ಯುವರಾಜ್​ ಸಿಂಗ್​ಗಿಂತಲೂ ಅಭಿಷೇಕ್​... ಮೊಹಮ್ಮದ್​​ ಅಮೀರ್​ಗೆ ಖಡಕ್​ ತಿರುಗೇಟು ಕೊಟ್ಟ ಅಶ್ವಿನ್​! Abhishek Sharma

Abhishek Sharma : ಟೀಮ್​ ಇಂಡಿಯಾದ ಯುವ ಆರಂಭಿಕ ಆಟಗಾರ ಅಭಿಷೇಕ್​ ಶರ್ಮಾ ವಿರುದ್ಧ ಟೀಕೆಗಳ ಸುರಿಮಳೆಗೈದಿದ್ದ ಪಾಕಿಸ್ತಾನದ ಸ್ಟಾರ್​ ಬೌಲರ್​ ಮೊಹಮ್ಮದ್​ ಅಮೀರ್​ ಅವರನ್ನು ಭಾರತದ ಮಾಜಿ ಆಟಗಾರ ರವಿಚಂದ್ರನ್​ ಅಶ್ವಿನ್​ ಅವರು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಅಹಮದಾಬಾದ್​ನಲ್ಲಿ ನಡೆದ ಟಿ20 ವಿಶ್ವಕಪ್​ ಟೂರ್ನಿಯ ಎರಡನೇ ಸೂಪರ್​-8 ಹಂತದ ಪಂದ್ಯವನ್ನು ದಕ್ಷಿಣ ಆಫ್ರಿಕಾ ವಿರುದ್ಧ ಸೋತ ಟೀಮ್ ಇಂಡಿಯಾಗೆ ಭಾರೀ ಟೀಕೆಗಳು ಹರಿದುಬಂದವು. ಗ್ರೂಪ್​ ಸ್ಟೇಜ್​ನಲ್ಲಿ ಆಡಿದ ನಾಲ್ಕು ಪಂದ್ಯಗಳಲ್ಲಿ ಸತತ ಜಯ ಸಾಧಿಸಿದ ಸೂರ್ಯಕುಮಾರ್ ಯಾದವ್​ ಪಡೆಗೆ ಸೌತ್ ಆಫ್ರಿಕಾ ಎದುರು ಗೆಲುವಿನ ಓಟ ಮುಂದುವರೆಸಲು ಆಗಲಿಲ್ಲ. ಒಂದೆಡೆ, ಭಾರತ 74 ರನ್​ಗಳ ಹೀನಾಯ ಸೋಲು ಅನುಭವಿಸಿದರೆ, ಮತ್ತೊಂದೆಡೆ ಮೂರು ಡಕ್​ಔಟ್​ ಬಳಿಕ ಮತ್ತೊಂದು ಪಂದ್ಯದಲ್ಲಿಯೂ ಅಭಿಷೇಕ್​ ತಮ್ಮ ಫ್ಲಾಪ್​ ಶೋ ಮುಂದುವರಿಸಿದರು. ಹೀಗಾಗಿ, ಅಭಿಷೇಕ್​ ಟೀಕೆಗಳಿಗೆ ಗುರಿಯಾದರು.

ಅಭಿಷೇಕ್​ ಒಬ್ಬ ಅದ್ಭುತ ಬ್ಯಾಟರ್​ ಏನಲ್ಲ. ಆತ ಸ್ಲಾಗರ್​ (ಟೆಕ್ನಿಕ್​ ಇಲ್ಲದೆ ಆಡುವ ಕ್ರಿಕೆಟಿಗ). ಅಭಿಷೇಕ್​ರನ್ನು ನಾನು ನಮ್ಮದೇ ತಂಡದ ಬ್ಯಾಟರ್​ ಸೈಮ್​ ಆಯುಬ್​ಗೆ ಹೋಲಿಸುತ್ತೇನೆ. ಕಾರಣ, ಆಯುಬ್​ ಬಂದಾಗ ಅವನಿಗೆ ಯಾವ ಕಡೆ ಹೊಡೆಯಬೇಕು ಅನ್ನೋದೇ ಗೊತ್ತಿರಲಿಲ್ಲ. ಆಡಬಾರದ ಜಾಗದಲ್ಲಿ ಆಡ್ತಿದ್ದ. ಲೆಗ್​ಸೈಡ್​ ರನ್​ಗಳನ್ನು ಕಲೆಹಾಕುತ್ತಿದ್ದ. ಬಾಲ್​ ನಾಲ್ಕನೇ ಅಥವಾ ಐದನೇ ಸ್ಟಂಪ್​ನತ್ತ ಬಂದರೆ ಅವನಿಗೆ ಏನು ಮಾಡಬೇಕೋ ತಿಳಿಯುತ್ತಿರಲಿಲ್ಲ. ಅಭಿಷೇಕ್ ಕೂಡ ಹಾಗೆಯೇ ಎಂದು ಅಮೀರ್​ ಹೇಳಿದ್ದರು.

ಅಲ್ಲದೆ, ಪಾಕಿಸ್ತಾನದ ಟಿವಿಯಲ್ಲೂ ಮಾತನಾಡಿದ್ದ ಅಮೀರ್​, ನಾನು ನನ್ನ ಹೇಳಿಕೆಗೆ ಈಗಲೂ ಬದ್ಧ. ಇಲ್ಲಿ ಅಭಿಷೇಕ್​ ಶರ್ಮರನ್ನು ಕೆಳಗೆ ಹಾಕಿ ಮಾತಾಡಬೇಕು ಅಥವಾ ಟೀಕಿಸಬೇಕು ಅಂತ ಸ್ಲಾಗರ್​ ಪದ ಬಳಸಲಿಲ್ಲ. ಅವರ ಬಗ್ಗೆ ಆ ರೀತಿ ಹೇಳುತ್ತಿದ್ದದ್ದು ಕೇವಲ ಒಬ್ಬ ಬೌಲರ್ ದೃಷ್ಟಿಯಲ್ಲಿ ಮಾತ್ರ. ಸೂಪರ್​-8 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧವೂ ಅವರ ವಿಫಲರಾಗಿದ್ದಾರೆ. ಕೇವಲ 14 ರನ್​ ಗಳಿಸಿದ್ದಾರೆ. ಇಷ್ಟು ರನ್​ ಅನ್ನು ಒಂದೇ ಸೈಡ್​ನಲ್ಲಿ ಅವರು ಕಲೆಹಾಕಿದ್ದಾರೆ. ಅಭಿಷೇಕ್ ಆಡಿದ್ದೆಲ್ಲ ಕೆಟ್ಟ ಬಾಲ್​ಗಳೇ. ಯಾವಾಗ ರಬಾಡ ಉತ್ತಮ ಬೌಲಿಂಗ್ ದಾಳಿಗೆ ಮುಂದಾದರೋ, ಆಗ ಹೇಗೆ ಆಡಬೇಕು ಅನ್ನೋದೇ ಆತನಿಗೆ ತಿಳಿಯಲಿಲ್ಲ ಎಂದರು.

ಟೀಕೆಗಳ ನಡುವೆ ಅಭಿಷೇಕ್​ ಶರ್ಮಾ ನಿನ್ನೆ ಮತ್ತೆ ಫಾರ್ಮ್​ಗೆ ಮರಳಿದ್ದಾರೆ. ನಿನ್ನೆ ಜಿಂಬಾಬ್ವೆ ವಿರುದ್ಧ ನಡೆದ ಸೂಪರ್​ 8 ಪಂದ್ಯದಲ್ಲಿ ಟೀಮ್​ ಇಂಡಿಯಾ ಮೊದಲು ಬ್ಯಾಟ್​ ಮಾಡಿ 256 ರನ್​ ಕಲೆಹಾಕಿತು. ಈ ಪಂದ್ಯದಲ್ಲಿ ಉತ್ತಮ ಬ್ಯಾಟಿಂಗ್​ ಆಡಿದ ಅಭಿಷೇಕ್​, 30 ಎಸೆತಗಳಲ್ಲಿ 55 ರನ್​ ಗಳಿಸಿದರು. ಈ ಮೂಲಕ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ನಿನ್ನೆ ಅಭಿಷೇಕ್​ ಆಡಿದ ರೀತಿಯನ್ನು ಉಲ್ಲೇಖಿಸಿ ಟೀಮ್​ ಇಂಡಿಯಾದ ಮಾಜಿ ಸ್ಪಿನ್​ ಮಾಂತ್ರಿಕ ಆರ್​. ಅಶ್ವಿನ್​, ಅಮೀರ್​ಗೆ ಜಾಡಿಸಿದ್ದಾರೆ. ಅಭಿಷೇಕ್ ಶರ್ಮಾ ಆಟದ ಬಗ್ಗೆ ನೀವು ಏನು ಬೇಕಾದರೂ ಹೇಳಬಹುದು, ಆದರೆ ಅವರು ಸ್ಲಾಗರ್​ ಅಲ್ಲ. ಅವರು ಕ್ರಿಕೆಟ್‌ನಲ್ಲಿ ಅತ್ಯಂತ ಉತ್ತಮ ಬ್ಯಾಟ್ ಸ್ವಿಂಗ್‌ಗಳಲ್ಲಿ ಒಂದನ್ನು ಹೊಂದಿದ್ದಾರೆ. ಅವರ ಮಾರ್ಗದರ್ಶಕ ಯುವರಾಜ್ ಸಿಂಗ್‌ಗಿಂತಲೂ ಅಭಿಷೇಕ್​ ಉತ್ತಮರು. ಅಭಿ ಅವರ ಏಕೈಕ ತಪ್ಪೆಂದರೆ, ಪ್ರತಿ ಚೆಂಡನ್ನೂ ಸಿಕ್ಸರ್​ಗೆ ಅಟ್ಟುವ ಉದ್ದೇಶ ತೋರುತ್ತಾರೆ ಎಂದರು. ಈ ಮೂಲಕ ಅಮೀರ್​ ಹೇಳಿಕೆಗೆ ಅಶ್ವಿನ್​ ಖಡಕ್​ ಉತ್ತರ ನೀಡಿದರು, (ಏಜೆನ್ಸೀಸ್​).