Digvesh Rathi : ದಿಗ್ವೇಶ್ ರಾಥಿ... ಕ್ರೀಡಾಭಿಮಾನಿಗಳಿಗೆ ಈ ಹೆಸರನ್ನು ಪರಿಚಯಿಸುವ ಅಗತ್ಯವಿಲ್ಲ. ಏಕೆಂದರೆ, ಇತ್ತೀಚೆಗಷ್ಟೇ ಮುಕ್ತಾಯವಾದ 18ನೇ ಆವೃತ್ತಿಯ ಐಪಿಎಲ್ನಲ್ಲಿ ಲಖನೌ ಸೂಪರ್ ಜೈಂಟ್ಸ್ ತಂಡವನ್ನು ಪ್ರತಿನಿಧಿಸಿದ ದಿಗ್ವೇಶ್, ತಮ್ಮ ಬೌಲಿಂಗ್ ಪ್ರದರ್ಶನಕ್ಕಿಂತ ಹೆಚ್ಚಾಗಿ ತಮ್ಮ ನೋಟ್ಬುಕ್ ಆಚರಣೆಗಳಿಂದ ವಿವಾದ ಸೃಷ್ಟಿಸಿ ಭಾರಿ ಸುದ್ದಿಯಾದರು. ತಮ್ಮ ವಿಭಿನ್ನ ಆಚರಣೆಯಿಂದಾಗಿ ಈ ಯುವ ಸ್ಪಿನ್ನರ್ ಭಾರೀ ಬೆಲೆ ತೆರಬೇಕಾಯಿತು.
ದಿಗ್ವೇಶ್ ರಾಥಿ, ತಮ್ಮ ಅದ್ಭುತ ಪ್ರತಿಭೆಯ ಹೊರತಾಗಿಯೂ, ಅವರ ವಿಚಿತ್ರ ಸಂಭ್ರಮಾಚರಣೆಗಳು ಕೆಲವರ ಮುಜುಗರಕ್ಕೆ ಕಾರಣವಾಯಿತು. ಈ ವರ್ಷದ ಐಪಿಎಲ್ ಋತುವಿನಲ್ಲಿ ಬಿಸಿಸಿಐ, ದಿಗ್ವೇಶ್ ಅವರಿಗೆ ಎರಡು ಬಾರಿ ದಂಡ ವಿಧಿಸಿತು ಮತ್ತು ಒಂದು ಪಂದ್ಯದ ನಿಷೇಧವನ್ನೂ ಹೇರಿತು. ಒಟ್ಟಾರೆಯಾಗಿ, ರಾಥಿ 13 ಐಪಿಎಲ್ ಪಂದ್ಯಗಳನ್ನು ಆಡಿದರು ಮತ್ತು 14 ವಿಕೆಟ್ಗಳನ್ನು ಪಡೆದರು.
ತಾಜಾ ಸಂಗತಿ ಏನೆಂದರೆ, ದಿಗ್ವೇಶ್ ರಾಥಿ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಇತ್ತೀಚೆಗೆ, ಲಖನೌ ಸೂಪರ್ ಜೈಂಟ್ಸ್ ಫ್ರಾಂಚೈಸಿ ತನ್ನ ಎಕ್ಸ್ ಖಾತೆಯಲ್ಲಿ ರಾಥಿ ಅವರ ಅದ್ಭುತ ಬೌಲಿಂಗ್ನ ವಿಡಿಯೋವನ್ನು ಹಂಚಿಕೊಂಡಿದೆ. ಈ ವರ್ಷ ಫೆಬ್ರವರಿ 21ರಂದು ಎಂಪ್ರೆಸ್ ಕ್ರಿಕೆಟ್ ಲೀಗ್ನ ಭಾಗವಾಗಿ AB ರೈಸಿಂಗ್ ತಂಡ ವಿರುದ್ಧದ ಪಂದ್ಯದಲ್ಲಿ, ದಿಗ್ವೇಶ್ ರಾಥಿ ಅವರು ಸಹಗಲ್ ಕ್ರಿಕೆಟ್ ಕ್ಲಬ್ ಪರ ಸತತ ಐದು ಎಸೆತಗಳಲ್ಲಿ ಐದು ವಿಕೆಟ್ಗಳನ್ನು ಕಬಳಿಸಿದರು.
ಲಖನೌ ಫ್ರಾಂಚೈಸಿ ಈ ಸಾಧನೆಯ ವಿಡಿಯೋವನ್ನು ತನ್ನ ಅಭಿಮಾನಿಗಳೊಂದಿಗೆ ಹಂಚಿಕೊಂಡಿತು. ಆ ಪಂದ್ಯದಲ್ಲಿ ದಿಗ್ವೇಶ್ ಒಟ್ಟು 7 ವಿಕೆಟ್ಗಳನ್ನು ಕಬಳಿಸಿ ಎದುರಾಳಿ ತಂಡವನ್ನು ನಾಶಮಾಡಿದರು. 264 ರನ್ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ ಎಬಿ ರೈಸಿಂಗ್ ಕೇವಲ 151 ರನ್ಗಳಿಗೆ ಕುಸಿದು ಬಿತ್ತು. ಇದಕ್ಕೆ ಕಾರಣ ದಿಗ್ವೇಶ್ ರಾಥಿ. ಇದೀಗ ಲಖನೌ ಫ್ರಾಂಚೈಸಿ ಶೇರ್ ಮಾಡಿರುವ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ವಿಡಿಯೋ ನೋಡಿದವರು ಐಪಿಎಲ್ನಲ್ಲಿ ಮಾಡಿದ ರೀತಿ ನೋಟ್ಬುಕ್ ಆಚರಣೆ ಮಾಡಿಲ್ಲ ಏಕೆ ಎಂದು ಪ್ರಶ್ನಿಸುತ್ತಿದ್ದಾರೆ.
ಇನ್ನು ಈ ವಿಡಿಯೋವನ್ನು ಲಖನೌ ಫ್ರಾಂಚೈಸಿ ಮಾಲೀಕ ಸಂಜೀವ್ ಗೋಯೆಂಕಾ ಕೂಡ ತಮ್ಮ ಎಕ್ಸ್ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಸ್ಥಳೀಯ ಟಿ20 ಪಂದ್ಯದಲ್ಲಿ ದಿಗ್ವೇಶ್ ರಾಥಿ ಒಂದೇ ಓವರ್ರನಲ್ಲಿ 5 ಎಸೆತಕ್ಕೆ 5 ವಿಕೆಟ್ ಪಡೆದಿರುವ ಈ ಕ್ಲಿಪ್ ಅನ್ನು ಆಕಸ್ಮಿಕವಾಗಿ ನೋಡಿದೆ. 2025ರ ಐಪಿಎಲ್ನಲ್ಲಿ ಲಖನೌ ತಂಡ ರಾಥಿ ಅವರನ್ನು ಬ್ರೇಕ್ಔಟ್ ತಾರೆಯನ್ನಾಗಿ ಮಾಡಿದೆ. ಈ ವಿಶೇಷ ಪ್ರತಿಭೆಯ ಒಂದು ನೋಟ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)