ಮುಂಬೈ: ಉಪನಾಯಕಿ ಸ್ಮೃತಿ ಮಂದನಾ (74 ರನ್, 106 ಎಸೆತ, 12 ಬೌಂಡರಿ) ಸಹಿತ ನಾಲ್ವರು ಬ್ಯಾಟುಗಾರ್ತಿಯರ ಅರ್ಧಶತಕಗಳ ಬಲದಿಂದ ಭಾರತ ತಂಡ ಮಹಿಳೆಯರ ಏಕೈಕ ಟೆಸ್ಟ್ನಲ್ಲಿ ಪ್ರವಾಸಿ ಆಸ್ಟ್ರೆಲಿಯಾ ತಂಡದ ಎದುರು ಭರ್ಜರಿ ಮುನ್ನಡೆಯೊಂದಿಗೆ ಪಂದ್ಯದ ಮೇಲೆ ನಿಯಂತ್ರಣ ಸಾಧಿಸಿದೆ.
ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಶುಕ್ರವಾರ 1 ವಿಕೆಟ್ಗೆ 98 ರನ್ಗಳಿಂದ 2ನೇ ದಿನದಾಟ ಆರಂಭಿಸಿದ ಭಾರತ, ದಿನದಂತ್ಯಕ್ಕೆ 7 ವಿಕೆಟ್ಗೆ 376 ರನ್ ಪೇರಿಸಿದೆ. ಇದರೊಂದಿಗೆ ಹರ್ಮಾನ್ಪ್ರೀತ್ ಕೌರ್ ಪಡೆ ಮೊದಲ ಇನಿಂಗ್ಸ್ನಲ್ಲಿ 157 ರನ್ ಮುನ್ನಡೆ ಸಾಧಿಸಿದೆ.
ಸ್ಮೃತಿ ಜತೆಗೆ ಪದಾರ್ಪಣೆ ಪಂದ್ಯವಾಡಿದ ರಿಚಾ ಘೋಷ್ (52 ರನ್, 104 ಎಸೆತ, 7 ಬೌಂಡರಿ), ಜೆಮೀಮಾ ರೋಡ್ರಿಗಸ್ (73 ರನ್, 121 ಎಸೆತ, 9 ಬೌಂಡರಿ) ಮತ್ತು ದೀಪ್ತಿ ಶರ್ಮ (70*ರನ್, 147 ಎಸೆತ, 9 ಬೌಂಡರಿ) ಕೂಡ ಅರ್ಧಶತಕ ಸಿಡಿಸಿದರು. ನಾಯಕಿ ಹರ್ಮಾನ್ಪ್ರೀತ್ ಕೌರ್ ಸೊನ್ನೆ ಸುತ್ತಿ ನಿರಾಸೆ ಮೂಡಿಸಿದರು. ದೀಪ್ತಿ ಶರ್ಮ ದಿನದಂತ್ಯಕ್ಕೆ ಮುರಿಯದ 8ನೇ ವಿಕೆಟ್ಗೆ ಪೂಜಾ ವಸ್ತ್ರಾಕರ್ (33*) ಜತೆ 102 ರನ್ ಸೇರಿಸುವ ಮೂಲಕ ಮುನ್ನಡೆಯನ್ನು ಹಿಗ್ಗಿಸಿದರು. ರಿಚಾ ಘೋಷ್ ಪದಾರ್ಪಣೆಯ ಟೆಸ್ಟ್ನಲ್ಲೇ ಅರ್ಧಶತಕ ಬಾರಿಸಿದ ಭಾರತದ 14ನೇ ಬ್ಯಾಟುಗಾರ್ತಿ ಎನಿಸಿದರು.
ಆಸ್ಟ್ರೆಲಿಯಾ: 219; ಭಾರತ: 119 ಓವರ್ಗಳಲ್ಲಿ 7 ವಿಕೆಟ್ಗೆ 376 (ಸ್ಮೃತಿ 74, ರಿಚಾ 52, ಜೆಮೀಮಾ 73, ಹರ್ಮಾನ್ಪ್ರೀತ್ 0, ಯಸ್ತಿಕಾ 1, ದೀಪ್ತಿ 70*, ಪೂಜಾ 33*, ಗಾರ್ಡ್ನರ್ 100ಕ್ಕೆ 4).