ನವದೆಹಲಿ: ಭಾರತದ ಸ್ಟಾರ್ ಜಾವೆಲಿನ್ ಎಸೆತಗಾರ ನೀರಜ್ ಚೋಪ್ರಾಗೆ 3 ಬಾರಿಯ ಒಲಿಂಪಿಕ್ಸ್ ಚಾಂಪಿಯನ್ ಹಾಗೂ ವಿಶ್ವದಾಖಲೆ ವೀರ ಜಾನ್ ಜೆಲೆಜ್ನಿ ನೂತನ ಕೋಚ್ ಆಗಿ ನೇಮಕಗೊಂಡಿದ್ದಾರೆ. ಮುಂದಿನ ವರ್ಷದ ಅಥ್ಲೆಟಿಕ್ಸ್ ಋತುವಿಗೆ ಪೂರ್ವಭಾವಿಯಾಗಿ ಶನಿವಾರ ಈ ವಿಷಯವನ್ನು ಪ್ರಕಟಿಸಲಾಗಿದ್ದು, ನೀರಜ್ಗೆ ವಿಶ್ವ ಚಾಂಪಿಯನ್ ಪಟ್ಟ ರಸಿಕೊಳ್ಳಲು 58 ವರ್ಷದ ಜೆಲೆಜ್ನಿ ನೆರವಾಗುವ ನಿರೀಕ್ಷೆ ಇದೆ.
ಜೆಕ್ ಗಣರಾಜ್ಯದ ದಿಗ್ಗಜ ಜೆಲೆಜ್ನಿ ಆಧುನಿಕ ಯುಗದಲ್ಲಿ ಶ್ರೇಷ್ಠ ಜಾವೆಲಿನ್ ಎಸೆತಗಾರರಾಗಿ ಗುರುತಿಸಲ್ಪಟ್ಟಿದ್ದಾರೆ. ಅವರು 1992, 1996 ಮತ್ತು 2000ದ ಒಲಿಂಪಿಕ್ಸ್ನಲ್ಲಿ ಸ್ವರ್ಣ ಪದಕ ಗೆದ್ದುಕೊಂಡಿದ್ದರು. ಜತೆಗೆ ಮೂರು ಬಾರಿ (1993, 1995, 2001) ವಿಶ್ವ ಚಾಂಪಿಯನ್ಷಿಪ್ ಕೂಡ ಜಯಿಸಿದ್ದಾರೆ. ಅವರು 98.48 ಮೀಟರ್ ಎಸೆತದ ವಿಶ್ವದಾಖಲೆಯನ್ನೂ ಹೊಂದಿದ್ದಾರೆ.
ನೀರಜ್ ಇದುವರೆಗೆ ಜರ್ಮನಿಯ ಬಯೋಮೆಕ್ಯಾನಿಕ್ಸ್ ತಜ್ಞ ಕ್ಲೌಸ್ ಬಾಟೋರ್ನಿಟ್ಜ್ ಅವರಿಂದ ತರಬೇತಿ ಪಡೆಯುತ್ತಿದ್ದರು. 75 ವರ್ಷದ ಬಾಟೋರ್ನಿಟ್ಜ್ ವಯಸ್ಸಿನ ಕಾರಣದಿಂದಾಗಿ ಇತ್ತೀಚೆಗೆ ನಿವೃತ್ತಿ ಹೊಂದಿದ್ದರು.
2021ರ ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಚಿನ್ನದ ಪದಕ ಗೆದ್ದು ಇತಿಹಾಸ ಬರೆದಿದ್ದ ನೀರಜ್, ಹಾಲಿ ವರ್ಷದ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ರಜತ ಪದಕಕ್ಕೆ ತೃಪ್ತಿಪಟ್ಟಿದ್ದರು. ಈ ಬಾರಿ ಡೈಮಂಡ್ ಲೀಗ್ ಫೈನಲ್ಸ್ನಲ್ಲೂ 2ನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದರು. ಇನ್ನೂ 90 ಮೀಟರ್ ಗಡಿ ದಾಟದಿರುವುದು ಅವರಿಗೆ ಪ್ರಮುಖ ಹಿನ್ನಡೆ ಎನಿಸಿದೆ.
ಜಾವೆಲಿನ್ ಥ್ರೋ ಸ್ಪರ್ಧೆ ಆರಂಭಿಸಿದ ದಿನಗಳಿಂದಲೂ ದಿಗ್ಗಜ ಜೆಲೆಜ್ನಿ ಅಭಿಮಾನಿಯಾಗಿರುವ ನೀರಜ್, ತನ್ನ ಕೌಶಲಗಳನ್ನು ಸುಧಾರಿಸಲು ಅವರದೇ ವಿಡಿಯೋಗಳನ್ನು ವೀಕ್ಷಿಸುತ್ತಿದ್ದರು.
"ನಾನು ಜಾನ್ ಅವರ ತಾಂತ್ರಿಕತೆ ಮತ್ತು ನಿಖರತೆಗೆ ಮನಸೋತಿದ್ದೆ. ಅವರ ವಿಡಿಯೋಗಳನ್ನು ವೀಕ್ಷಿಸುತ್ತ ಸಾಕಷ್ಟು ಸಮಯ ಕಳೆದಿರುವೆ. ಅವರು ಈ ಕ್ರೀಡೆಯಲ್ಲಿ ಹಲವು ವರ್ಷಗಳ ಕಾಲ ಅತ್ಯುತ್ತಮರೆನಿಸಿದ್ದರು. ಅವರೊಂದಿಗೆ ಕಾರ್ಯನಿರ್ವಹಿಸುವುದು ಅಮೂಲ್ಯವಾದುದು. ಯಾಕೆಂದರೆ ನಾವಿಬ್ಬರೂ ಒಂದೇ ರೀತಿಯ ಎಸೆತದ ಶೈಲಿ ಹೊಂದಿದ್ದೇವೆ. ಜಾವೆಲಿನ್ ಬಗ್ಗೆ ಅವರ ಜ್ಞಾನ ಸರಿಸಾಟಿ ಇಲ್ಲದ್ದಾಗಿದೆ' ಎಂದು 26 ವರ್ಷದ ನೀರಜ್ ತಿಳಿಸಿದ್ದಾರೆ. ತನಗೆ 90 ಮೀ. ಗಡಿ ದಾಟಲು ಜೆಲೆಜ್ನಿ ಅನುಭವ ನೆರವಾಗಲಿದೆ ಎಂದೂ ನೀರಜ್ ನಂಬಿದ್ದಾರೆ.
ನಾನೀಗ ನನ್ನ ವೃತ್ತೀಜಿವನದ ಮುಂದಿನ ಮಟ್ಟಕ್ಕೇರಲು ಸಜ್ಜಾಗಿರುವ ಸಮಯದಲ್ಲಿ ಜಾನ್ ಜೆಲೆಜ್ನಿ ನನ್ನೊಂದಿಗೆ ನಿಂತಿರುವುದು ದೊಡ್ಡ ಗೌರವವಾಗಿದೆ. ಅವರೊಂದಿಗೆ ಕೆಲಸ ಆರಂಭಿಸಲು ತುದಿಗಾಲಲ್ಲಿ ನಿಂತಿರುವೆ ಎಂದು ನೀರಜ್ ಹೇಳಿದ್ದಾರೆ.
ನೀರಜ್ ಇನ್ನೂ ಹೆಚ್ಚಿನ ಸಾಮರ್ಥ್ಯ ಹೊಂದಿರುವುದರಿಂದ ಅವರೊಂದಿಗೆ ಕಾರ್ಯನಿರ್ವಹಿಸುವುದನ್ನು ನಾನೂ ಎದುರು ನೋಡುತ್ತಿರುವೆ ಎಂದು ಜೆಲೆಜ್ನಿ ಹೇಳಿದ್ದಾರೆ.
"ನೀರಜ್ ಪ್ರತಿಭೆಯ ಬಗ್ಗೆ ನಾನು ಹಲವು ವರ್ಷಗಳ ಹಿಂದೆಯೇ ಮಾತನಾಡಿದ್ದೆ. ಅವರ ವೃತ್ತೀಜಿವನದ ಆರಂಭದಲ್ಲೇ ಅವರನ್ನು ಗಮನಿಸಿದ್ದೆ. ಅವರು ಶ್ರೇಷ್ಠ ಲಿತಾಂಶ ನೀಡುವ ವಿಶ್ವಾಸವಿತ್ತು. ಜೆಕ್ ದೇಶದಿಂದ ಹೊರಗಿನವರಿಗೆ ಯಾರಿಗಾದರೂ ತರಬೇತಿ ನೀಡುವುದಿದ್ದರೆ, ನನ್ನ ಮೊದಲ ಆಯ್ಕೆ ನೀರಜ್ ಆಗಿರುತ್ತಾರೆ ಎಂದೂ ನಾನು ಹೇಳಿದ್ದೆ. ಇದುವರೆಗೆ ಹಲವು ಅಥ್ಲೀಟ್ಗಳು ತರಬೇತಿಗಾಗಿ ನನ್ನನ್ನು ಸಂಪರ್ಕಿಸಿದ್ದರು. ಅವರೆಲ್ಲರ ಪೈಕಿ ನಾನು ನೀರಜ್ರನ್ನೇ ಆರಿಸಿರುವೆ. ದಣ ಆಫ್ರಿಕಾದಲ್ಲಿನ ಶಿಬಿರದಲ್ಲಿ ಅವರಿಗೆ ಮೊದಲ ಬಾರಿ ವೈಯಕ್ತಿಕವಾಗಿ ತರಬೇತಿ ನೀಡುವೆ' ಎಂದು ಜೆಲೆಜ್ನಿ ತಿಳಿಸಿದ್ದಾರೆ.
ಜೆಲೆಜ್ನಿ ಈ ಮುನ್ನ ಜೆಕ್ ಗಣರಾಜ್ಯದವರೇ ಆದ ಟೋಕಿಯೊ ಒಲಿಂಪಿಕ್ಸ್ ರಜತ ವಿಜೇತ ಜೇಕಬ್ ವಡ್ಲೆಜ್, ವಿಟೆಸ್ಲಾವ್ ವೆಸೆಲಿ ಮತ್ತು ಮಹಿಳಾ ವಿಭಾಗದ 3 ಬಾರಿಯ ವಿಶ್ವ ಚಾಂಪಿಯನ್ ಮತ್ತು 2 ಬಾರಿಯ ಒಲಿಂಪಿಕ್ಸ್ ಚಾಂಪಿಯನ್ ಬಾರ್ಬೊರಾ ಸ್ಪೊಟಕೋವಗೆ ತರಬೇತಿ ನೀಡಿದ್ದರು.