವ್ಯಕ್ತಿಗಳ ಭಾರ ಸಹಿಸುವ ಶಕ್ತಿ ಹೊಂದಿರಲಿಲ್ಲ. ಆದರೂ ಟೋಕಿಯೊದಲ್ಲಿ ಸಂಟಕರು 1.5 ಲಕ್ಷ ಕಾಂಡಂಗಳನ್ನು ಕ್ರೀಡಾಪಟುಗಳಿಗೆ ಪೂರೈಕೆ ಮಾಡಿದ್ದರು ಮತ್ತು ಇದನ್ನು ನಿಮ್ಮ ದೇಶದಲ್ಲಿ ಎಚ್​ಐವಿ ಜಾಗೃತಿ ಮೂಡಿಸಲು ಬಳಸಿ ಎಂಬ ಕಿವಿಮಾತು ಹೇಳಿದ್ದರು.

ಆದರೆ ಪ್ಯಾರಿಸ್​ನಲ್ಲಿ ಎಲ್ಲವೂ ಬದಲಾಗಲಿದೆ. ಇದನ್ನು ಅರಿತೇ ಸಂಘಟಕರು ಟೋಕಿಯೋಗಿಂತ ದುಪ್ಪಟ್ಟು ಕಾಂಡಂ​ಗಳನ್ನು ಪೂರೈಸಲು ವ್ಯವಸ್ಥೆ ಮಾಡಿಕೊಂಡಿದ್ದಾರೆ. ಒಲಿಂಪಿಕ್ಸ್​ ವೇಳೆ ಕಾಂಡಂಗಳನ್ನು ಪೂರೈಸುವುದು 1988ರಲ್ಲಿ ಆರಂಭಗೊಂಡಿತು. ಏಡ್ಸ್​ ಜಾಗೃತಿಗಾಗಿ ಸಿಯೋಲ್​ ಒಲಿಂಪಿಕ್ಸ್​ ವೇಳೆ ಮೊದಲ ಬಾರಿ ಕಾಂಡಂ ಹಂಚಲಾಗಿತ್ತು. ಬಳಿಕ ಈ ಸಂಖ್ಯೆ ಏರಿಕೆಯಾಗುತ್ತ ಬಂದಿದೆ. 2000ದಲ್ಲಿ ಸಿಡ್ನಿ ಗೇಮ್ಸ್​ ವೇಳೆ 70 ಸಾವಿರ ಕಾಂಡಂ ವ್ಯವಸ್ಥೆ ಮಾಡಲಾಗಿತ್ತು. ಆದರೆ ಇದು ಖಾಲಿಯಾಗಿ ಮತ್ತೆ 20 ಸಾವಿರ ಹೆಚ್ಚುವರಿ ಕಾಂಡಂ ಪೂರೈಸಲಾಗಿತ್ತು. 2016ರ ರಿಯೋ ಒಲಿಂಪಿಕ್ಸ್​ ವೇಳೆ ಮಹಿಳೆಯರಿಗೂ ಗರ್ಭ ನಿರೋಧಕಗಳನ್ನೂ ಪೂರೈಸಲಾಗಿತ್ತು.

ಕ್ರೀಡಾಗ್ರಾಮದಲ್ಲಿ ಬಹುತೇಕ ಎಲ್ಲ ರೀತಿಯ ವ್ಯವಸ್ಥೆಗಳು ಇರಲಿವೆ. ಆದರೆ ಮದ್ಯ ಮಾರಾಟವಿರುವುದಿಲ್ಲ. ಬೇಕಿದ್ದರೆ, ಪ್ಯಾರಿಸ್​ ನಗರದ ಇತರೆಡೆ ಲಭ್ಯವಾಗುವ ಎಲ್ಲ ರೀತಿಯ ಶಾಂಪೇನ್​ಗಳನ್ನೂ ಕ್ರೀಡಾಪಟುಗಳು ಆನಂದಿಸಬಹುದು ಎಂದು ಸಂಘಟಕರು ತಿಳಿಸಿದ್ದಾರೆ.

https://www.vijayavani.net/indias-tour-of-sri-lanka-2024-bcci-announces-fixtures-for-odi-and-t20i-series