Arshdeep Singhs Swing: ನ್ಯೂಜಿಲೆಂಡ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ತಮ್ಮ ಭರ್ಜರಿ ಬೌಲಿಂಗ್ ಪ್ರದರ್ಶನದ ಮೂಲಕ 4 ವಿಕೆಟ್ ಕಲೆಹಾಕಿ ಮಿಂಚಿದ ಭಾರತದ ಎಡಗೈ ಯುವ ವೇಗಿ ಅರ್ಶ್‌ದೀಪ್ ಸಿಂಗ್ ಅವರನ್ನು ಟೀಮ್ ಇಂಡಿಯಾದ ದಂತಕಥೆ ಸುನಿಲ್ ಗವಾಸ್ಕರ್ ಹಾಗೂ ಹಿರಿಯ ಬ್ಯಾಟ್ಸ್‌ಮನ್ ಅಜಿಂಕ್ಯ ರಹಾನೆ ಮುಕ್ತಕಂಠದಿಂದ ಪ್ರಶಂಸಿಸಿದ್ದಾರೆ.
ಚೆಂಡನ್ನು ಎರಡೂ ಕಡೆಗೆ ಸ್ವಿಂಗ್ ಮಾಡುವ ಅದ್ಭುತ ಕೌಶಲ ಹೊಂದಿರುವ ಅರ್ಶ್‌ದೀಪ್ ಸಿಂಗ್ ಅವರನ್ನು ಭಾರತೀಯ ಟೆಸ್ಟ್ ತಂಡಕ್ಕೂ ತಕ್ಷಣವೇ ಪರಿಗಣಿಸಬೇಕು ಎಂದು ಇಬ್ಬರೂ ಮಾಜಿ ಆಟಗಾರರು ಒತ್ತಾಯಿಸಿದ್ದಾರೆ.
ಬುಧವಾರ ಆಕ್ಲೆಂಡ್‌ನ ಈಡನ್ ಪಾರ್ಕ್ ಮೈದಾನದಲ್ಲಿ ನಡೆದ ನ್ಯೂಜಿಲೆಂಡ್ ವಿರುದ್ಧದ ಸರಣಿಯ ಮೊದಲ ಏಕದಿನ ಪಂದ್ಯದಲ್ಲಿ ಅರ್ಶ್‌ದೀಪ್ ಸಿಂಗ್ 10 ಓವರ್‌ಗಳಲ್ಲಿ 70 ರನ್ ನೀಡಿ 4 ಪ್ರಮುಖ ವಿಕೆಟ್ ಪಡೆದರು. ಈ ಮಾರಕ ವೇಗದ ದಾಳಿಗೆ ತತ್ತರಿಸಿದ ಆತಿಥೇಯ ಕಿವೀಸ್ ಪಡೆ 185 ರನ್‌ಗಳಿಗೆ ಸರ್ವಪತನ ಕಂಡಿತು. ತದನಂತರ ಮಳೆಯಿಂದಾಗಿ ಡಕ್ವರ್ಥ್ ಲೂಯಿಸ್ (DLS) ನಿಯಮದಂತೆ ಪರಿಷ್ಕೃತಗೊಂಡ 143 ರನ್‌ಗಳ ಗುರಿಯನ್ನು ಭಾರತ 5 ವಿಕೆಟ್‌ಗಳ ನಷ್ಟಕ್ಕೆ ಸುಲಭವಾಗಿ ಬೆನ್ನಟ್ಟಿ ಜಯ ಸಾಧಿಸಿತು.
ಪಂದ್ಯದ ಆರಂಭದಲ್ಲೇ ಹೊಸ ಚೆಂಡಿನಲ್ಲಿ ಕಿವೀಸ್ ಆರಂಭಿಕರಾದ ವಿಲ್ ಯಂಗ್ ಹಾಗೂ ಹೆನ್ರಿ ನಿಕೋಲ್ಸ್ ಅವರ ವಿಕೆಟ್ ಉರುಳಿಸಿದ ಅರ್ಶ್‌ದೀಪ್, ತದನಂತರ ಕ್ರೀಸ್‌ನಲ್ಲಿ ನೆಲೆ ಕಂಡುಕೊಂಡಿದ್ದ ಅಪಾಯಕಾರಿ ಗ್ಲೆನ್ ಫಿಲಿಪ್ಸ್ ಮತ್ತು ಕೈಲ್ ಜೇಮಿಸನ್ಗೆ ಪೆವಿಲಿಯನ್ ದಾರಿ ತೋರಿಸಿ ತಮ್ಮ 4 ವಿಕೆಟ್ ಪೂರ್ಣಗೊಳಿಸಿದರು.
ಪಂದ್ಯ ಮುಗಿದ ಬಳಿಕ ಸೋನಿ ಸ್ಪೋರ್ಟ್ಸ್ ವಾಹಿನಿಯ ವಿಶ್ಲೇಷಣಾ ಕಾರ್ಯಕ್ರಮದಲ್ಲಿ ಮಾತನಾಡಿದ ಮಾಜಿ ನಾಯಕ ಸುನಿಲ್ ಗವಾಸ್ಕರ್, ಅರ್ಶ್‌ದೀಪ್ ಚೆಂಡನ್ನು ಇನ್‌ಸ್ವಿಂಗ್ ಹಾಗೂ ಔಟ್‌ಸ್ವಿಂಗ್ ಎರಡೂ ರೀತಿಯಲ್ಲಿ ಚಲಿಸುವಂತೆ ಮಾಡುತ್ತಾರೆ. ಬ್ಯಾಟ್ಸ್‌ಮನ್‌ಗಳಿಗೆ ಮುಂದಿನ ಎಸೆತ ಯಾವ ಕಡೆ ಬರಲಿದೆ ಎಂಬುದನ್ನು ಊಹಿಸುವುದೇ ದೊಡ್ಡ ಸವಾಲಾಗುತ್ತದೆ. ಇಂದಿನ ಪಂದ್ಯದಲ್ಲಿ ಅವರ ಲೈನ್ ಮತ್ತು ಲೆಂತ್ ಅತ್ಯುತ್ತಮವಾಗಿತ್ತು. ಆಫ್ ಮತ್ತು ಮಿಡಲ್ ಸ್ಟಂಪ್ ಲೈನ್‌ನಲ್ಲಿ ಬೌಲ್ ಮಾಡುವ ಮೂಲಕ ಬಲಗೈ ಬ್ಯಾಟ್ಸ್‌ಮನ್‌ಗಳನ್ನು ಕಟ್ಟಿಹಾಕಿದರು.
ಕಳೆದ 2-3 ವರ್ಷಗಳಿಂದ ಅವರ ಬೌಲಿಂಗ್ ಬೆಳವಣಿಗೆಯನ್ನು ನಾನು ಗಮನಿಸುತ್ತಿದ್ದೇನೆ. ಅವರ ಈ ಕೌಶಲವು ಕೆಂಪು ಚೆಂಡಿನ (ಟೆಸ್ಟ್) ಕ್ರಿಕೆಟ್‌ಗೂ ಅತ್ಯಂತ ಪರಿಣಾಮಕಾರಿಯಾಗಲಿದ್ದು, ಅವರನ್ನು ಖಂಡಿತವಾಗಿಯೂ ಟೆಸ್ಟ್ ತಂಡಕ್ಕೆ ಆಯ್ಕೆ ಮಾಡಬೇಕು ಎಂದು ಹೇಳಿದರು.
ಇದೇ ವೇಳೆ ಅರ್ಶ್‌ದೀಪ್ ಸಾಮರ್ಥ್ಯವನ್ನು ಬೆಂಬಲಿಸಿ ಮಾತನಾಡಿದ ಅಜಿಂಕ್ಯ ರಹಾನೆ, ಅರ್ಶ್‌ದೀಪ್ ಸಿಂಗ್ ಅವರಿಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಖಂಡಿತವಾಗಿಯೂ ಅವಕಾಶ ನೀಡಬೇಕು. ಬಿಳಿ ಚೆಂಡಿನಲ್ಲಿ ಅವರು ತೋರಿಸುವ ಸ್ವಿಂಗ್, ನಿಯಂತ್ರಣ ಹಾಗೂ ವಿಕೆಟ್ ಕಲೆಹಾಕುವ ಚಾಕಚಕ್ಯತೆ ಕೆಂಪು ಚೆಂಡಿನಲ್ಲೂ ಅಷ್ಟೇ ಪರಿಣಾಮಕಾರಿಯಾಗಿದೆ. ಅರ್ಶ್‌ದೀಪ್ ಸಿಂಗ್ ಈವರೆಗೆ ಭಾರತದ ಪರ 19 ಏಕದಿನ ಹಾಗೂ 104 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದು, ಸುದೀರ್ಘ ಮಾದರಿಯ ಟೆಸ್ಟ್ ಕ್ರಿಕೆಟ್‌ಗೆ ಇನ್ನು ಪಾದಾರ್ಪಣೆ ಮಾಡಬೇಕಿದೆ. ಅವರ ಈ ಕೌಶಲ ಮುಂಬರುವ ಟೆಸ್ಟ್ ಸರಣಿಗಳಲ್ಲಿ ಭಾರತ ತಂಡಕ್ಕೆ ದೊಡ್ಡ ಬಲ ತರಲಿದೆ ಎಂಬುದು ಮಾಜಿ ದಂತಕಥೆಗಳ ಅಭಿಪ್ರಾಯವಾಗಿದೆ(ಏಜೆನ್ಸೀಸ್).